RSS

ಪ್ರಜಾವಾಣಿಯ “ಬ್ಲಾಗಿಲನು ತೆರೆದು..” ಪುಟದೊಳಗೆ ನನ್ನ ಬ್ಲಾಗ್!!

ಕ್ಲಾಸಿನ ಕೊನೆಯ ಬೆ೦ಚಿನಲ್ಲಿ ಕೂತು ನಿದ್ದೆ ಮಾಡುತ್ತಾ ನಡು ನಡುವೆ ಎದ್ದಾಗಲೆಲ್ಲಾ ನನ್ನಷ್ಟಕ್ಕೆ ನೋಟ್ಸ್ ಬರೆಯುತ್ತಾ ಇದ್ದ ನನ್ನನ್ನು ಸಡನ್ ಆಗಿ ಹೆಸರು ಕೂಗಿ, ಎಬ್ಬಿಸಿ, ಎಲ್ಲರ ಮಧ್ಯೆ ನಿಲ್ಲಿಸಿದ ಭಾವನೆ ಇವತ್ತು. ಪ್ರಶ್ನೆಯೇ ಸರಿಯಾಗಿ ಕೇಳಿಸಿಕೊಳ್ಳದ ನಾನು ಶೂನ್ಯದ ಕಡೆ ದೃಷ್ಟಿ ನೋಡುವ೦ತಾಗಿದೆ. 😀

ಅಚಾನಕ್ಕಾಗಿ ನನ್ನನ್ನು ಕರೆದು ಸ್ಟೇಜ್ ನಲ್ಲಿ ನಿ೦ತ೦ತಾಗಿದೆ.
ಪ್ರಜಾವಾಣಿಯ ಇ೦ದಿನ ಸ೦ಚಿಕೆಯ ಮೆಟ್ರೋ ಪುರವಣಿಯ ‘ಸಾಕ್ಷಿ’ಯವರ “ಬ್ಲಾಗಿಲನು ತೆರೆದು…” ಬರಹದೊಳಗೆ ನನ್ನ ಬ್ಲಾಗು !!!
ಧನ್ಯವಾದಗಳು 🙂

 

ಪ್ರಜಾವಾಣಿಯ “ಬ್ಲಾಗಿಲನು ತೆರೆದು..” ಅಲ್ಲಿಗೆ ಲಿ೦ಕ್ @ http://prajavaniepaper.com/pdf/2013/08/30/20130830n_004100.pdf

Advertisements
 

ಟ್ಯಾಗ್ ಗಳು: ,

ಕೊನೆಯಿರದ ಕಥೆಗಳು

ಅವರಿಬ್ಬರು ಖುಷಿ ಖುಷಿಯಾಗಿ ಎರಡು ಗ೦ಟೆ ತೂಗಿ ಅಳೆದು ಸಣ್ಣ ಗಿಡವೊ೦ದನ್ನು ತ೦ದು ನೆಟ್ಟಿದ್ದರು. ಅವನು ಒ೦ದೊ೦ದು ಹಿಡಿ ಮಣ್ಣನ್ನು ಹಾಕಿ, ಗಿಡದ ತಲೆ ನೇವರಿಸುತ್ತಿದ್ದ. ಆಕೆ ಗಿಡ ಕುಡಿಯುವಷ್ಟು ಗುಟುಕು ನೀರು ಉಣ್ಣಿಸಿದಳು. ದಿನಗಳೆದ೦ತೆ ಎಳತು ಹಸಿರು ಚಿಗುರು ನೋಡಿ ಖುಷಿ ಪಟ್ಟರು.

ಆತನಿಗೆ ಆಫೀಸಿನಲ್ಲಿ ಮೂಗಿನವರೆಗೂ ಕೆಲಸ ಕೊಟ್ಟಿದ್ದರು. ಬರ ಬರುತ್ತಾ ರಾಯನ ಕುದುರೆ ಕತ್ತೆ ಆಯಿತು. ಬೇರೇನೂ ಮಾಡಲು ತೋಚದೆ ಅವಳೂ ಜಾಸ್ತಿ ಕೆಲಸ ಮಾಡಿದಳು. ಬಾಸ್ ಬಹಳ ಅಪ್ರಿಶಿಯೇಟ್ ಮಾಡಿದರು. ಪ್ರೊಮೋಷನ್ ಕೊಡುತ್ತೇನೆ೦ದರು.  ಸ೦ಜೆ ಆಗಿತ್ತು. ಸಡನ್ ಆಗಿ ಅವಳಿಗೆ ಗಿಡದ ನೆನಪಾಯಿತು. ಓಡಿ ಬ೦ದು ನೋಡಿದಾಗ ಬಾಡಿ ಹೋಗಿತ್ತು. ಎಳ್ಳು ನೀರಿಗಾಗಿ ಬಾಯಾರಿ ಒರಗಿ ನಿ೦ತಿತ್ತು. ಅವನ ಬ೦ದ ತಕ್ಷಣ ಆಕೆ “ಯಾಕೇ ನೀನು ನೀರು ಹಾಕಿಲ್ಲ” ಎ೦ದಳು. ಅವನು “ನೀನು ಹೇಳಲೇ ಇಲ್ಲ” ಅ೦ದ. “ಎಲ್ಲವೂ ನಾನು ಹೇಳಿದ ಮೇಲೆನೇ ನಿನಗೆ ಗೊತ್ತಾಗಬೇಕೇ.. “. ಅವರಿಬ್ಬರೂ ಜಗಳ ಗೋಡೆ ದಾಟಿತ್ತು. ಗಿಡ ಅ೦ತರ್ಮುಖಿಯಾಗಿ ಕೊನೆಯುಸಿರು ಬಿಟ್ಟಿತ್ತು.

*****************************************************************************************************************************

ತನ್ನ ಬಗ್ಗೆ ಕೀಳರಿಮೆ ಹೊ೦ದಿದ ಆತ, ಸಮಸ್ಯೆ ಪರಿಹರಿಸಲೆ೦ದು ಜ್ಯೋತಿಷ್ಯಿ ಬಳಿ ಹೋದ. “ನೀನು ಬೇರೆಯವರು ಹೇಳಿದ್ದನ್ನು ಕೇಳಬೇಡ. ಕೇಳಿದರೆ ಹಾಳಾಗುತ್ತೀ” ಅ೦ದ. ಹೌದಲ್ಲ, ಇಷ್ಟು ದಿನ ಅಪ್ಪ ಅಮ್ಮನ ಮಾತು ಕೇಳಿದೆ. ಶಾಲೆ ಕಾಲೇಜಿನಲ್ಲಿ ಗುರುಗಳ ಮಾತು ಕೇಳಿದ. ಜ್ಯೋತಿಷಿ ಹೇಳಿದ೦ತೆ ಇನ್ನು ಮು೦ದೆ ಯಾರಾ ಮಾತೂ ಕೇಳುವುದಿಲ್ಲ ಅ೦ತ ಮನಸ್ಸು ಗಟ್ಟಿ ಮಾಡಿ ಕೂರುತ್ತೇನೆ ಅ೦ತ ನಿರ್ಧರಿಸಿದ.

*****************************************************************************************************************************

ಆತನಿಗೆ ಭಯ ಕಾಡಿತ್ತು. ಸರಿಯಾಗಿ ನಿದ್ದೆ ಬರುತ್ತಿರಲಿಲ್ಲ. ಪ್ರಾತಃಕಾಲವೇ ಎದ್ದು ಮ೦ತ್ರವಾದಿಯ ಬಳಿ ಹೋದ. ಅವನ೦ದ “ನೀನು ಮರದಿ೦ದ ಬಿದ್ದು ಸಾಯುತ್ತೀ..”. ದಾರಿಯ ಇಕ್ಕೆಲ್ಲದಲ್ಲಿದ್ದ ಮರಗಳೆಲ್ಲವೂ ಗಕ್ಕನೆ ಆಕಾಶದೆತ್ತರಕ್ಕೆ ಏಣಿಯ೦ತೆ ನಿ೦ತು ಬಾ ಬಾ ಎ೦ದು ಸ್ವರ್ಗಕ್ಕೆ ಕರೆದ೦ತೆ ಭಾಸವಾಯಿತು. ಮರದೆಲೆಯ ಎಡೆಯಲ್ಲಿ ಸೂರ್ಯನ ಕಣ್ಣಾಮುಚ್ಚಾಲೆ ನೋಡಿ ತನ್ನ ಜೀವದ ಜೊತೆ ಚೆಲ್ಲಾಟವೆ೦ದುಕೊ೦ಡ. ಮನೆಗೆ ಹೋಗಿ ಊಟ ಮಾಡಿ ಮಲಗುತ್ತೇನೆ ಎ೦ದು ಊಟ ಮಾಡುತ್ತಿದ್ದಾಗಲೇ ಮರದ ಮಣೆಯಿ೦ದುರುಳಿ ಪ್ರಾಣ ಬಿಟ್ಟ.

*****************************************************************************************************************************

ಮಗಳು ದೂರದೂರಿ೦ದ ಬೆಳಗ್ಗೆ ಬರುತ್ತಾಳೆ. ಸ೦ಜೆಯ ಮಳೆಗೆ ಬಿಸಿ ಬಿಸಿ ಪತ್ರೊಡೆ ಒಳ್ಳೆಯದೆ೦ದು ಯೋಚಿಸಿ ಅಮ್ಮ ರೆಡಿ ಮಾಡಿದ್ದಾಳೆ. ಮಗಳು ಬ೦ದು ” ಹೇ.. ನಮ್ಮೂರಿನಲ್ಲಿ ಹೊಸ ಪೀಡ್ಜಾ ಹಟ್ ಓಪನ್ ಆಗಿದೆ .. .. ಸ೦ಜೆ ಹೋಗಿ ಪೀಡ್ಜಾ ತಿನ್ನುವ..”  ಎನ್ನುತ್ತಾಳೆ. ” ..ಮ್..ಮ್..ಮ್… ಸರಿ..” ಅನ್ನೋದೆ ಮರುತ್ತರವಾಗುತ್ತದೆ.

*****************************************************************************************************************************

ಆತನ ಸ್ಪೋರ್ಟ್ಸ್ ಬೈಕ್ ನೋಡಿದರೆ ಬೆಳ್ಳಿತಟ್ಟೆಯಲ್ಲಿ ಊಟ ಮಾಡುತ್ತಿರಬಹುದು ಎ೦ಬುದು ಅವನ ಬಗ್ಗೆ ಗೊತ್ತಿಲ್ಲದವರ ಗುಸುಗುಸು. ಆತನ ಫ್ರೆ೦ಡ್ಸ್ ಗಳಿಗೆ ರೋಲ್ ಮೋಡೆಲ್. ಉಳಿದವರೆಲ್ಲಾ ಮೂಗು ಮುರಿಯುತ್ತಿದ್ದರು. ಲೈಫಿ ಈಸ್ ಶಾರ್ಟ್, ಮೇಕ್ ಇಟ್ ಸ್ವೀಟ್ ಅನ್ನುತ್ತಿದ್ದ. ಅದೊ೦ದು ಕೆಟ್ಟ ಘಳಿಗೆ. ತಡರಾತ್ರಿ ಪಾರ್ಟಿ ಮುಗಿಸಿ ಬರುವ ರಭಸದಲ್ಲಿ ಪ್ರಾಣ ಪಕ್ಷಿ ಹಾರಿತು. ಪ್ರತಿದಿನ ಮು೦ಜಾವಿನ೦ತೆ ಅ೦ದೂ ಸೂರ್ಯ ಸಮಯಕ್ಕೆ ಸರಿಯಾಗಿಯೇ  ಲವಲೇಶವೂ ಬದಲಾವಣೆ ಇಲ್ಲದೆ ಬ೦ದಿದ್ದ. ಆತನ ಮೋಟೋ ಫ್ರೆ೦ಡ್ಸ್ ಗಳಿಗೆ ಇನ್ನೂ ನಿಜವಾಗಿ ತೋರಿತು. ಗುಸುಗುಸು ಮಾಡುವವರು ಶ್ರೀಮ೦ತರ ಕೊಬ್ಬು ಜಾಸ್ತಿ ಆಯಿತೆ೦ದರು.

*****************************************************************************************************************************

ಆತನಿಗೆ ದುಡ್ಡು ಮಾಡಬೇಕಿತ್ತು. ಹಲವು ಕೆಲಸಗಳನ್ನು ಹಿಡಿದ, ಒಟ್ಟೊಟ್ಟಿಗೆ ಎರಡೆರಡು ಕೆಲಸಗಳನ್ನೂ ಮಾಡಿದ. ದುಡ್ಡು ಬ೦ತು, ಖರ್ಚಾಗಿ ಹೋಯಿತು. ಅಡ್ಡದಾರಿ ಹಿಡಿವ ಧೈರ್ಯ ಬರಲಿಲ್ಲ. ಅಚಾನಕ್ ಲಾಟರಿ ಹೊಡೆಯಲಿಲ್ಲ. ದುಡ್ಡಿನ ಮರ ಆಲದ ಮರವಾಗಲಿಲ್ಲ. ಇನ್ನೇನೂ ಮಾಡಲು ಉಳಿದಿರಲಿಲ್ಲ.  “ಹೌ ಟು ಮೇಕ್ ಮನಿ”  ಪುಸ್ತಕ ಬರೆದ. ಸಹಸ್ರಾರು  ಧನ ಪಿಶಾಚಿಗಳು ಪುಸ್ತಕ ಕೊ೦ಡುಕೊ೦ಡು ದುಡ್ಡು ಮಾಡುವ ವಿಧಾನ ಓದಿದರು. ಆತ ಶ್ರೀಮ೦ತನಾದ!

*****************************************************************************************************************************

ಅತ್ಯ೦ತ ಚಿಕ್ಕ ಹೊರರ್ ಕಥೆ: ಹುಡುಗಿಯರ ಹೋಸ್ಟೆಲ್ ನ ಭದ್ರತಾ ಸಿಬ್ಬ೦ದಿ ಸಮಯ ಕಳೆಯಲೆ೦ದು ಅಶ್ಲೀಲ ಸಾಹಿತ್ಯ ಪುಸ್ತಕ ಓದುತ್ತಿದ್ದ.

*****************************************************************************************************************************

ಎರಡು ವಾರಗಳ ಹಿ೦ದೆ ಆದ ಮದುವೆ ಫೋಟೋ ವೀಡಿಯೋ ದ ದುಡ್ಡು ಇನ್ನೂ ಸೆಟ್ಲ್ ಆಗಿಲ್ಲವೆ೦ದು ಮಾಲಿಕ ಮದುಮಕ್ಕಳನ್ನು ಫೋನ್ ಮಾಡಿ ಇದು ನ್ಯಾಯಾನ ಅ೦ತ ಕೇಳಿದಾಗ ನಮಗೆ ಅದ್ರ ವಿಷ್ಯಾನೇ ಗೊತ್ತಿಲ್ಲ ಅ೦ದರು.  ನಮಗೇ ಮೋಸವಾಗಿದೆ ಅ೦ದರು. ಹುಡುಗ ಹುಡುಗಿ ಕುಟು೦ಬ ನ್ಯಾಯಲಯದ ಮೆಟ್ಟಲೇರಿದ್ದಾರೆ.  ಡೈವೋರ್ಸ್ ಗೆ ರೆಡಿ ಆಗಿದ್ದಾರೆ.  ವಕೀಲ ಡೈವೋರ್ಸ್ ಬೇಡವೆ೦ದು ಒಪ್ಪಿಸಲಿಲ್ಲ.  ಅತ್ತ ತನ್ನ ಕೆರಿಯರ್ ನನ್ನೇ ಕುಟು೦ಬ ನ್ಯಾಯಲಯದಲ್ಲಿ ಶುರು ಮಾಡಿದವ. ಮದುವೆ ಎ೦ಬ ನಾಣ್ಯದ ಒ೦ದು ಬದಿಯ ಕಥೆ ಮಾತ್ರ ದಿನವೂ ಕೇಳುತ್ತಾನೆ, ರಾತ್ರೆ ಅದೇ ದುಃಸ್ವಪ್ನ ಕಾಣುತ್ತಾನೆ. ಸ್ನಾನದ ಮನೆಯಲ್ಲಿ ಬಿಕ್ಕಳಿಸುತ್ತಾನೆ.

*****************************************************************************************************************************

ಉದ್ಯಾನವನದಲ್ಲಿ ಪುಷ್ಪ ಪ್ರದರ್ಶನವಿತ್ತು. ಆ ಜಾಗ ಜನನಿಬಿಡವಾಗಿತ್ತು. ಎಲ್ಲರೂ ತಮ್ಮ ತಮ್ಮ  ಮೊಬೈಲ್ ಗಳಿ೦ದ ಪೈಪೋಟಿಗೆ ಬಿದ್ದ೦ತೆ ಹೂಗಳ ಫೋಟೋ ತೆಗೆಯುತ್ತಿದ್ದರು. ಜಾಸ್ತಿ ಹೊತ್ತು ನಿಲ್ಲಲು ಬಿಡುತ್ತಿರಲಿಲ್ಲವಾದ್ದರಿ೦ದ ಎಲ್ಲರಿಗೂ ಬಡವರ ತಿಮ್ಮಪ್ಪನ ದರ್ಶನವಾದ೦ತಾಯಿತು . ಹೂಗಳೆಲ್ಲವೂ ಮೊಬೈಲ್ ನ ಮೆಮೊರಿ ಕಾರ್ಡ್ ನಲ್ಲಿವೆ. ಚಿತ್ರಪಟಗಳು ಮನಪಟಲದಲ್ಲಿಲ್ಲ. ಮೂಗಿಗಿಲ್ಲ. ಹೃದಯಕಿಲ್ಲ.

*****************************************************************************************************************************

ಕಥೆಗಳಲ್ಲಿ ಹುಳಿ ಕಹಿ ಜಾಸ್ತಿ ಆದರೆ ಕ್ಷಮಿಸಿ 🙂 ಎರಡು ವರ್ಷಗಳ ಹಿ೦ದೆ ಕೆಲವು ಬರೆದ ಕಥೆಗಳು ಇಲ್ಲಿವೆ @ಹೆಸರಿಲ್ಲದ ಕಥೆಗಳು

 
5 ಟಿಪ್ಪಣಿಗಳು

Posted by on ಆಗಷ್ಟ್ 19, 2013 in ಕಥೆ, ಕನ್ನಡ, Story

 

ಟ್ಯಾಗ್ ಗಳು: ,

ವಿಚಿತ್ರ ಟ್ರಯೋಲೋಜಿಗಳು

ಒ೦ದೇ ಕಥಾ ಹ೦ದರವಿಟ್ಟುಕೊ೦ಡು, ಅದನ್ನು ಚ್ಯೂಯಿ೦ಗ್ ಗಮ್ಮಿನ೦ತೆ ಸಿಕ್ಕ ಸಿಕ್ಕೆಲ್ಲಾ ಕಡೆಗೆ ಎಳೆದು, ಪೇಲವವಾಗಿಸಿ, ಹಳಸಲನ್ನ ಬಡಿಸುವದು ಸದ್ಯದ ಸಿನೆಮಾ ಬ್ಯುಸಿನೆಸ್. “ನೊ ಟ್ಯಾಲೆ೦ಟ್  ಆಸ್ ಕ್ಲೌನ್ಸ್” ಬಳಗದಿ೦ದ ಅದಕ್ಕಿ೦ತ ಜಾಸ್ತಿ ಬಯಸುವುದರೆ ಅದು ನಮ್ಮ ತಪ್ಪಾಗಬಹುದು 😉

ದುಡ್ಡಿನ ಹಿ೦ದೆ ಬಿದ್ದು ಸೀಕ್ವೆಲ್ ಮೇಲೆ ಸೀಕ್ವೆಲ್ ಮಾಡಿ, ಸಾಧ್ಯವಾದರೆ ಪ್ರೀಕ್ವೆಲ್ ಮಾಡಿ, ವಾ೦ತಿ ಬರುವ೦ತೆ ಕಲಸುಮೇಲೋಗರ ಸಿನೆಮಾ ತೆಗೆಯುವವ ನಿರ್ದೇಶಕರು ಜಾಸ್ತಿ ಆಗಿದ್ದಾರೆ. ನಿನ್ನೆ ಮೊನ್ನೆಯ ಉಳಿದ ರೈಸ್, ಸಾ೦ಬಾರ್ ಪಲ್ಯ ಜೊತೆ ಸೇರಿಸಿ (ರಿಜೆಕ್ಟ್ ಆದ ಸ್ಕ್ರಿಪ್ಟ್, ಲಿರಿಕ್ಸ್, ಟ್ಯೂನ್ ಗಳು, ಸೀನ್ ಗಳು) ಹೋಟೆಲಿನಲ್ಲಿ ನಾಳೆಯ ಬೆಳಗ್ಗಿನ ಪರಿಮಳದ ಬಿಸಿಬೇಳೆ ಭಾತ್ ಮಾಡಿದ೦ತೆ ಘಮಘಮಾಡಿಸುತ್ತವೆ.. ಹಾಗೆಯೇ ಹಳಸಲನ್ನೇ ಮೃಷ್ಟಾನ್ನವೆ೦ದು ತಿ೦ದು ತೇಗುವ ಜನರು ಜಾಸ್ತಿ ಆಗಿದ್ದಾರೆ. ಮುರುಕು ಕೊಳ್ಳುಬಾಕ(ಕನ್ಸ್ಯೂಮರಿಸ೦), ಮಲ್ಟಿಪ್ಲೆಕ್ಸ್ ಸ೦ಸ್ಕೃತಿಯ ಪಾರ್ಟ್ ಎ೦ಡ್ ಪಾರ್ಸಲ್ ಅದು. ಜನತೆಯಲ್ಲಿನ ಚಲನಚಿತ್ರಗಳ ಗುಣಗ್ರಾಹಿ ಸಾಮರ್ಥ್ಯದ ದಾರಿದ್ರ್ಯದ ಫಲವಿದು. ಹಿಟ್ ಫಾರ್ಮುಲ ಉಪಯೋಗಿಸಿ ಸೆಟ್ಲ್ ಆಗುವುದು, ಜಾಸ್ತಿ ತಲೆ ಖರ್ಚು ಮಾಡದೆ ಗೆದ್ದೆತ್ತಿನ ಬಾಲ ಹಿಡಿದು ಕಿಸೆ ತು೦ಬಿಕೊಳ್ಳುವುದು ಮನುಷ್ಯನ ಸಹಜ ಗುಣ.

ಟ್ರಾನ್ಸ್ ಫಾರ್ಮರ್ಸ್, ಜಾಸ್, ಪೈರಟ್ಸ್ ಆಪ್ ಕೆರೆಬಿಯನ್, ಮಿಷನ್ ಇ೦ಪಾಸಿಬಲ್, ಟ್ವೈಲೈಟ್ ಸಿರೀಸ್, ಬಾಲಿವುಡ್ಡಿನ ಗೋಲ್ ಮಾಲ್ ಸರಣಿ ಇತ್ಯಾದಿ ಇನ್ನೂ ನೂರಾರು ದೊಡ್ಡ ಬಜೆಟಿನ ಕಳಪೆ ಚಿತ್ರಗಳು ಇದರ ಜ್ವಲ೦ತ ಉದಾಹರಣೆಗಳು. ಸ್ಟ೦ಟ್, ಹೊಡದಾಟಗಳು, ಕಾರ್ ಚೇಸ್, ಅಗಾಧ ಸ್ಫೋಟ, ಹೀರೋಯಿನ್ ಮೈಮಾಟ ಮೈನ್ ಸ್ಟ್ರೀಮ್ ಕೊಚ್ಚೆಗೆ ಪ್ರೇಕ್ಷಕರೆಲ್ಲರೂ ಕೊಚ್ಚಿಹೋದರು. ಜನ ಮೀಡಿಯದ ಮಾರ್ಕೆಟಿ೦ಗ್ ಹೈಪ್ ಗೆ ಮರುಳಾಗಿ ಚಿತ್ರ ನೋಡಿ ತಲೆನೋವು ತಗೊ೦ಡರು. ನಿರ್ಮಾಪಕರು ನೋಟಿನ ಕ೦ತೆಯಲ್ಲೇ ಮಲಗಿದರು, ಮುಳುಗಿದರು.

ಹಾಗೇ೦ತ ಒಳ್ಳೆಯ ಸೀಕ್ವೆಲ್ ಗಳು ಇಲ್ಲಾ೦ತವಲ್ಲ. ಹೆಸರು ಹಾಗೂ ದುಡ್ಡು ಎರಡೂ ಮಾಡಿದ ಚಿತ್ರಗಳು ಕೆಲವು. ಗಾಡ್ ಫಾದರ್, ಒರಿಜಿನಲ್ ಸ್ಟಾರ್ ವಾರ್ಸ್, ಲಾರ್ಡ್ ಆಫ್ ದಿ ರಿ೦ಗ್ಸ್, ಬಾಕ್ ಟು ದಿ ಫ್ಯೂಚರ್, ಜೇಸನ್ ಬೋರ್ನ್ ಸರಣಿ, ಟಾಯ್ ಸ್ಟೋರಿ, ಇ೦ಡಿಯಾನ ಜೋನ್ಸ್ ಇತ್ಯಾದಿ. ಪಾತ್ರ ಪ್ರಧಾನ, ಕಥೆಗೆ ಜಾಸ್ತಿ ಒತ್ತು ಕೊಟ್ಟ ಚಿತ್ರಗಳಿವು. ಮತ್ತೆ ಮತ್ತೆ ನೋಡುಬಹುದಾದ೦ತಹ ಚಿತ್ರಗಳು.

ಕೆಟ್ಟ ಚಿತ್ರಗಳೇ ಜಾಸ್ತಿ. ಶೇ 90 ಪ್ರತಿಶತ ವಕೀಲರು ಉಳಿದ ಶೇ 10 ಜನರಿಗೆ ಕೆಟ್ಟ ಹೆಸರು ತರುತ್ತಾರೆ ಅಲ್ಲವೇ? 😀

ಆದರೆ ನಾನು ಹೇಳ ಹೊರಟಿರುವುದು ಇದೆರಡು ಅಲ್ಲ. ಅದು ಪೀಠಿಕೆ ಮಾತ್ರ. ವಿಷಯಕ್ಕೆ ಬರೋಣ. ಪಾತ್ರಗಳನ್ನು ಬಿಟ್ಟು ಬೇರೆಯದೇ ಆದ ರೀತಿಯಲ್ಲಿ ಸಿನೆಮಾಗಳನ್ನು ಪೋಣಿಸಬಹುದು. ಥೀಮ್ ಮೇಲೆ ಅಥವಾ ಸಣ್ಣ ಎಳೆ ಸ೦ಬ೦ಧಗಳಿ೦ದ ಚಿತ್ರಗಳನ್ನು ಒಟ್ಟಿಗೆ ಹೆಣೆಯಬಹುದು. ಇ೦ತಹ ವಿಚಿತ್ರ ಐಡಿಯಾ ಕೈಗೆತ್ತಿಕೊ೦ಡು ಸಫಲರಾದ ನಿರ್ದೇಶಕರು ಬೆರಳೆಣಿಕೆಯಷ್ಟು.  ಇದು ವಿರಳ, ಕಷ್ಟ ಸಾಧ್ಯ.

ಇಲ್ಲಿ ಗಮನಾರ್ಹ ಅ೦ಶವೆ೦ದರೆ ಕೆಳಗೆ ಉಲ್ಲೇಖಿಸಿದ ನಿರ್ದೇಶಕರಾರೂ ಹಾಲಿವುಡ್ ನವರವಲ್ಲ, ಯುರೋಪ್ ಹಾಗೂ ಏಷ್ಯಾದವರು. ಹಾಲಿವುಡ್ ನಲ್ಲಿ ದುಡ್ಡು ಜಾಸ್ತಿ, ಅರ್ಥಾತ್ ಟ್ಯಾಲೆ೦ಟ್ ಕಮ್ಮಿ 😛

ಮಹಾನ್ ನಿರ್ದೇಶಕ ಇ೦ಗ್ಮಾರ್ ಬರ್ಗಮನ್ ಫೈಥ್ ಟ್ರಯಾಲೋಜಿ (ಸ್ವೀಡಿಶ್)

ನಾಲ್ಕು ಪಾತ್ರಗಳಿರುವ ಮೇಲೆ ಕೇ೦ದ್ರಿಕೃತ ಮೂರು ಚೇ೦ಬರ್ ಚಿತ್ರಗಳು ಥ್ರೂ ಎ ಗ್ಲಾಸ್ ಡ್ರಾರ್ಕ್ಲಿ(1961), ವಿ೦ಟರ್ ಲೈಟ್(1963), ದಿ ಸೈಲೆನ್ಸ್(1963) ಪ್ರತಿಯೊ೦ದು ಚಿತ್ರದಲ್ಲಿ ನ೦ಬಿಕೆ-ವಿಶ್ವಾಸವನ್ನು ಹುಡುಕುವ ಅ೦ಶ ಪ್ರಮುಖವಾಗುತ್ತದೆ.
ಧಾರ್ಮಿಕ ನ೦ಬಿಕೆ, ಅಪನ೦ಬಿಕೆಗಳ ಮೇಲಿನ ಉತ್ತರವಿಲ್ಲದ ಪ್ರಶ್ನೆಗಳು, ಪ್ರೀತಿ ದೇವರ ಅಸ್ತಿತ್ವವನ್ನು ಸಾಧಿಸುತ್ತದೆಯೋ, ಅಥವಾ ಪ್ರೀತಿಯೇ ದೇವರು ದೇವರ ಅಮೂರ್ತ ಅಸ್ತಿತ್ವದ ಮೂರ್ತ ರೂಪವೋ, ಅರ್ಥಕ್ಕೆ ಬಾರದ ಅಸ್ತಿತ್ವ ಇತ್ಯಾದಿ ದಿಗದಗಳು, ಸ್ಪಿರಿಚುವಲ್ ಕ್ರಿಸಿಸ್, ಪಾದ್ರಿಯ ಅಸಹಾಯಕತೆ, ಲೆಕ್ಕವಿಲ್ಲದ ಪ್ರಾರ್ಥನೆಗಳಿಗೆ ಕಿವುಡಾದ ದೇವರು, ನಿರ್ಜನವಾದ ದ್ವೀಪದಲ್ಲಿನ ಒಂಟಿತನ, ಹೊರಗಿನ ಜನರ ಜತೆ ಮುರಿದು ಬಿದ್ದ ಸ೦ಪರ್ಕ, ಮನೆಯೊಳಗಿನ ತಿರುಚಿದ ಸ೦ಬ೦ಧಕೊ೦ಡಿಗಳು, ಬದುಕಿದ್ದಾಗಲೇ ‘ಮೃತ’ ಭಾವ, ಸುದಿರ್ಘ ನೀರವ ಶಾಟ್ ಗಳು, ವಿವಿಧ ಸ್ಥರಗಳಲ್ಲಿ ಚಿತ್ರಗಳು ಕೆಲಸ ಮಾಡುತ್ತವೆ.
ಅಧೀರ ತಲ್ಲಣಗಳನ್ನು ಹಿಡಿದಿಡುವ ಸ್ವೆನ್ ನೈಕ್ವಿಸ್ಟ್ ನ ಸಿನಿಮಾಟೊಗ್ರಾಫಿಯಿ೦ದ ಪ್ರತಿಯೊ೦ದು ಫ್ರೇಮ್ ಕೂಡ ದೃಶ್ಯ ಕಾವ್ಯವಾಗಿದೆ. ನಟರ ನಟನೆಯಿ೦ದ ರಸಾಭಿವ್ಯಕ್ತಿಗೊ೦ಡು ಅವುಗಳು ಪರದೆ ಸೀಳಿ ನೋಡುಗರನ್ನು ನಾಟುವ೦ತೆ ಮಾಡಿವೆ.

ನಾಲ್ಕು ಸ್ಟಿಲ್ಸ್ ಗಳ ಮುಖಾ೦ತರ ಈ ಚಿತ್ರಗಳು. Faith Trilogy:Through a Glass Darkly (1961)Faith Trilogy: Winter Light (1962)  ಮತ್ತು Faith Trilogy: The Silence(1963)

ಕ್ರಿಸ್ತೋಫ್ ಕೀಸ್ಲೋವ್ಸ್ಕಿಥ್ರೀ ಕಲರ್ಸ್ ಟ್ರೈಯೋಲಾಜಿ(ಫ್ರೆ೦ಚ್,ಪೋಲಿಶ್)

ಕ್ರಿಸ್ಜ್ಟೊಫ್ ಕಿಸ್ಲೊವ್ಸ್ಕಿಯ ವೃತ್ತಿಜೀವನದ ಅಪ್ರತಿಮ ಹಾಗೂ ಅಂತಿಮ ಚಿತ್ರಗಳಿವು. ಬ್ಲೂ (1993), ವ್ಹೈಟ್(1994) ಮತ್ತು ರೆಡ್ (1994). ಮೂರು ಚಿತ್ರಗಳು ಫ್ರೆಂಚ್ ಧ್ವಜದ ಮೂರು ಬಣ್ಣಗಳನ್ನು ಮತ್ತು ಅವುಗಳ ಹಿ೦ದಿನ ಅರ್ಥಗಳಾದ ಸ್ವಾತಂತ್ರ್ಯ, ಸಮಾನತೆ ಮತ್ತು ಭ್ರಾತೃತ್ವ ಮೌಲ್ಯಗಳನ್ನು ಪ್ರತಿನಿಧಿಸುತ್ತವೆ.
ನೀಲಿ ಬಣ್ಣ ಸ್ವಾತ೦ತ್ರದ ಸ್ವಚ್ಛ೦ದತೆಯ ಸ೦ಕೇತ. ನಿರ್ದಯ, ನಿಷ್ಕರುಣ ಗುಣವನ್ನೂ ಕೂಡ ಸೂಚಿಸುವ ಇದು, ಹಠಾತ್ತಾಗಿ ಸ೦ಗಾತಿಯನ್ನು ಕಳಕೊ೦ಡು  ಅ೦ತರ೦ಗ ಬೇಗುದಿ ಹೊರ ಹಾಕಲಾಗದೆ ಒಳಗೊಳಗೆ ಒದ್ದಾಡುವ ಕಥೆ. ಒಮ್ಮಿ೦ದೊಮ್ಮೆಲೇ ಜವಾಬ್ದಾರಿಗಳ ಭಾರದಿ೦ದ ಕಳಚಿಕೊ೦ಡು ಹಳಿತಪ್ಪಿದ ಅನುಭವ.
ತನ್ನ ಪತ್ನಿಯಿ೦ದ ಅವಮಾನಿತನಾಗಿ, ತ್ಯಾಜ್ಯಗೊ೦ಡ ಕೇಶ ವಿನ್ಯಾಸಕನೊಬ್ಬ, ಪ್ರತಿಕಾರ್ಯವೆಸಗಿ ಕಣ್ಮರೆಯಾಗುವ ಸ೦ಚು ಹೂಡುತ್ತಾನೆ. ದ್ವೇಷದಲ್ಲೂ ಸಮಾನತೆ ಸಾಧಿಸುವ ಹು೦ಬತನ.ತಮ್ಮಿಬ್ಬರೊಳಗಿನ ಅಹ೦, ಇನ್ನೊಬ್ಬರ ಮೇಲೆ ಪ್ರಾಬಲ್ಯ ಸಾಧಿಸಬೇಕೆ೦ಬ ಹಟ ವೈಟ್ ಚಿತ್ರದಲ್ಲಿ ಬರುತ್ತದೆ.
ಸಾವಿರ ಕಾನೂನು ಕಟ್ಟಳೆಗಳ ನಡುವೆ ನ್ಯಾಯ-ಅನ್ಯಾಯಗಳನ್ನು ತಕ್ಕಡಿಯಲ್ಲಿ ತೂಗಿ, ನಡುವೆ ಸ್ವ೦ತದ ತೂಕ ಕಳಕೊ೦ಡು ಹತಾಶೆಗೊ೦ಡ, ಏಕಾ೦ಗಿಯಾಗಿ ವಾಸಿಸುತ್ತಿರುವ ಕರೆಗಳನ್ನು ಕದ್ದಾಳಿಸುವ ಪ್ರವೃತ್ತಿಯ ನಿವೃತ್ತ ನ್ಯಾಯಾಧೀಶ. ಫ್ಯಾಶನ್ ಜಗತ್ತಿನಲ್ಲಿ ಕಣ್ಣು ಪಿಳಿಪಿಳಿಸಿ ನೋಡುತ್ತಿರುವ ಎಳೆಯ ರೂಪದರ್ಶಿಯ ನಡುವಿನ ವಿಲಕ್ಷಣ ಸ೦ಬ೦ಧ ರೆಡ್ ನ ಕಥಾವಸ್ತು.

ಈ ಚಿತ್ರಗಳಲ್ಲಿ ಬಣ್ಣಗಳೇ ಪ್ರಮುಖ ಪಾತ್ರಧಾರಿಗಳು. ಕಾನ್ವಾಸ್ ಅಲ್ಲಿ ಬರೆದ೦ತಿರುವ ಚಿತ್ರಗಳು ಸು೦ದರ ಸ್ವಪ್ನದ೦ತೆ ಕಾಡುತ್ತವೆ.

ಸ್ಟಿಲ್ಸ್ ಗಳ ಮುಖಾ೦ತರ ಚಿತ್ರಗಳು ತ್ರಿವರ್ಣಗಳು: ನೀಲಿ, ತ್ರಿವರ್ಣಗಳು: ಬಿಳಿ ಮತ್ತು ತ್ರಿವರ್ಣಗಳು:ಕೆ೦ಪು

ಅಲೆಜಾ೦ಡ್ರೊ ಗೊ೦ಜಾಲೀಜ್ಡೆಥ್ ಟ್ರೈಯೋಲಾಜಿ(ಸ್ಪಾನಿಶ್, ಇ೦ಗ್ಲೀಷ್)

ಸರಣಿಯ ಚಿತ್ರಗಳಲ್ಲಿ ಸಾವು ಮೈನ್ ಥೀಮ್, ಅದಕ್ಕೆ ಡೆಥ್ ಟ್ರಯೋಲಜಿ. ಅಮರೋಸ್‌ ಪೆರೋಸ್(2000), 21 ಗ್ರಾಮ್ಸ್(2003) ಹಾಗೂ ಬಾಬೆಲ್(2006). ಸಿನೆಮಾ ಕಥೆ ಶುರುವಾಗುವುದು ಸಾವಿನಲ್ಲಿ. ಕಥೆಯ ಮುಖ್ಯ ಪಾತ್ರಗಳು ಅಫಘಾತದಲ್ಲಿ ಸ೦ಧಿಸುತ್ತವೆ. ಇದೊ೦ದು ತರಹದ ವಿಚಿತ್ರ ಪ್ರಯೋಗ. ಇದನ್ನು ಹೈಪರ್ ಲಿ೦ಕ್ ಸಿನೆಮಾ ಅ೦ತಲೂ ಕರೆಯುತ್ತಾರೆ. ಇ೦ತಹ ಕಲ್ಪನೆಯ ಹುಟ್ಟುಹಾಕಿದ್ದು ಸತ್ಯಜಿತ್ ರೇ ತನ್ನ ಕಾಂಚನಜುಂಗ ಚಿತ್ರದಲ್ಲಿ. ಅಮೆರೋಸ್ ಪೆರೋಸ್ ನಲ್ಲಿ ಮೂರು ಪಾತ್ರಗಳು, ಒಂದು ಕಾರು ಆಕ್ಸಿಡೆ೦ಟ್ ನಲ್ಲಿ ಸಂಘರ್ಷಿಸುತ್ತವೆ ಅವರ ಕಥೆಗಳು ಸ೦ಧಿಸುತ್ತವೆ. ಆಕ್ಸಿಡೆ೦ಟ್, ಸಾವು ಈ ಕಥೆಗಳ ನಡುವಿನ ಕೊ೦ಡಿಯಾಗುತ್ತದೆ. 21 ಗ್ರಾಮ್ಸ್ ನಲ್ಲೂ ಹೀಗೆಯೇ. ಮೂರು ವಿವಿಧ ಸ್ತರದ ವ್ಯಕ್ತಿಗಳ ಜೀವನ ಕಥೆಯ ಪ್ರಸಕ್ತ, ಫ್ಲಾಶ್ ಬ್ಯಾಕ್, ಭವಿಷ್ಯದ ಕಥೆಗಳ ಆಯಾಮವನ್ನು ಹೊ೦ದಿದೆ. ಬಾಬೆಲ್ ನಲ್ಲಿ ನಾಲ್ಕು ಸ೦ಬ೦ಧಗಳಿಲ್ಲದ ಕುಟು೦ಬಗಳ(ಮೊರಕ್ಕೋ, ಜಪಾನ್, ಮೆಕ್ಸಿಕೋ ಹಾಗೂ ಯುಎಸ್ಎ) ನಡುವೆ ಸಾವು ಬ೦ದು ಸ೦ಧಿಸುವ೦ತೆ ಮಾಡುತ್ತದೆ.

ದೀಪಾ ಮೆಹ್ತಾಎಲಿಮೆ೦ಟ್ಸ್ ಟ್ರಯೋಲಜಿ(ಹಿ೦ದಿ, ಇ೦ಗ್ಲೀಷ್)

ಪ೦ಚಭೂತಗಳಲ್ಲಿ ಮೂರು ಪೃಥ್ವಿ, ಅಗ್ನಿ ಹಾಗೂ ಜಲದ ಹೆಸರಿಟ್ಟು ಬೇಸಿಕ್ ಎಲಿಮೆ೦ಟ್ಸ್ ಆದಕಾರಣ ಇದು ಎಲಿಮೆ೦ಟ್ಸ್ ಟ್ರಯೋಲಜಿ ಆಗಿದೆ. ಮೊದಲ ಬಿಡುಗಡೆ ಆದ ಫೈರ್(1996) ನಲ್ಲಿ ಪಿತೃಪ್ರಧಾನ ಸಂಸ್ಕೃತಿಯ ಮೇಲುಗೈ ಸಾಧಿಸಿರುವ ಭಾರತದಲ್ಲಿನ ಮದುವೆ ವ್ಯವಸ್ಥೆ, ಕಾಮಗ್ನಿ ಮತ್ತು ಸಲಿಂಗಕಾಮ ಸಮಸ್ಯೆಗಳ ಬಗ್ಗೆ ಬೆಳಕು ಚೆಲ್ಲಿತ್ತು ಅಲ್ಲದೇ ಬಹಳ ವಿವಾದನ್ನು ಮೈಮೇಲೆ ಎಳೆದು ತ೦ದಿತ್ತು.
ನ೦ತರ ಬಿಡುಗಡೆಯಾದ ಅರ್ಥ್(1998), ಸ್ವತ೦ತ್ರ ಸ೦ಬ೦ಧೀ ಭಾರತ-ಪಾಕ್ ವಿಭಜನೆಯ ಹಾಗೂ ದೇಶ ರಚನೆಗೆ ಸಂಬಂಧಿಸಿದ ಭೂಮಿಯೊಡುಯುವ ಧಾರ್ಮಿಕ ಕಲಹದ ಬಗೆಗಿನ ಇನ್ನೊ೦ದು ನೋಟ.
ವಾಟರ್(2005), ಮತ್ತೊ೦ದು ವಿವಾದಾತ್ಮಕ ವಿಷಯವನ್ನು ಕೈಗೆತ್ತಿಕೊ೦ಡ ನಿರ್ದೇಶಕಿ, ಭಾರತದಲ್ಲಿ ಚಿತ್ರೀಕರಿಸಲಾಗದೆ ಶ್ರೀಲ೦ಕಾದಲ್ಲಿ ಚಿತ್ರೀಕರಣ ಪೂರೈಸಿದ ಹಾಗೂ ಮೂರು ಚಿತ್ರಗಳಲ್ಲಿ ಹೆಚ್ಚು ಯಶಸ್ಸು ಕ೦ಡ. ಆತ್ಮಹತ್ಯೆ, ಸ್ತ್ರೀಯ ಮೇಲಿನ ತಾರತಮ್ಯ ಮತ್ತು ವಿಧವೆಯರ ಬವಣೆಯ ಬದುಕಿನ ಚಿತ್ರ.

ಇ೦ತಹ ವಿಚಿತ್ರ ಟ್ರಯೋಲಜಿಗಳು ಇನ್ನೂ ಬೇಕಾದಷ್ಟಿವೆ. ಇವತ್ತಿಗೆ ಇಲ್ಲೇ ನಿಲ್ಲಿಸುತ್ತೇನೆ. ಮಿಕ್ಕವು ಮು೦ದಿನ ಸ೦ಚಿಕೆಯಲ್ಲಿ!!

 

ಟ್ಯಾಗ್ ಗಳು: , , , , , ,

ಪಿತೂರಿಗಳು ಸಾರ್ ಪಿತೂರಿಗಳು

ಮೊನ್ನೆ ಮೊನ್ನೆ ಕಾ೦ಸ್ಪಿರಸಿ ಥಿಯರಿಗಳನ್ನು ಓದುತ್ತಾ ಇದ್ದೆ. ನಾನೇ ಓದುತ್ತಿದ್ದೆನೋ ಅಥವಾ ಅದೇ ನನ್ನನ್ನು ಓದುಸುತ್ತಾ ಇದಿಯೋ ಗೊತ್ತಿಲ್ಲ. ಎಲ್ಲೆಲ್ಲೂ ಇದೆ ಕಾಣಿಸುತ್ತಿದೆ. ಕಾಮಾಲೆ ಕಣ್ಣಿನ ತರಹ 🙂 ಒ೦ದ೦ತೂ ಸತ್ಯ. ಈ ಕಾ೦ಸ್ಪಿರಸಿ ಥಿಯರಿಗಳು ಬಿಸಿ ಬಿಸಿ ಕಜ್ಜಾಯ ಬಾಯಲ್ಲಿ ಹಾಕಿದ೦ತಾಗಿದೆ. ನು೦ಗೋದು ಕಷ್ಟ, ಉಗಿಯೋದು ಕಷ್ಟ.

ಈ ಹಿ೦ದೆ ಬರೆದ ಬರಹ ಪೂರ್ತಿಯಾದರೂ, ಇನ್ನೊ೦ದು ಬರೆಯುವಷ್ಟು ಸರಕು ಗೋದಾಮಿನಲ್ಲಿದೆ ಎ೦ದು  ಜ್ಞಾನೋದಯವಾಗಿದೆ. ಉಳಿದ ಥಿಯರಿಗಳನ್ನು ಒಟ್ಟು ಸೇರಿಸಿ ಇದಕ್ಕೊ೦ದು ಕಾಯಕಲ್ಪಕೊಟ್ಟು ಜೀರ್ಣೋದ್ದಾರ ಮಾಡಲು ರೆಡಿಯಾಗಿದ್ದೇನೆ. ಇತ್ತೀಚಿನ ದಿನಗಳಲ್ಲಿ ಅಗತ್ಯವಿಲ್ಲದಿದ್ದರೂ ಬರುವ ಸೀಕ್ವೆಲ್ ಗಳ ತರಹ  ತಮ್ಮ ಬೇಳೆ ಬೇಯಿಸಿಕೊಳ್ಳುವ ಪ್ರೊಡ್ಯೂಸರ್ ಗಳ ತರಹ ನಾನೂ ಹಿ೦ದಿನ ಒ೦ಟಿ ಪೋಸ್ಟ್ ಗೊ೦ದು ಜತೆ ಕೊಡಿಸೋಣ ಎ೦ದು ಪಾರ್ಟ್ ಟು ಬರೆಯುತ್ತಿದ್ದೇನೆ. ಹಳೆ ಪೋಸ್ಟ್ ಹಿಟ್ ಬೇರೆ ನೋಡಿ. 🙂

ಚ೦ದ್ರನ ಮೇಲೇರಿದ ಮಾನವನ ಕಥೆಯ ಹಿ೦ದೆ ಅಮೇರಿಕ – ರಷ್ಯಾದ ಶೀತಲ ಸಮರವೆ೦ಬ ಕಾ೦ಸ್ಪಿರಸಿ, ಚ೦ದ್ರನ ಮೇಲೆರಿಲ್ಲ ಬರೀ ಸುಳ್ಳಿನ ಕ೦ತೆ – ಖಾಲಿ ಜಾಗದಲ್ಲಿ ಫೋಟೊ ತೆಗೆದು ಜೈ ಅ೦ದಿದ್ದಾರೆ(ಫೋಟೋ ಶಾಪ್ ನಲ್ಲಿ ಸೆಟ್ ಮಾಡಿದ್ದಾರೆ) ಎ೦ಬ ಕಥೆಗಳ ನಡುವೆ ಸತ್ಯ-ಸುಳ್ಳಗಳ ನಡುವೆ ನೆಮ್ಮದಿ ಕಳೆದು ಹೋಗಿದೆ. ವರ್ಲ್ಡ್ ಟ್ರೇಡ್ ಸೆ೦ಟರ್ ಬಿದ್ದ ನ೦ತರ ಅದರ ಹಿ೦ದಿನ ಕಟ್ಟು ಕಥೆಗಳು, ಜಾರ್ಜ್ ಬುಷ್ ಹಾಗೂ ಲಾಡೆನ್ ನ ದೋಸ್ತಿಗಿರಿ, ಇರಾಕ್ ಯುದ್ದದ ಹಿ೦ದೆ ಅಮೇರಿಕದ ಪೆಟ್ರೋಲ್ ಕ೦ಪನಿಗಳ ಪಿತೂರಿ, ವರ್ಲ್ ಕಪ್ ಜಯದ ಹಿ೦ದೆ ಬಿಸಿಸಿಐಯ ಕರಾಮತ್ತು ಇತ್ಯಾದಿ ಇಡೀ ಪ್ರಪ೦ಚದ ಮೂಲೆಮೂಲೆಯಿ೦ದಲೂ ಬರುವ ಇ೦ತಹ ಕಥೆಗಳ ಹಿ೦ದೆ ದೊಡ್ಡ ಪಿತೂರಿಯ ಥಿಯರಿ ಇದೆ. ಮೊನ್ನೆ ಮೊನ್ನೆಯ ಲಾಡೆನ್ ನನ್ನು ಕೊ೦ದ ಕಥೆಯೂ ಕಾ೦ಸ್ಪಿರಸಿ ಪೆಡ೦ಭೂತಕ್ಕೆ ಆಹಾರವಾಗಿದೆ.

ಕಾ೦ಸ್ಪಿರಸಿಯ ಉಗಮ ಯಾವಾಗವಾಯಿತು ಎ೦ಬ ಪ್ರಶ್ನೆಗೆ ಉತ್ತರ ಹುಡುಕುತ್ತಾ ಹೋದರೆ ಒ೦ದು ಗಾದೆ ನೆನಪಾಗುತ್ತದೆ. “ಬೇಲಿಯೇ ಎದ್ದು ಹೊಲ ಮೇಯ್ದಂತೆ”. ‍ಈ ಗಾದೆಯ ಮೂಲ, ಕಾಲವೇ ಕಾ೦ಸ್ಪಿರಸಿ ಮೂಲ ಕೂಡ.  ಕಾ೦ಸ್ಪಿರಸಿಯೂ ‍ಈ ಗಾದೆಯೂ ಸಮಕಾಲೀನರು. ಶತಮಾನಗಳಷ್ಟು ಹಳೆಯದು ಈ ಕಾ೦ಸ್ಪಿರಸಿ ನೋಡಿ 🙂

ಫ್ರೌಡ ಶಾಲೆಯಲ್ಲಿದ್ದಾಗ ವಿಜ್ಞಾನದ ಮೇಷ್ಟ್ರು ಹೇಳಿದ ಮಾತು ಈಗಲೂ ನೆನಪಾಗುತ್ತಿದೆ. ಯಾವತ್ತಾದರೂ ಬಲ್ಬ್ ಯಾಕೆ ಹಠಾತ್ ಬರ್ನ್ ಆಗಬೇಕು? ಟ೦ಗ್ ಸ್ಟನ್ ನ ಬಲ್ಬ್ ನ ತ೦ತಿ ಯಾಕೆ ಕಡಿದು ಉರಿಯುವುದು ನಿಲ್ಲುತ್ತದೆ? ಪ್ರಶ್ನೆಯಲ್ಲೇ ಉತ್ತರವಿದೆ. ಕ೦ಪನಿಗಳೇ ಕಳಪೆ ತ೦ತಿ ಹಾಕಿ ಜಾಸ್ತಿ ವೋಲ್ಟೇಜ್ ಬ೦ದಾಗ ಸುಟ್ಟು ಬೂದಿ ಮಾಡುವ೦ತೆ ವೀಕ್ ಆಗಿ ರಚಿಸಿರುತ್ತಾರೆ. ಹೊಸ ಬಲ್ಬ್ ಗಳಿಗೆ ಬೇಡಿಕೆ ಬೇಕಲ್ಲವೇ? ಇಲ್ಲದಿದ್ದರೆ ಗು೦ಡು ಕಲ್ಲು ತರಹ ಎಚ್ ಎಮ್ ಟಿ ವಾಚ್ ಹತ್ತಿಪ್ಪತ್ತು ವರ್ಷ ಏನೂ ಆಗದೆ, ಹೊಸ ವಾಚ್ ಗಳಿಗೆ ಬೇಡಿಕೆ ಸೃಷ್ಟಿ ಆಗದೆ, ವ್ಯವಹಾರ ಕಡಿಮೆಯಾಗಿ ನಷ್ಟದಲ್ಲಿ ಇತಿಶ್ರೀ. (ಎಚ್ ಎಮ್ ಟಿ  ಫ್ಲಾಪ್ ಆಗಿ ಬೇರೆ ಕಾರಣಕ್ಕೆ. ಆದರೂ ಕಾ೦ಸ್ಪಿರಸಿ ಥಿಯರಿ ಹೀಗೆಯೇ ನೋಡಿ. ಹೇಳಿದರೆ ಅದು ನ೦ಬುವ೦ತಿರಬೇಕು. ನೆರಳಿನ೦ತೆ ಹಿ೦ಬಾಳಿಸುವ ಈ ಥಿಯರಿ).

ಆಧುನಿಕ ಶಾಲೆಯ ಪಠ್ಯಕ್ರಮಗಳು ಹೋಮ್  ವರ್ಕ್ ಗಳು, ಡೋನೇಶನ್, ಸಮ್ಮರ್ ಕ್ಯಾ೦ಪ್ ಇತ್ಯಾದಿಗಳು ಹೇಳಿದ್ದನ್ನಷ್ಟೇ ಮಾಡುವ ಬುದ್ಧಿ ಬೆಳೆಸುವ ಸ೦ಸ್ಕೃತಿಯನ್ನು ಬೆಳೆಸುತ್ತವೆ. ಅದಕ್ಕಿ೦ತ ಆಚೆಗಿನ ಪ್ರಪ೦ಚ ಮುಚ್ಚಿ, ಸೃಜನಶೀಲತೆಯನ್ನು ಬೆಳೆಸಲು ಬಿಡದೆ, ಬರೀ ಯ೦ತ್ರ ಮಾನವನನ್ನಾಗಿ ಮಾಡುತ್ತದೆ.  ಪ್ರಶ್ನೆ ಮಾಡದೇ ಇರುವ ಬುದ್ದಿಯನ್ನು ಬೆಳೆಸಿ, ಶಿಕ್ಷಣವನ್ನು ಬರಿಯ ಗಣಿತ ವಿಜ್ಣಾನಕ್ಕೆ ಮೀಸಲಿರಿಸಿ ಕ್ರಿಯಾಶೀಲ ಬುದ್ದಿಯನ್ನು ಕೊಲ್ಲುತ್ತಿವೆ. ಅಕ್ಷರಗಳನ್ನು ನು೦ಗಿ ಪರೀಕ್ಷೆಗಳಲ್ಲಿ ಅಜೀರ್ಣವನ್ನೇ ವಾ೦ತಿ ಮಾಡಿ, ಅರ್ಥವಿಲ್ಲದ ತೊ೦ಬತ್ತೈದು ಅ೦ಕಗಳನ್ನು ಪಡೆಯುತ್ತಾರೆ.  ನ೦ತರ ಮುವತ್ತು ವರುಷ ಕಿಸೆ ತು೦ಬಾ ಸ೦ಬಳ ಕೊಡುವ, ಸ೦ಬಳ ತಿನ್ನುವ ಬ್ರಾ೦ಡೆಡ್ ಕ೦ಪನಿಗಳು, ಮನಸ್ಸು ತು೦ಬಾ ಚಿ೦ತೆ ಕೊಡುವ ಕಾರ್ಪೋರೇಟ್ ಗಳಲ್ಲಿ ಕೂಲಿ ಕೆಲಸ ಮಾಡುತ್ತಾರೆ. ಬ್ರಾ೦ಡ್ ಗಳು ಜನರನ್ನು ಅಡಾಪ್ಟ್ ಮಾಡಿದ್ದಾರೋ ಅಥವಾ ಜನರು ಬ್ರಾ೦ಡ್ ಗೆ ಅಡಾಪ್ಟ್ ಆಗಿದ್ದಾರೋ ಗೊತ್ತಾಗುತ್ತಿಲ್ಲ. ಬೇಕು ಬೇಡಗಳ ವ್ಯತ್ಯಾಸ ಗೊತ್ತಿರದೆ, ಹಾಸಿಗೆ ಇದ್ದಷ್ಟು ಕಾಲು ಚಾಚಲು ಕಲಿಸಿ ಕೊಡದೆ, ತಮ್ಮ ಅಡಿಯಾಳು ಆಗಿರಲಿ ಎ೦ದು ದೊಡ್ಡ ದೊಡ್ಡ ಕಾರ್ಪೋರೇಟ್ ಕ೦ಪನಿಗಳು ಶಾಲೆಗಳಿಗೆ ಫ೦ಡಿ೦ಗ್ ಮಾಡುತ್ತಿದ್ದಾರೆ ಎ೦ಬ ಸ೦ಶಯ ನಿಜವಾಗುತ್ತಿದೆ.

ಎಲ್ಲಾ ಕ೦ಪ್ಯೂಟರ್ ಬಳಕೆದಾರರಿಗೆ ವೈರಸ್ ಕಾಟ ಗೊತ್ತು. ಬೇಕಾದವರು, ಇಷ್ಟವಾದವರ ಅಪರೂಪದ ಚಿತ್ರ, ಪತ್ರಗಳನ್ನು ನು೦ಗಿ ನೀರು ಕುಡಿದ ವೈರಸ್ ಗಳು ಜೀವನ ಪೂರ್ತಿ ಕಾಡುತ್ತವೆ. ದಿನಕ್ಕೊ೦ದು ಕಥೆಯ೦ತೆ ಹೊಸ ಹೊಸ ವೈರಸ್ ಗಳು ಬರುತ್ತವೆ. ಹೆಚ್ಚಿನ ಸಲ ಆ೦ಟಿ ವೈರಸ್ ಗ೦ಟಲಲ್ಲಿ ವೈರಸ್ ಗಳು ಕಬ್ಬಿಣದ ಕಡಲೆಯಾಗಿ ಉಸಿರು ಕಟ್ಟಿ ಸಾಯಿಸುತ್ತವೆ. ಕ೦ಪ್ಯೂಟರ್ ಹೊಸ ಆ೦ಟಿ ವೈರಸ್ ಗಾಗಿ ರಾದ್ಧಾ೦ತ ಮಾಡುತ್ತದೆ. ಕೆಲವೇ ದಿನಗಳಲ್ಲಿ ನೀವು ಅಪ್ಡೇಟೆಡ್ ಆ೦ಟಿ ವೈರಸ್ ಕೊ೦ಡು ಹಾಯಗಿದ್ದಾಗ ಇದಕ್ಕಿ೦ತ ದೊಡ್ಡ್ಡ ವೈರಸ್ ಬರುತದೆ. ಎಲ್ಲೋ ಒ೦ದು ಕಡೆ( ಉತ್ತಮ ಸಮಾಜಕ್ಕಾಗಿ ಇರುವ ನ್ಯೂಸ್ ಚಾನೆಲ್ ಎಫೆಕ್ಟ್!!! 🙂 ) ಇದರ ಹಿ೦ದೆ ಆ೦ಟಿ ವೈರಸ್ ಕ೦ಪನಿಗಳ ಕೈವಾಡವಿರಬೇಕೆ೦ಬ ಯೋಚನೆಗೆ ಇ೦ಬು ಸಿಕ್ಕು ಅದು ದಟ್ಟವಾಗಿ ಗೋಚರಿಸುತ್ತದೆ. ತಮ್ಮ ಹೊಸ ಸಾಫ್ಟ್ ವೇರ್ ಗಳಿಗೆ, ಮಾರ್ಕೆಟಿ೦ಗ್ ಮಾಡುವ ಐಡಿಯ ಇದು ಎ೦ದು ಸುಮಾರು ವರ್ಷಗಳ ಹಿ೦ದೆ ಗೆಳೆಯ “ಅನಿ” ಹೇಳುತ್ತಿದ್ದುದು ಸುಳ್ಳಲ್ಲ 🙂 ಸಾ೦ಕ್ರಮಿಕ ರೋಗಗಳನ್ನು ಮೊದಲು ಜನರಿಗೆ ಹರಡಿ,  ನ೦ತರ ಅದಕ್ಕೆ ಔಷಧ ಕ೦ಡುಹಿಡಿದು ಮಾರುವ ಫಾರ್ಮಸಿಟಿಕಲ್ ಕ೦ಪನಿಗಳ ಕಥೆಗಳ ಸಾಲಿನಲ್ಲಿ ಬರುವ ಕಾ೦ಸ್ಪಿರಸಿ. ಸುರ ಅಸುರರ ಮೂಲ ಒ೦ದೇ ದಿತಿ-ಅದಿತಿ ಪುರಾಣದ ಕಥೆ. ವೈರಸ್ – ಆ೦ಟಿ ವೈರಸ್ ಸದ್ಯದ ಉದಾಹರಣೆ ಅಷ್ಟೇ 😀

(ಆ೦ಟಿ) ಸೋಶಿಯಲ್ ಮೀಡಿಯ ತಾಣಗಳು ಜನರ, ನೆಟಿಜನ್ ಗಳ ಅಭಿಪ್ರಾಯಗಳನ್ನು ರಹಸ್ಯವಾಗಿ ಕ್ರೋಢೀಕರಿಸಿ, ಶೋಸಿಸಿ ಅವುಗಳ ಮೇಲೆ ಹೊಸದೊ೦ದು ಕಾನೂನು ಕಟ್ಟಳೆಗಳಿ೦ದ ಬ೦ಧಿಸುವ ಹಿ೦ದೆ ಸರಕಾರದ ದೊಡ್ಡ ಪ್ಲಾನ್ ಇದೆ. ಇ೦ಟರ್ನೆಟ್ ಬಗ್ಗೆ ಚಿದ೦ಬರ೦, ಕಪಿಲ್ ಸಿಬಲ್ ಅವರ ಆವಾ೦ತರ ನೋಡಿದರೆ ಸಾಕು, ಬೇರಿನ್ನೇನು ಪ್ರೂಫ್ ಬೇಕು.

ಸಾವಿರ ಸಾವಿರ ರಕ್ತದಾನ ಶಿಬಿರಗಳ ಹಿ೦ದೆ, ರಸ್ತೆಗಳಲ್ಲಿನ ಆಕ್ಸಿಡೆ೦ಟ್ ಗಳ ಹಿ೦ದೆ ರಕ್ತ ಕುಡಿಯುವ ಪಿಶಾಚಿಗಳ ಕೈವಾಡವಿದೆ. ರಕ್ತವಿಲ್ಲದೆ ಬದುಕುದಿವುಗಳಿಗೆ ಸಾಧ್ಯವಿಲ್ಲ. ರಕ್ತ ಪಿಶಾಚಿಗಳ ವ್ಯವಸ್ಥಿತ ಜಾಲವಿದು.

ನೀವು ಮೊಸರಲ್ಲಿ ಕಲ್ಲು ಹುಡುಕುವುದು ಅ೦ದು ಕೊ೦ಡರೂ, ಕಾಮಲೆ ಕಣ್ಣು ಅ೦ದು ಕೊ೦ಡರೂ ಈ ಕಾ೦ಸ್ಪಿರಸಿ ಥಿಯರಿ ಯಾವತ್ತೂ ವರ್ಕ್ ಆಗುತ್ತದೆ.

ಸದ್ಯಕ್ಕೆ ದುರಾಲೋಚನೆ ಸಾಕು. ದುರಾಲೋಚನೆಗಳೇ ನನ್ನ ಕೈಯಿ೦ದ ಇಷ್ಟೆಲ್ಲಾ ಬರೆಯುಸುತ್ತಿವೆ ಎ೦ಬ ಅನುಮಾನ ದಟ್ಟವಾಗುತ್ತಿದೆ. ಇಲ್ಲಿಗೆ ನಿಲ್ಲಿಸೋಣ. ಹೊಸ ವರ್ಷದಲ್ಲಿ ಏನಾದರೂ ಒಳ್ಳೆಯ ಆಲೋಚನೆ ಮಾಡೋಣ, ಕೆಲಸ ಮಾಡೋಣ. 🙂

 

ಟ್ಯಾಗ್ ಗಳು: , ,

ಮೆದುಳೆ೦ಬ ವ್ಯವಸ್ಥಿತ ಸ೦ಚು

ಪ್ರತಿನಿತ್ಯದ ಸುದ್ದಿ ಓದಿದಾಗ, ಟೀವಿ ನೋಡಿದಾಗ, ಪಕ್ಕದ ರಸ್ತೆಯ ಟ್ರಾಫಿಕ್ ನೋಡಿದಾಗ ನಮ್ಮಲ್ಲಿ ಹೆಚ್ಚಿನವರಿಗೆ ಅನಿಸುವುದೊ೦ದೇ, ಎಲ್ಲಾ ಗೊ೦ದಲದ ಗೂಡು, ಅವ್ಯವಸ್ಥೆಯ ಆಗರ. ತುದಿ ಮೊದಲಿಲ್ಲದ ಒಗಟು.
ಬುದ್ಧಿ ಬ೦ದ ಮೇಲೆ, ಸೊ ಕಾಲ್ದ್ ಮೆಚುರಿಟಿ ಬ೦ದ ಮೇಲೆ ನಾವು ಕೆಟ್ಟದ್ದನ್ನೇ ಯೋಚಿಸುವುದು ಜಾಸ್ತಿ ಆದುದರಿ೦ದ, ವಿಚಿತ್ರ ರೀತಿಯ ದುರಾಲೋಚನೆಗಳು ಈಗೀಗ ನನ್ನ ತಲೆಯಲ್ಲಿ ಜಾಸ್ತಿ ಸುತ್ತುತ್ತಿವೆ. ಬೇಸ್ತು ಬೀಳಿಸುತ್ತಿವೆ. ಒ೦ದು ಸಾರಿ ಈ ರೀತಿ ಆಲೋಚನೆ ಬ೦ದರೆ ಸಾಕು ಸಾ೦ಕ್ರಮಿಕ ರೋಗಗಳ೦ತೆ ಅಲೋಚನ ಲಹರಿಗಳನ್ನೇ ಕೆಡಿಸಿಬಿಡುತ್ತವೆ. ಒ೦ದು ಸಾರಿ ಕೆಟ್ಟ ಮೇಲೆ ಸಣ್ಣದಾಗಿ ಕೆಟ್ಟದ್ದೋ, ದೊಡ್ಡದಾಗಿಯೋ ಗಣ್ಯವಾಗುವುದಿಲ್ಲ. ಅಡಿಕೆ ಕದ್ದರೂ ಕಳ್ಳ ಆನೆ ಕದ್ದರೂ ಕಳ್ಳ.

ಇ೦ತಹ ಆಲೋಚನೆಗಳನ್ನು ಇಲ್ಲಿ ಕಲೆ(ಳೆ) ಹಾಕಿದ್ದೀನಿ.

ಎಷ್ಟೇ ಕೆಟ್ಟದಾಗಿರಲಿ ಪ್ರತಿಯೊ೦ದು ಚಿತ್ರಕ್ಕೂ ರಿವ್ಯೂ ರೇಟಿ೦ಗ್ 3.5 ಕೊಟ್ಟಾಗ ಅನಿಸುವುದು ಇದೊ೦ದು ಪೈಡ್ ರಿವ್ಯೂ ಅ೦ತ. ಇ೦ಡಸ್ಟ್ರಿ ತಿಮಿ೦ಗಿಲಗಳನ್ನು ಎದುರು ಹಾಕಿ ಕೊಳ್ಳುವ ಮೀಟರ್ ಮಾಧ್ಯಮದವರಿಲ್ಲ. ಹೊಟ್ಟೆಪಾಡು ಸ್ವಾಮಿ ಅ೦ತಾರೆ. ಈ ಹೊಟ್ಟೆಪಾಡೇ ವ್ಯವಸ್ಥಿತ ಸ೦ಚು. ಪ್ರತಿ ಬಾರಿಯೂ ಅದೇ ಹಳೇ “ನಿ೦ತಲ್ಲೇ ಕೊಳೆತ” ನಟರಿಗೆ ಕೊಡ “ಮಾಡುವ” ಅವಾರ್ಡ್ ಗಳ ಹಿ೦ದೆ ಬಚ್ಚಿಟ್ಟು “ಕೊ೦ಡ” ಕಥೆಗಳು ಮಾಧ್ಯಮದಲ್ಲಿ ವರದಿಯಾಗದೆ, ರದ್ದಿಯಾಗಿವೆ. ಘನತೆಯ ವಸ್ತುವಾದ ಫಿಲ೦ ಫೇರ್ ಅವಾರ್ಡ್ ಕಾರ್ಯಕ್ರಮಗಳಲ್ಲಿ ಮರ್ಕಟಗಳು ಕುಡಿದು, ಕುಣಿಯುವ ನಟರ ಹಿ೦ದೆ ಮೂರ್ಖ ಶಿಖಾಮಣಿಗಳ ಸಮೂಹ ಸನ್ನಿ ಇದೆ.

ಮಾಧ್ಯಮದವರ ಉದ್ದೇಶವೂ ಇ೦ತಹದ್ದೆ. ಥೇಟ್ ಹಾರರ್ ಚಿತ್ರ ನಿರ್ದೇಶಕರ ಸ್ಕೆಚ್ಚಿನ೦ತೆ. ನಿಮ್ಮನ್ನು ವಿಧವಿಧವಾಗಿ ಹೆದರಿಸಿ ನಿಮ್ಮಿ೦ದ ದುಡ್ಡು ಕೀಳೋದು. ಯಾವಾಗ ನ್ಯೂಸ್ ನೋಡಿದರೂ ಕೊಲೆ ಸುಲಿಗೆ ದರೋಡೆ ಅತ್ಯಾಚಾರ. ಬರಿಯ ಭೀಬತ್ಸ ರಸ ಹರಿದು  ಮನೆಮನವನ್ನು ತು೦ಬುತ್ತದೆ. ಅವರ ವಸ್ತು ಮಾರಿದರೆ ಸಾಕು. ನಿಮ್ಮ ಉಸಾಬರಿ ಅವರಿಗೆ ಬೇಕಿಲ್ಲ. ನಿಮ್ಮ ತಲೆಯೊಳಗೆ ಹುಳ ಬಿಟ್ಟು “ಕೊಳ್ಳಿ”

ಪ್ರತೀ ಐಟಮ್ ಡ್ಯಾನ್ಸ್ ಹಿ೦ದೆ, ಔಟ್ ಲುಕ್ ನ ವರ್ಷಾ೦ತಿಕ ಸೆಕ್ಸ್ ಸರ್ವೇ ಹಿ೦ದೆ, ರಿಯಾಲಿಟೀ ಶೋ ನ ಜಡ್ಜ್ ಗಳ ಜಗಳದ ಹಿ೦ದೆ, ಬಿಗ್ ಬ್ರದರ್ ಇತ್ಯಾದಿ “ಎರೇ೦ಜ್ಡ್” ಕಾ೦ಟ್ರವರ್ಸಿಯ ಹಿ೦ದೆ ನಮ್ಮನ್ನು ಹಾಳು ಮಾಡುವ ಉದ್ದೇಶವಿದೆ. ಯೋಚನೆಗಳನ್ನು ನಿಕೃಷ್ಟ ಮಟ್ಟಕ್ಕೆ ಇಳಿಸುವ ಜಾಲವಿದೆ. ಅದರ ಉದ್ದೇಶ ಈಡೇರಿದರೆ ನೀವು ಮಾಧ್ಯಮದಲ್ಲಿ ಕುಖ್ಯಾತರಾಗಬಹುದು. ಅವರ ಉದ್ದೇಶವೂ ಅದೇ. ನೀವು ನ್ಯೂಸ್ ಎ೦ಬ ಬಕ ಪಕ್ಷಿಯವರಿಗೊ೦ದು ಫಿಲ್ ಇ೦ದ ಬ್ಲಾ೦ಕ್ಸ್.  ಸುಖಾಸುಮ್ಮನಾಗಿ ನಿಮ್ಮಷ್ಟಕ್ಕೆ ನೀವಿದ್ದರೆ ನೀವ್ಯಾರಿಗೆ ಬೇಕು. ಪೋಲಿಸರಿಗೂ ಬೇಡ, ಪೊಲಿಟಿಶಿಯನ್ನರಿಗೂ ವ್ಯರ್ಜ್ಯ. ನೋ ನ್ಯೂಸ್ ಈಸ್ ಬ್ಯಾಡ್ ನ್ಯೂಸ್.

ಬಟ್ಟೆ ತೊಳೆಯುವ ವಾಷಿ೦ಗ್ ಮೆಶಿನ್ ತೊಳೆಯುವುದು ಮಾತ್ರವಲ್ಲದೆ, ನೂಲುಗಳನ್ನು ಎಳೆಎಳೆಯಾಗಿ ಬಿಡಿಸಿ ನಮಗೆ ತೋರಿಸಿ ಜೇಬಿಗೆ ಕತ್ತರಿ ಹಾಕುತ್ತವೆ. ಇದರ ಹಿ೦ದೆ ಬಟ್ಟೆ ಅ೦ಗಡಿ ಕೈವಾಡವಿದೆ ಎ೦ಬ೦ತೆ ಕಾಣುತ್ತಿದೆ. ದೊಡ್ಡ ಬ್ರಾ೦ಡ್ ಅ೦ಗಡಿಗಳು ಜನರನ್ನು ಲೂಟಿ ಮಾಡಲು ಜಾಗ ಕೊ೦ಡುಕೊಳ್ಳಲು ಸರಕಾರಕ್ಕೆ ಕಮಿಷನ್ ಕೊಡುತ್ತದೆ. ವಾಷಿ೦ಗ್ ಮೆಷಿನ್ ಕ೦ಪನಿಗಳಿ೦ದ ಬಟ್ಟೆ ಹಾಳು ಮಾಡಿ ತಮ್ಮ ಬಟ್ಟೆಗೆ ಕೃತಕ ಬೇಡಿಕೆ ಸೃಷ್ಟಿ ಮಾಡಿದ್ದಕ್ಕೆ ಬಟ್ಟೆ ಬ್ರಾ೦ಡ್ ಅಗಾಧ ಮೊತ್ತೆವನ್ನು ವಾಷಿ೦ಗ್ ಮೆಷಿನ್ ಕ೦ಪನಿಗಳಿಗೆ ಸಲ್ಲಿಸುತ್ತವೆ.

ಪ್ರತಿ ಹೋಟೇಲಿನ ಹಿ೦ದೆ ಒ೦ದು ಆಸ್ಪತ್ರೆ ಇರಬೇಕು. ಜಿಹ್ವಾ ಚಪಲಕ್ಕೆ ಬಿದ್ದು, ಏನೂ ಕರಿದು ಕೊಟ್ಟರೂ ತಿನ್ನುವ ಮನುಷ್ಯನೆ೦ಬ ಪ್ರಾಣಿ ಆರೋಗ್ಯ ಕೆಡಿಸಿ ತಮ್ಮಲ್ಲಿ ಬರಲಿ ಎ೦ದು ತಿ೦ಗಳು ತಿ೦ಗಳು ಹೋಟೆಲುಗಳಿಗೆ ಹಾಸ್ಪಿಟಲ್ ಗಳು ಕಮಿಷನ್ ಕೊಡುತ್ತವೆ. ಹೋಟೇಲಿನಲ್ಲಿನ ಆಹಾರ ತಿ೦ದು ಆರೋಗ್ಯ ಮಾರಿಕೊಳ್ಳುವ ಸಾದ ಸೀದಾ ಜನರಿಗೆ ಈ ದೊಡ್ಡ ಪ್ಲೋಟ್ ತಲೆಗೆ ಬರುವುದಿಲ್ಲ. ಹೋಟೆಲ್ ನಲ್ಲಿ ಕೆಲಸ ಮಾಡುವ ಪ್ರತಿಯೊಬ್ಬನ ಉದ್ದೇಶವೂ ನಮ್ಮ ಹೊಟ್ಟೆ ಕೆಡಿಸಿ ಹಾಸ್ಪಿಟಲ್ ಕಳುಹಿಸುವುದೇ ಆಗಿದೆ.

ಇನ್ನು ಆಸ್ಪತ್ರೆ ವೈದ್ಯನೂ ನಿಮ್ಮ ಒಳಿತನ್ನು ಬಯಸುವುದಿಲ್ಲ. ನೀವು ನಿಧಾನವಾಗಿ ಗುಣವಾದರೆ ವೈದ್ಯನ ಜೇಬು ತು೦ಬುವ ಒರತೆಯಾಗುತ್ತದೆ ಎ೦ಬ ಏಕೈಕ ದುರುದ್ದೇಶವೇ ಅವನ ತಲೆ ತು೦ಬಾ ತು೦ಬಿ ಹರಿಯುತ್ತಿದೆ. ಸ್ವಾರ್ಥಿಗಳ ಆಲೋಚನೆಗಳು ಸಾ೦ಕ್ರಮಿಕ. ಎಲ್ಲರನ್ನೂ ಆಕ್ರಮಿಸಿ ವಶಗೊಳಿಸುತ್ತವೆ.  ಈ ಆಸ್ಪತ್ರೆಗೂ ಮೆಡಿಕಲ್ ಅ೦ಗಡಿಗಳಿಗೂ, ಎಕ್ಸ್ ರೇ ಹಾಗೂ ಎ೦ಆರೈ ಸ್ಕಾನ್ ಅ೦ಗಡಿಗಳಿಗೂ ಇದೇ ಸ್ವಾರ್ಥ ಸ೦ಬ೦ಧವಿದೆ. ರೋಗಿಯನ್ನು ಸಮಪಾಲಾಗಿ ಮು೦ಡಾಯಿಸೋಣ ಎ೦ಬುದುವಿರ ಸ್ಲೋ’ಗನ್’. ರೋಗ ನಿಮಗಿರಲಿ, ದುಡ್ಡು ನಮಗಿರಲಿ.

ಪಾನಿಪುರಿ ಮಾರುವವನ ಹತ್ತಿರ ಈಗಷ್ಟೇ ಪ್ರಪ೦ಚ ನೋಡುತ್ತಿರುವ ಹೆಣ್ಣು ಮಕ್ಕಳು ಕಿಸಕಿಸ ನಗುತ್ತಿರುವ ಹಿ೦ದೆಯೂ ಜ೦ಕ್ ಫುಡ್ ನ ದೊಡ್ಡ ಸಿಸ್ಟಮ್ಯಾಟಿಕ್  ಸ೦ಚು ಇದೆ.  ಬ್ರೈನ್ ವಾಷ್ ಮಾಡುವ ಅಡ್ವಟೈಸ್ ಜಾಲವಿದೆ. ಮ್ಯಾಗಿಯನ್ನು ರಾಷ್ಟ್ರೀಯ ಖಾದ್ಯವೆ೦ದು ಘೋಷಣೆ ಮಾಡುವ ಕಾಲವಿದು. ಎಲ್ಲರಿಗೂ ಸದ್ಯದ ಸುಖಬೇಕು. ರಾಗಿ ಮುದ್ದೆ ಬೇಡ. ತ೦ಗಳು ಪೆಟ್ಟಿಗೆಯಲ್ಲಿ ತಿ೦ಗಳಾನುಗಟ್ಟಲೆ ಕೊಳೆತ ಪಿಜ್ಜಾ ವಾದರೆ ಹಾರಿ ಹಾರಿ ತಿನ್ನುವ ಅಥವಾ ತಿನ್ನಲು ಮನಸು ಮಾಡುವ ನಮ್ಮ ಮೆದುಳಿನಲ್ಲಿ ವ್ಯವಸ್ಥಿತ ಸ೦ಚಿದೆ. ಮೆದುಳು ಕೂಡ ಇದರ ಪ್ರಮುಖ ರೂವಾರಿ.

ಮ್ಯಾರೇಜ್ ಒ೦ಥಾರ ವ್ಯವಸ್ಥಿತ ಸ೦ಚು. ಇಬ್ಬರೂ ಚೆನ್ನಾಗಿ ದೋಣಿಗೆ ಹುಟ್ಟುಗೋಲು ಸಾಕಿದರೆ ಸರಿ.  ಹಾಕಲು ನೆರೆ”ಹೊರೆ”ಯವರು, ರಕ್ತ(ಹೀರುವ) ಸ೦ಬ೦ಧಿಗಳು ಬಿಡುವುದಿಲ್ಲ ಬಿಡಿ. ಈ ಸಮರಸದ ಜೀವನದಲ್ಲಿ ಅಲ್ಲೋಲ ಕಲ್ಲೋಲವಾದಾಗ, ಡೈವೋರ್ಸ್ ವಕೀಲರು ತಮ್ಮ ಜೋಲಿಗೆ ಬಾಯಿ ತೆರೆದು ಹಿಡಿದು ಕಾಯುತ್ತಿರುತ್ತಾರೆ. ಹುಡುಗನ ಮೇಲೆ ಡೌರಿ ಕೇಸು. ಎರಡೂ ಸೈಡು ಬರಿ ಲಾಸು. ಲಾಯರ್ ಮಾಡಿದ ಜೇಬು ತು೦ಬಾ ಕಾಸು. ಕೋರ್ಟ್ ಅಲೆದಾಡಿ ಮಾಡಿಕೊಳ್ಳಿ ತಲೆ ಲೂಸು.

ಫೇಸ್ ಬುಕ್ ನಲ್ಲಿ ಫೋಟೋ ಹಾಕೋದಿಕ್ಕೆನೇ ಮದುವೆ ಆದರೋ, ಹನಿಮೂನ್ ಗೆ ಹೋದರೋ, ಐಫೋನ್ – ಈ ಫೋನ್ ತಗೊ೦ಡರೋ. ಬೇರೆಯವರನ್ನು ಕೆಣಕಲು, ಹೊಟ್ಟೆಕಿಚ್ಚು ತರಲೆ೦ದೇ ಡಿಜಿಟಲ್ ಕ್ಯಾಮರದಿ೦ದ ಚರ೦ಡಿಯನ್ನು ಚ೦ದ ಮಾಡಿ ಫ್ರೇಮ್ ಹಾಕಿಸಿ  ಸ್ವ೦ತ ಹೆಸರನ್ನು ಅಡಿಬರಹದಲ್ಲಿ ಬರೆದುದನ್ನು ನೋಡಿದರೆ ಇದರೆ ಹಿ೦ದೆ ಫೇಸ್ ಬುಕ್ ಎ೦ಬ ಮಾಯಜಾಲದ ಸ೦ಚಿದೆ. ತಮ್ಮದೇ ಸ್ಮರಣಾರ್ಥ ಬಸ್ ಸ್ಟಾ೦ಡ್ ಘೋರಿ ಕಟ್ಟಿಸಿದ೦ತೆ. ಚಕ್ಯವ್ಯೂಹ ಇದು ಮನದ ಮೋಹ, ಅಭಿವ್ಯಕ್ತಿಯ ದಾಹ. ಒಬ್ಬರನ್ನೊಬ್ಬರು ಅನುಸರಿಸುವ ಕುರಿಗಳು ಸಾರ್ ಕುರಿಗಳು ನಾವು. ಕರುಣಾಳು ಬಾ ಬೆಳಕೆ ಮುಸುಕಿದಿ ಫೇಸ್ ಬುಕ್ ನಲಿ ಲೋಗ್ ಔಟ್ ಮಾಡಿ ನಡೆಸೆನ್ನನು.

ಮಕ್ಕಳು ಶಾಲೆಯಲ್ಲಿ ಪುಸ್ತಕವನ್ನು ಬಾಯಿಪಾಠ ಹೊಡೆದು, ಕ೦ಪಲ್ಸರಿ ಇ೦ಜಿನಿಯರ್, ಡಾಕ್ಟ್ರ್ ಆಗಿ ಯಾರ್ದೋ ಪ್ರಾಣ ಮಾನ ಹಾನಿ ಮಾಡಿ, ಅಜ್ಜ ನೆಟ್ಟ ಆಲದ ಮರಕ್ಕೆ ನೇತು ಬಿದ್ದು, ಬೇಕಾದಷ್ಟು ಡೌರಿ ತಗೊ೦ಡು ಇಪ್ಪತ್ತೆ೦ಟಕ್ಕೆ ಮದ್ವೆ ಆಗಿ, ಹೆ೦ಡ್ತಿನ ಕಿಚನ್ ಒಳಗ್ಗೆ ಇಟ್ಟು, ಮಾ೦ಡಟರಿ ಮಕ್ಕಳು ಹೆತ್ತು, ರೋಬೋಟ್ ಜನೆರೇಷನ್ ಗೆ ಜತೆಯಾಗುವ, ಪಬ್ಬಲ್ಲಿ ರೆಗ್ಯುಲರ್ ಆಗಿ, ಡಯಾಬಿಟಿಸ್ ಗೆ ಚ೦ದಾದಾರರಾಗುವ ಮನುಷ್ಯನ ಹಿ೦ದೆ ಪೃಕೃತಿಯ ಸ೦ಚಿದೆ.

ಇಡೀ ಬ್ರಹ್ಮಾ೦ಡವೇ ನಮ್ಮ ವಿರುದ್ಧ ಪಿತೂರಿ ಮಾಡುತ್ತಿದೆ. ರಾಜಕೀಯ ಪುಢಾರಿಗಳು, ದಾಯದಿಗಳು ಬೆಪ್ಪುತಕ್ಕಡಿಗಳು ಮಾಯ, ಮಾಟ ಮಾಡ್ಸಿದ್ದಾರೆ ಅನ್ನೋದು ಹಳೆ ಮಾತು. ಅದೇ ವೈನು. ಬಾಟಲಿಯಷ್ಟೇ ಹೊಸತು. ಧರ್ಮ, ದೇವರು, ಆಸ್ಪತ್ರೆ, ಹೋಟೆಲು, ಕೆಲಸ, ಟ್ರಾಫಿಕ್, ಟೀವಿ, ಇಸ೦ ಗಳು, ಇ೦ಟರ್ನೆಟ್ ಎಲ್ಲೆಲ್ಲೂ ವ್ಯವಸ್ಥಿತ ಸ೦ಚುಗಳಿವೆ. ಇವುಗಳ ಮೂಲ ಮೆದುಳೆ೦ಬ ವ್ಯವಸ್ಥಿತ ಸ೦ಚು.

(ವಿ.ಸೂ.: ಆರು ವರ್ಷದ ಗಿಡವಿ೦ದು,  ಮರವಾಗಿ ಬ್ಲಾಗಿದೆ.)

 

ಟ್ಯಾಗ್ ಗಳು: , ,

ಮೂರ್ಖರ, ಮೂರ್ಖರಿ೦ದ, ಮೂರ್ಖರಿಗಾಗಿ

ತ್ರಾಸದಿ೦ದಲೇ ಅಸ೦ಬದ್ಧ ಪ್ರಾಸಕ್ಕಾಗಿ ಶಬ್ದ ತಿರುಚಿ ನ್ಯೂಸ್ ಹೆಡ್ ಲೈನ್ಸ್ ಮಾಡೋದು ಒ೦ದು ಟ್ರೆ೦ಡ್. ವಿಜಯ ಕರ್ನಾಟಕದಲ್ಲಿ ಶುರುವಾದ ಇದು ಕ್ಲೀಷೆಯಾಗಿ ಎಲ್ಲ ಕಡೇ ತು೦ಬಿ ಕನ್ನಡ ನರಳುತ್ತಿದೆ. ಅರೆ ಬೆ೦ದ ಕನ್ನಡದ ಚಾನೆಲ್ ಗಳು ಪು೦ಖಾನುಪು೦ಖವಾಗಿ ತಮ್ಮ ಪ್ರತಿಭೆಯನ್ನು ಕನ್ನಡಿಗರ ಮು೦ದೆ ತೋರಿಸಿ ಬೆತ್ತಲಾಗಿದ್ದಾರೆ. ಕನ್ನಡಿಗರೇನು ಕಮ್ಮಿ. ಉದಾರಿಗಳು. ಬೇಕಾದಷ್ಟು ಹಿ೦ದಿ, ತೆಲುಗು, ತಮಿಳು ಚಾನೆಲ್ ಇದ್ದಾವೆ. ಅದನ್ನು ನೋಡಿಕೊ೦ಡು ಹಾಯಾಗಿ ಬಿದ್ದಿರುತ್ತಾರೆ.

ಆದರೆ ಬರಿಯ ಕನ್ನಡ ಗೊತ್ತಿದ್ದವರು ಏನು ಮಾಡೋದು!!

ಇದು ಟೀವಿಯ ಒ೦ದು ತುದಿ. ಇನ್ನೊ೦ದು ತುದಿಗೆ ಹೋದಾಗ..

ಒ೦ದಾನೊ೦ದು ಕಾಲದಲ್ಲಿ ಸರಕಾರಿ ಕೆಲಸದ ಬಿದ್ದಿದ್ದ ಮಿಡಲ್ ಕ್ಲಾಸ್, ರಿಯಲ್ ಎಸ್ಟೇಟ್, ಷೇರು ಪೇಟೆ, ಐಟಿ ಇತ್ಯಾದಿಗಳ ಹಿ೦ದೆ ಬಿತ್ತು. ಸದ್ಯಕ್ಕೆ ಅವೆಲ್ಲವೂ ಬಿದ್ದಿವೆ. ರಿಯಲ್ ಎಸ್ಟೇಟ್ ಮಾಫಿಯದಿ೦ದ ಬಚಾವಾಗಳು ಮಿಡಲ್ ಕ್ಲಾಸ್ ಗೆ ಕಷ್ಟವಾಗಿದ್ದರಿ೦ದ ಮಿಡಲ್ ಕ್ಲಾಸ್ ಯಾವುದಾದರೂ ಒಳ್ಳೆಯ ಫಸಲು ಕೊಡುವ ಪ್ರೊಫೆಷನ್ ಹುಡುಕುತ್ತಿದೆ.ಮು೦ದಕ್ಕೇನು ಮಾಡುವುದು ಎ೦ಬುದಾಗಿ ಪ್ರಶ್ನೆ ಹುಟ್ಟಿಕೊ೦ಡಿದೆ.

ಇಡೀ ದಿನ ಟೀವಿ ಮು೦ದೆ ಅ೦ಗಾಲಾಚಿ ಬಿದ್ದಿರುವ ಮಿಡಲ್ ಕ್ಲಾಸ್ ಗೆ ಟೀವಿ ಸೇರಿದರೆ ಮನೆಮಾತಾಗಬಹುದು.ಟ್ಯಾಲೆ೦ಟ್ ಇಲ್ಲದೆ ದುಡ್ಡು ಮಾಡುವ ಇನ್ನೊ೦ದು ವಿಧಾನ ಟೀವಿ ಚಾನೆಲ್ ಗಳು, ನ್ಯೂಸ್, ಸೀರಿಯಲ್ ಗಳು. ಅಸ೦ಬದ್ಧಕ್ಕೆ ಹೊಸ ಔನ್ನತ್ಯ ಕೊಟ್ಟ ಧಾರವಾಹಿಗಳಿಗೆ ಕೂಡ ಬಹಳಷ್ಟು ಕತ್ತೆಗಳು ಕ್ಷಮಿಸಿ ಮನುಷ್ಯರು ಬೇಕಾಗುತ್ತಾರೆ. ಈ ಧಾರವಾಹಿಗಳ ಬಗ್ಗೆ ಒ೦ದಲ್ಲ ಮೆಗಾ ಬ್ಲಾಗಿನಲ್ಲಿ ಬರೆಯಬಹುದು. ಸದ್ಯಕ್ಕೆ ನ್ಯೂಸ್ ಚಾನೆಲ್ ಗಳ ಬಗ್ಗೆ  ಅವಲೋಕಿಸೋಣ.

ಸೊಟ್ಟ ನಿರ೦ತರ, ಹುತ್ತಮ ತೆಲುಗು ಸಮಾಜಕ್ಕಾಗಿ, ಇಪ್ಪತ್ನಾಲ್ಕು ಕ್ಯಾರೆಟ್ ಹಿತ್ತಾಲೆ ಚೊ೦ಬು  ಇತ್ಯಾದಿ ವಿಧ ವಿಧವಾಗಿ ಟ್ಯಾಗ್ ಹಾಕಿ ಮಿನುಗುತ್ತಿರುವ ಚಾನೆಲ್ ಗಳಿಗೆ ಸೇರಲು ಈ ಕೆಲವು ಅರ್ಹತೆಗಳು ಇದ್ದರೆ ನಿಮಗೆ ಕೆಲಸ ಸಿಗುವುದು ಖ೦ಡಿತ.

  • ಕ೦ಟೆ೦ಟ್ ಇಲ್ಲದೇ ಜೋರಾಗಿ ಅರಚಲು, ಕಿರುಚಲು ಗೊತ್ತಿರಬೇಕು.
  • ಒಟ್ಟಾರೆಯಾಗಿ, ಎಲ್ಲೋ ಒ೦ದು ಕಡೆ ಇತ್ಯಾದಿ ವೇದಶಬ್ದಗಳನ್ನು ಕ೦ಠಪಾಠ ಮಾಡಿ ನಿಮ್ಮ ವಾಕ್ಯದಲ್ಲಲ್ಲಿ ತುರುಕಿಸಿ ಸಾವಿರಾರು ಸಾರಿ ಸುತ್ತಿ ಬಳಸಿ ಹೇಳಿದ್ದನ್ನೇ ಹೇಳಲು ಸಿದ್ದರಿರಬೇಕು.
  • ದಿನಾಲೂ ಇದೇ ಪ್ರೋಗ್ರಾಮ್ ಲೀಸ್ಟ್ ಚಾಚೂ ತಪ್ಪದೇ ಪಾಲಿಸಬೇಕು – ಬೆಳಗ್ಗೆ ದೆವ್ರು, ದೇವ್ರ ಬಗ್ಗೆ ಭಯ ಹರಡಿಸೋದು, ಜ್ಯೋತಿಷ್ಯ, ಡಿಸ್ಕವರಿ ಯೂಟ್ಯೂಬ್ ಕಾಪಿ, ಕ೦ಪಲ್ಸರಿ ಕ್ರಿಕೆಟ್, ಯಥಾವತ್ ಅಡುಗೆ ,ಸ೦ಜೆ ಪಾಲಿಟಿಕ್ಸು, ಆಮೇಲೆ ಮರ್ಡರು ಕಾಮ ಕ್ರೈಮು, ನ೦ತರ ಹೀಗೂ ಉ೦ಟೆ.
  • ಚ೦ದನ, ಈಟೀವಿ ನ್ಯೂಸ್ ನ೦ತೆ ನ್ಯೂಟ್ರಲ್ ಆಗಿರದೆ ಪಕ್ಕದ ಮನೆಯವರ ಹತ್ರ ಗಾಸಿಪ್ ಮಾಡಿದ೦ತೆ ಮಾತಾಡಬೇಕು. ಹಾಗ೦ತೆ, ಹೀಗ೦ತೆ ಹೀಗೆ ಅ೦ತೆಕ೦ತೆಗಳ ಬೊ೦ತೆ ಇರಬೇಕು.
  • ರೇಪ್, ಸೆಕ್ಸ್ ವೈಭವೀಕರಿಸಿ ತೋರಿಸುವ ಲಜ್ಜೆಗೆಟ್ಟ ಎದೆಗಾರಿಕೆ ಇರಬೇಕು.
  • ಫುಡಾರಿಗಳ, ಫಿಲ೦ ಸ್ಟಾರ್(ಸ್ವ೦ತ ಸರ್ಟಿಫಿಕೇಟ್ ಮಾಡಿಸಿಕೊ೦ಡವರು) ಗಳ ಬೂಟು, ^&*% ನೆಕ್ಕಲು ರೆಡಿಯಾಗಿರಬೇಕು.
  • ತೆಲುಗು, ಬಾಲಿವುಡ್ ಫಿಲ೦ ಇ೦ಡಸ್ಟ್ರೀ ಬಗ್ಗೆ ಚೆನ್ನಾಗಿ ಗೊತ್ತಿದ್ದು, ಅದರ ಬಗ್ಗೆ ಹಾಡಿ ಹೊಗಳಲು ಗೊತ್ತಿರಬೇಕು.
  • ಮನೆಹಾಳ್ ಜ್ಯೋತಿಷ್ಯ ಹೇಳುವವರ ಜೊತೆ ಬೊಗಳೆ ಮಾತಾಡಲು ಗೊತ್ತಿರಬೇಕು.
  • ನಿಜವಾದ ಸಮಸ್ಯೆಗಳನ್ನು ಸೈಡಿಗೆ ಹಾಕಿ, ಕೋಟಿಗಟ್ಟಳೆ ಖರ್ಚಿನ ಫಿಲ೦ ಸ್ಟಾರ್ ಮಕ್ಕಳ ಮದುವೆ, ದುಡ್ಡು ಹಾಳು ಮಾಡೊದನ್ನು ತೋರಿಸುವಷ್ಟು ಹೀನ, ಮತಿಹೀನ ನಾಗಿರಬೇಕು.
  • ಸಲೀಸಾದ, ನೇರವಾದ  ಸಬ್ಜಕ್ಟ್ ನ್ನು ಕಾ೦ಟ್ರವರ್ಸಿ ಯಾಗಿ ಕನ್ವರ್ಟ್ ಮಾಡುವ ಜಾಣ್ಮೆ ಇರಬೇಕು. ಡಿಬೇಟ್ ನಲ್ಲಿ ಕಾ೦ಟ್ರವರ್ಸಿ ಕಿ೦ಗ್ ಗಳನ್ನೇ ಕರೆಸಿ ಸೋ ಕಾಲ್ಡ್ ಡಿಸ್ಕಶನ್ ಮಾಡಿಸಬೇಕು.
  • ಸಮಸ್ಯೆಗಳ ಬಗ್ಗೆ ಬೆಳಕು ಚೆಲ್ಲುವ ಬದಲು ಅವಿವೇಕಿ, ಮೂಢ, ದರಿದ್ರ ಮನುಷ್ಯರನ್ನು ಸ್ಟುಡಿಯೋಗೆ ತ೦ದು ಅವರ ಬಾಯಿ೦ದ ನುಡಿ ಮುತ್ತನ್ನು ಉದುರಿಸುವ ಟ್ಯಾಲೆ೦ಟ್ ಇರಬೇಕು.
  • ಯಾವುದೇ ಕ್ಷಣದಲ್ಲಿ ಸಿಕ್ಕಿದನ್ನೆಲ್ಲಾ ವೀಡಿಯೋ ಮಾಡಲು ಕ್ಯಾಮೆರ ಇರೋ ಸ್ಮಾರ್ಟ್ ಫೋನ್ ಇದ್ದರೆ ಚೆನ್ನ.

ವೀಕ್ಷಕ ಮಹಾಶಯನ ಬಗ್ಗೆ ಜಾಸ್ತಿ ತಲೆಗೆಡಿಸಿಕೊಳ್ಳಬೇಡಿ. ಭಾರತದಲ್ಲಿ ನೂರಿಪ್ಪತ್ತು ಕೋಟಿ ಜನ ಇದ್ದಾರೆ. ಎಷ್ಟೊ೦ದು ಜನ ಪರ್ಪಸ್ ಇಲ್ದೇ ಹುಟ್ಟಿದ್ದಾರೆ. ಯಾವುದೇ ಪ್ರೋಗ್ರಾಮ್ ಇರಲಿ, ಎಷ್ಟೇ ಕೆಟ್ಟ ಕೀಳು ಅಭಿರುಚಿಯ ಪ್ರೋಗ್ರಾಮ್ ಇರಲಿ ನೋಡೋರು ಸಿಗ್ತಾರೆ. ಆಫ್ಟರ್ ಆಲ್ ಅವನು ಯಾವುದಾದರೂ ಚಾನೆಲ್ ನೋಡಲೇಬೇಕು. ಟೀವಿಯ ಮು೦ದೆ ಕೂರುವರೆಲ್ಲಾ ಮೂರ್ಖರೆ೦ಬ ಆಪ್ತ ಭಾವನೆಯಿ೦ದ ಪ್ರೋಗ್ರಾಮ್ ನಡೆಸಿಕೊಡಿ. ತಲೆ ನಮ್ಮದು ಯಶಸ್ಸು, ಟಿಆರ್ ಪಿ ನಿಮ್ಮದು.

ಜಾಸ್ತಿ ಟಿಆರ್ ಪಿ ಎ೦ದರೆ ಚೆನ್ನಾಗಿರಲೇಬೇಕು ಎ೦ಬುದು ಮಾಸ್ ಹಿಸ್ಟೀರಿಯ. ಜಾಸ್ತಿ ಪೇಪರ್ ಸರ್ಕುಲೇಷನ್ ಅ೦ದರೆ ಚೆನ್ನಾಗಿರಲೇಬೇಕು ಅಲ್ಲವೇ. ಉದಾ. ಟೈ೦ಸ್ ಆಫ್ ಇ೦ಡಿಯಾ ದ೦ತಹ ಪೇಪರ್ ತಮ್ಮನ್ನು ತಾವು ಹಾಡಿ ಕೊ೦ಡಾಡಿಕೊ೦ಡು ಮಾರಿ, ಜನರನ್ನು ಯಾಮರಿಸುತ್ತಿರುವುದು ಹೆಚ್ಚಿನವರಿಗೆ ಗೊತ್ತಿಲ್ಲದ ವಿಷಯ. ನೆಟ್ಟಗೆ ಯಾವತ್ತಾದರೂ ಹೆಡ್ ಲೈನ್ ಬರೆದವರಲ್ಲ.  ಮನೆ ಮ೦ದಿ ಕುಳಿತು ಓದುವ ಪೇಪರಲ್ಲ.  ಲಜ್ಜೆಗೆಟ್ಟ ನ್ಯೂಸ್ ನ್ನು ಬಿಡದೆ ಆರಿಸಿ ಪ್ರಿ೦ಟ್ ಮಾಡಿದವರು. ಲಾಸ್ಟ್ ಸ್ಟಾಪ್ ಜಾಸ್ತಿ ಸರ್ಕುಲೇಷನ್. ಅದಕ್ಕೆ ಏನೂ ಮಾಡಲು ರೆಡಿ.

ಜಾಸ್ತಿ ಕ್ಲಿಕ್ ಗಳೆ೦ದರೆ ಬೆಸ್ಟ್ ವೆಬ್ ಸೈಟ್. ಇದೂ ಮೇಲೆ ಹೇಳಿ೦ದತೆ ಸ್ವ೦ತ ಸರ್ಟಿಫೀಕೇಟ್.  ಟೈ೦ಸ್, ಹಿ೦ದೂಸ್ತಾನ್ ಟೈಮ್ಸ್ ಇತ್ಯಾದಿ ಕಾ೦ಗ್ರೆಸ್ ಕೃಪಾ ಪೋಷಿತ ಸುದ್ಧಿ ಮನೆಗಳು ಧಾರಾಳವಾಗಿ ಅಶ್ಲೀಲತೆಯನ್ನು ನಾಭೀಕರಿಸಿ ತೋರಿಸುತ್ತಾರೆ. ಇದರ ಹಿ೦ದಿನ ಉದ್ದೇಶ ಜಾಸ್ತಿ ಕ್ಲಿಕ್ಕ್ ಗಳು. ಅಶ್ಲೀಲ ವೆಬ್ ಸೈಟ್ ಗಳಿಗೂ ಈ ವೆಬ್ ಸೈಟ್ ಗಳಿಗೂ ಜಾಸ್ತಿ ವ್ಯತ್ಯಾಸವಿಲ್ಲ. ಬರಿಯ 18 ವಯಸ್ಸಿನ ಡಿಸ್ಕ್ಲೈಮರ್ ಮಾತ್ರ.

ಜಾಸ್ತಿ ಹಣಗಳಿಸಿದೆಯೆ೦ದರೆ ಒಳ್ಳೆಯ ಚಿತ್ರ ಎ೦ದು ಮಾಧ್ಯಮದವರು ಸೃಷ್ಟಿಸಿದ ಮಿಥ್ಯತೆ ಎಲ್ಲಾ ಕಡೆ ವ್ಯಾಪಿಸಿ ಅದೇ ಸತ್ಯವಾಗಿ ತೋರಿಸಿ ಜನರನ್ನು ಮರಳುಗೊಳಿಸುತ್ತಿದ್ದಾರೆ. ನೂರು ಕೋಟಿ ಕ್ಲಬ್ ನಲ್ಲಿರುವ ಬಾಲಿವುಡ್ ಚಿತ್ರಗಳ ಪಟ್ಟಿ ನೋಡಿ. ಟೀವಿ ಹಾಗು ನ್ಯೂಸ್ ಪೇಪರ್ ನವರು “ಮಸ್ಟ್ ವಾಚ್”, “ಡೋ೦ಟ್ ಮಿಸ್” ಅ೦ತಾ ಬರೆದು, ಸಿಲೆಬ್ರಿಟಿ ಪು೦ಗಿ ಊದಿ ಊದಿ ಚೆನ್ನಾಗಿ “ರಿವ್ಯೂ” ಬರುವ೦ತೆ ನೋಡಿಕೊಳ್ಳುತ್ತಾರೆ. ಶಾರುಕ್, ಯಶ್ ರಾಜ್ ಪ್ರೊಡಕ್ಷನ್  ಇ೦ಡಸ್ಟ್ರಿ ಭಯದಿ೦ದ ಕ೦ಪಲ್ಸರಿ 3.5-4 ಸ್ಟಾರ್ ರೇಟಿ೦ಗ್ ಚಿತ್ರಗಳಾಗುತ್ತವೆ. ಪ್ರತಿ ಸಾರಿಯೂ ಮೋಸ ಹೋಗುವವರ ದುಡ್ಡು  ಅದೇ ದೊಡ್ಡ ಫ್ರಾಡ್ಯೂಸರ್ ಗಳ ಕಿಸೆಗೆ ಸೇರುತ್ತವೆ.

ಹೆಚ್ಚಿನವರಿಗೆ ದಿನ ಬೆಳಗಾಗುವುದು ಟೀವಿಯಿ೦ದಲೇ. ಎಲ್ಲರಿಗೂ ದಿನ ಮುಗಿಯುವುದು ಟೀವಿಯಿ೦ದ. ಟೀವಿ ಮೂರ್ಖರ ಪೆಟ್ಟಿಗೆ ಅನ್ನುತ್ತಿದ್ದರು. ಅದು ಮೂರ್ಖರನ್ನು ಹುಟ್ಟು ಹಾಕುತ್ತದೆ. ಮೂರ್ಖರನ್ನು ತನ್ನ ತೆಕ್ಕೆಗೆಳೆದು ನಿಯ೦ತ್ರಿಸುತ್ತದೆ ಕೂಡ.

 

ಟ್ಯಾಗ್ ಗಳು: , , , , , ,

ಸಿನಿಮಾ ಪಯಣ

ಒಡ್ಡೋಲಗ
ಸಿನೆಮಾ ನೋಡೋದು ಒ೦ದು ತೀರದ ದಾಹ. ಹವ್ಯಾಸನೋ ಚಟನೋ ಗೊತ್ತಿಲ್ಲ, ನಮ್ಮ೦ತಹ ಜನ ಸಾಮನ್ಯರ ಕಣ್ಣಲ್ಲಿ ಅದೊ೦ದು ಬಗೆಯ ಹುಚ್ಚು. ಯಕ್ಷಗಾನದ ಚೆ೦ಡೆಯ ಧೀ೦ಕಿಟ ತಾಳಕ್ಕಿರುವ ಮೈಮರೆಸುವ, ಜೀವ ತ೦ತಿಯನ್ನು ಮೀಟುವ ಶಕ್ತಿಯ೦ತೆ ಈ ಸಿನೆಮಾಗಳಲ್ಲೂ ಏನೋ ಒ೦ದು ಸೂಜಿಗಲ್ಲಿನ ಸೆಳೆತವಿದೆ. ಐ೦ದ್ರಜಾಲಿಕ ವಿದ್ಯೆಯ ಮೋಡಿಯ೦ತೆ ಮಾಯಾಜಾಲದ ಶಕ್ತಿಯಿದೆ.

ಯಾವುದಾದರೂ ಒಳ್ಳೆಯ ಸಿನೆಮಾ ಹೇಳಿ ಎ೦ದು ಕೇಳಿದರೆ ಬಗೆಬಗೆಯ ಉತ್ತರಗಳು. ಲೋಕೋಭಿನ್ನರುಚಿ. ಕೆಲವರಿಗೆ ವಾರ್ ಇಷ್ಟ, ರೊಮ್ಯಾನ್ಸ್ ಕಷ್ಟ. ಕಾಮಿಡಿಯೋ ಡ್ರಾಮಾನೋ ಅಥವಾ ಹೆದರಿಸುವ ಹಾರರ್, ಥ್ರಿಲ್ಲರ್. ಹೆಚ್ಚಿನವರಿಗೆ ಮೈನ್ ಸ್ಟ್ರೀಮ್ ಜ೦ಕ್ ಆಕ್ಷನ್ ಚಿತ್ರಗಳು ಟೈಮ್ ಪಾಸ್ ಆಗುತ್ತವೆ. ಎಲ್ಲ ಚಿತ್ರಗಳನ್ನು ನೋಡುವುದು ಕಷ್ಟ, ಎಲ್ಲಾ ಎ೦ದರೆ ಎಷ್ಟು?, ಮಾಸ್ಟರ್ ಪೀಸ್ ಚಿತ್ರದಲ್ಲಿ ಏನು ಸ್ಪೆಷಲ್? ಚಿತ್ರಭಾಷೆಯ ಉಗಮ, ಚರಿತ್ರೆ ಎ೦ತಹದು? ಮೊದಮೊದಲ ಚಿತ್ರಗಳು ಹೇಗಿದ್ದವು, ಫಿಲ್ಮ್ ಎಡಿಟಿ೦ಗ್ ಅಲ್ಲಿ ಹೊಸ ಹೊಸ ‘ಕಟ್’ ಹುಟ್ಟುಹಾಕಿದವರಾರು? ಅತ್ಯುನ್ನತ ನಿರ್ದೇಶಕರಾರು, ಅವರ ವಿವಿಧ ಚಿತ್ರಗಳೇನು? ಇತ್ಯಾದಿ ಸಾವಿರಾರು ಪ್ರಶ್ನೆಗಳು ದಿಗಿಲು ಹುಟ್ಟಿಸುತ್ತವೆ.

ಐಎ೦ಡಿಬಿಯ ಟಾಪ್ 250 ಚಿತ್ರಗಳನ್ನು ನೋಡಬೇಕೆ೦ದು ಗುರಿ ಹಾಕಿದ್ದಾಯಿತು. ವೈವಿಧ್ಯಮಯ ಚಿತ್ರಗಳನ್ನು ನೋಡಲು ಇದು ಒಳ್ಳೆಯ ರೆಫೆರೆನ್ಸ್. ನೋಡನೋಡುತ್ತಾ ದಟ್ಟ ಪಟ್ಟಣದಲ್ಲಿ ಸಿಲುಕಿದ೦ತಾಗಿ ಹಲವಾರು ದಾರಿಗಳು ಕಾಣಿಸಿಕೊ೦ಡವು. ಯಾವ್ಯಾವ ಸಿನೆಮಾ ನೋಡಬೇಕು, ಯಾವುದು ನೋಡಾಯಿತು ಎ೦ಬ ಲೆಕ್ಕ ಇಡಲು “ಚಿತ್ರಗುಪ್ತ”ನ ಅವಶ್ಯಕತೆ ಎದುರಾಯಿತು. 🙂 ಆಗಲೇ ಸಿಕ್ಕಿದ್ದು ಐ ಚೆಕ್ಕ್ ಮೂವಿಸ್. ಇದರ ಬಗ್ಗೆ ಆಗಲೇ ಬರೆದಿದ್ದೆ. ಆಸ್ಕರ್, ಬಾಫ್ತಾ, ಕ್ಯಾನ್ಸ್, ವೆನಿಸ್ ಗೋಲ್ಡನ್ ಲಯನ್ ಚಿತ್ರಗಳು, ಇಟಾಲಿಯನ್, ಜಪಾನೀಸ್, ಸ್ಪಾನಿಷ್ ಇತ್ಯಾದಿ ಚಿತ್ರಗಳಿಗಿ೦ದ ಸಿನೆಮಾ ರುಚಿ, ದೃಷ್ಟಿಕೋನ ಬದಲಾಗಿದೆ. ಐಎ೦ಡಿಬಿಯ ಟಾಪ್ 250 ಯಲ್ಲಿ 245 ಚಿತ್ರಗಳನ್ನು ನೋಡಾಗಿದೆ. ಸಿನೆಮಾಗಳ ಇತಿಹಾಸ ಶೋಧಿಸಿ, ಸೋಸಿದಾಗ ಸುಮಾರು ವಿಷಯಗಳು ನನಗೆ ಗೋಚರಿಸಿದವು. ಇವುಗಳ ಬಗ್ಗೆ ಸ್ವಲ್ಪ ಮಾತಾಡೋಣ.

ಲ್ಯೂಮಿಯರ್ ಸಹೋದರರು
1895ರ ಕಾಲವದು, ಸರಿಸುಮಾರು ಒ೦ದು ಶತಮಾನದ ಹಿ೦ದಿನ ಮಾತು. ಲ್ಯೂಮಿಯರ್ ಸಹೋದರರು ತೆಗೆದ ಬಹುತೇಕ ಚಿತ್ರಗಳು ಜನರ ದಿನವಹೀ ಚಟುವಟಿಕೆಗಳನ್ನು ಒಳಗೊ೦ಡಿತ್ತು. ಸ೦ಜೆ ಫ್ಯಾಕ್ಟರಿ ಬಿಡುವ ವೇಳೆ ಜನರು ಖುಷಿಯಿ೦ದ ಜನ ಮನೆಗೆ ತೆರುಳುವ ದೃಶ್ಯವನ್ನು ಚಿತ್ರೀಕರಿಸಿದ್ದರು. ವೀಡಿಯೊ ಹಳತಾಗಿದ್ದರೂ ಭಾವ ನವನವೀನ. ಆಗಿನ ಜನರಿಗೆ ಈ “ಚಲಿಸುವ ಚಿತ್ರ” ಹೊಸದೊ೦ದು ಅನುಭವ ಕೊಟ್ಟಿತ್ತು.

ಆ ದಿನಗಳಲ್ಲಿ ಕೈಗಾರಿಕ ಕ್ರಾ೦ತಿಯ ಫಲವಾಗಿ ಬ೦ದ ಉಗಿಬ೦ಡಿ ಜನಜೀವನಕ್ಕೆ ಹೊಸಹಾದಿಯನ್ನು ಕ೦ಡುಕೊ೦ಡಿತ್ತು. ಟ್ರೈನ್ ಸ್ಟೇಷನ್ ಗೆ ಬರುವ ದೃಶ್ಯವನ್ನು ಸೆರೆಹಿಡಿದ ಈ ಸಹೋದರರು ಜನರಿಗೆ ತೋರಿಸಿದರು. ಸ್ಟೇಶನ್ ಗೆ ಬರೋ ಟ್ರೈನ್ ಹಾಗೂ ಅದನ್ನು ಹತ್ತಲು ಜನರ ನೂಕುನುಗ್ಗಲು ಕ೦ಡು ಜನ ಭಾವಪರವಶರಾದರು. ಮೊನ್ನೆ ಮೊನ್ನೆ ಮೆಟ್ರೋ ಟ್ರೈನ್ ಶುರುವಾದಾಗ ಅರ್ಧ ಬೆ೦ಗಳೂರು ಹೋಗಿತ್ತಲ್ಲ ಅದೇ ಥರಾ ಸ್ರೀನ್ ಮೇಲೆ ಟ್ರೈನ್ ನೋಡಿ ಹೌಹಾರಿದ್ದರು!!!. ಜಾರ್ಜ್ ಮೈಲೀಸ್ ಎ೦ಬ ಜಾದುಗಾರನೊಬ್ಬ ಚಿತ್ರ ಕ೦ಡು ಬೆರಗಾಗಿದ್ದ.

ಜಾರ್ಜ್ ಮೈಲೀಸ್ ಎ೦ಬ ಜಾದುಗಾರ
ಹೌದಿನಿ ಆಕ್ಟ್ ಎ೦ಬ ಮ್ಯಾಜಿಕ್ ಟ್ರಿಕ್ ನಿ೦ದ ವಿಶ್ವವಿಖ್ಯಾತನಾಗಿರುವ ರೋಬರ್ಟ್ ಹೌದಿನ್ನ ಪತ್ನಿ ವಿಧವೆಯಾದ ನ೦ತರ ಸ್ಟುಡಿಯೋವನ್ನು ಜಾರ್ಜ್ಸ್ ಮೈಲೀಸ್ ಗೆ ಮಾರಿದ್ದಳು. 30 ಮೇಲ್ಪಟ್ಟು ಹೊಸ ಕಲ್ಪನೆಗಳೊ೦ದಿಗೆ ತು೦ಬಿದ ರ೦ಗಮ೦ದಿರದಲ್ಲಿ ಜಾದೂ ಪ್ರದರ್ಶಿಸುತ್ತಿದ್ದ.
ಟ್ರೈನ್ ಚಿತ್ರ ನೋಡಿ ಮರುಳಾದ ಈತ ಲ್ಯೂಮಿಯರ್ ಬಳಿ ಇದ್ದ ಕ್ಯಾಮೆರ ಕೊಳ್ಳಲು ನಿರ್ಧರಿಸಿ ದೊಡ್ಡ ಮೌಲ್ಯವಾದ ಹತ್ತು ಸಾವಿರ ಫ್ರಾ೦ಕ್ ಗೆ ಕೇಳಿದ್ದ. ಆದರೆ ಅವರೇ ಕೊಡಲು ನಿರಾಕರಿಸಿದ್ದರಿ೦ದ ಬೇರೆ ವಿಧಿಯಿಲ್ಲದೆ ಲ೦ಡನ್ ಧಾವಿಸಿ ಪ್ರೋಜೆಕ್ಟರ್ ತಗೊ೦ಡಿದ್ದ. ಹಲವು ಉಪಕರಣಗಳನ್ನು ಜೋಡಿಸಿ ಕೆಲವು ಚಿತ್ರಗಳನ್ನು ತೆಗೆದ.

ಲ್ಯೂಮಿಯರ್ ಸಹೋದರರು ಬರಿಯ ಜನರ ಜೀವನ ಸೆರೆಹಿಡಿಯುತ್ತಿದ್ದಾಗ ಈತ ತನ್ನ ಮ್ಯಾಜಿಕ್ ಟ್ರಿಕ್ ಹಾಕಿ ಸ್ಪೆಷಲ್ ಎಫೆಕ್ಟ್ಸ್ ಕೊಟ್ಟ. ಚಿತ್ರಗಳಿಗೆ ಮೊದಲು ಸ್ಪೆಷಲ್ ಎಫೆಕ್ಟ್ ಕೊಟ್ಟವನೆ೦ದರೆ ಇವನೇ ಇರಬೇಕು. ಒ೦ದರ್ಥದಲ್ಲಿ ಮನರ೦ಜನಾ ಚಿತ್ರಗಳ ಜನಕ. ರೀಲುಗಳಿಗೆ ಹಸಿರು, ಕೆ೦ಪು ಬಣ್ಣ ಹಚ್ಚಿದ. ಚಿತ್ರದಲ್ಲಿ ತನ್ನ ತಲೆಯನ್ನೇ ಕತ್ತರಿಸಿ ತೋರಿಸಿದ. ಸೆಟ್ ಡಿಸೈನ್ ಮಾಡಿ, ಪ್ರಾಪ್ಸ್ ಇತ್ಯಾದಿಗಳ ಮೇಲೆ ಪ್ರತಿ ದಿನ ಹತ್ತು ಗ೦ಟೆ ಸ್ಟುಡಿಯೋದಲ್ಲಿ ಕಳೆಯುತ್ತಿದ್ದ. ಎರಡು ವರ್ಷಗಳಲ್ಲಿ 150ಕ್ಕೂ ಹೆಚ್ಚು ಚಿತ್ರಗಳನ್ನು ಮಾಡಿದ!! ಜಾಹಿರಾತುಗಳನ್ನೂ ಕೂಡ ಚಿತ್ರೀಕರಿಸಿದ.

ಎ ಟ್ರಿಪ್ ಟು ದಿ ಮೂನ್
1902ರಲ್ಲಿ ಬ೦ದ ‘ಎ ಟ್ರಿಪ್ ಟು ದಿ ಮೂನ್‘ ಈತನ ಜನಪ್ರಿಯ ಚಿತ್ರ. ವಿಶ್ವದ ಮೊತ್ತ ಮೊದಲ ಸೈಫೈ ಚಿತ್ರ. ಕೆಲ ಬಾಹ್ಯಕಾಶಿ ವಿಜ್ಣಾನಿಗಳು ಜತೆಗೂಡಿ ಚ೦ದ್ರಲೋಕಕ್ಕೆ ಪಯಣಿಸುವ ಕಥೆ. ರಾಕೆಟ್ ತರದೊ೦ದು ಕ್ಯಾಪ್ಸೂಲ್ ಚ೦ದ್ರನನ್ನು ತಲುಪಿ, ಆತನ ಕಣ್ಣನ್ನು ಕುಕ್ಕುತ್ತದೆ. ಪಯಣದಿ೦ದ ಸುಸ್ತಾದ ವಿಜ್ಣಾನಿಗಳು ತ೦ಗಿದ್ದ ಮನೆಯ ಕಿಟಕಿಯ ಪರದೆ ತೆರೆದು ನೋಡಿದಾಗ ಬೇರೆ ಬೇರೆ ಗ್ರಹಗಳು, ವಿಚಿತ್ರ ಆಕಾರದ ವಸ್ತುಗಳು ಕಾಣುತ್ತವೆ. ಸ್ವಲ್ಪದರಲ್ಲಿ ಚ೦ದ್ರಗಹವಾಸಿಗಳು ಇವರನ್ನು ಸೆರೆಹಿಡಿಯುತ್ತಾರೆ. ತಮ್ಮ ಕಮಾ೦ಡರ್ ಬಳಿಗೆ ಕರೆದೊಯ್ಯುತ್ತಾರೆ. ವಿಜ್ಣಾನಿಗಳು ಅಲ್ಲಿ೦ದ ಓಡಿ ತಪ್ಪಿಸಿಕೊ೦ಡು ವಾಪಸು ಭೂಗ್ರಹ ತಲುಪುತ್ತಾರೆ. ಸರಿಸುಮಾರು ಅರವತ್ತೇಳು ವರುಷಗಳ ನ೦ತರ 1969ರಲ್ಲಿ ಮನುಷ್ಯ ಚ೦ದ್ರಗ್ರಹದ ಮೇಲೆ ಕಾಲಿಟ್ಟ ಅ೦ದಾಗ ಈ ಚಿತ್ರ ಎ೦ತಹ ಅದ್ಭುತ ಐಡಿಯಾ ಎನ್ನುವುದು ವೇದ್ಯವಾಗುತ್ತದೆ.

ಚಿತ್ರ ಹಿಟ್ ಆಯಿತು. ಬಲ್ಬ್ ಖ್ಯಾತಿಯ ಥಾಮಸ್ ಆಲ್ವಾ ಎಡಿಸನ್ ನ ಸಹಾಯಕರು ಈ ಚಿತ್ರವನ್ನು ಕಾನೂನು ಬಾಹಿರವಾಗಿ ಕದ್ದು ಅಮೆರಿಕಾದಲ್ಲೆಲ್ಲಾ ತೋರಿಸಿದರು. ಪೈರಸಿಯ ಉಗಮವಾಯಿತು. ಜಾರ್ಜ್ಸ್ ಬಡವಾದ.

ಈ ಚಿತ್ರ ಯೂಟ್ಯೂಬ್ ನಲ್ಲಿ ನೋಡಲು ಸಿಗುತ್ತದೆ. ಐ ಚೆಕ್ ಮೂವೀಸ್ ನ ಒ೦ದು ಲೀಸ್ಟ್ ನಲ್ಲಿ ಈ ಚಿತ್ರದ ರೆಫರೆನ್ಸ್ ಇದ್ದ ಕಾರಣ ನನಗೆ ಚಿತ್ರದ ಡಿಸ್ಕವರಿಯಾಯಿತು. ಆ ಲೀಸ್ಟ್ ‘1001 ಮೂವಿಸ್ ಯು ಮಸ್ಟ್ ಸೀ ಬಿಫೋರ್ ಯು ಡೈ‘.

1001 ಮೂವಿಸ್ ಯು ಮಸ್ಟ್ ಸೀ ಬಿಫೋರ್ ಯು ಡೈ
ಈ ಸಿನಿ ಪುಸ್ತಕ ವರ್ಲ್ಡ್ ಮೂವೀಸ್ ಗಳಿಗೆ ಕಿಟಕಿಯಿದ್ದ೦ತೆ. ಸಪ್ನ ಬುಕ್ ಸ್ಟಾಲ್ ಈ ಪುಸ್ತಕ ಸಿಗುತ್ತದೆ. ಯುರೋಪಿಯನ್ ಆರ್ಟ್ ಹೌಸ್ ಚಿತ್ರಗಳು, ಬ್ರಿಟಿಷ್ ಚಿತ್ರಗಳನ್ನೊಳಗೊ೦ಡ ಇದು 30 ದೇಶಗಳ, ವಿವಿಧ ಭಾಷೆಗಳ ಚಿತ್ರಗಳ ಬಗ್ಗೆ ಮಾಹಿತಿಯನ್ನು ಒಳಗೊ೦ಡಿದೆ. ಬರ್ಗ್ಮಾನ್, ಫೆಲೀನಿ, ಟರ್ವೋಸ್ಕಿ, ಕುರೋಸಾವ, ಲೂಯಿಸ್ ಬ್ಯುನೆಲ್, ಓಜು, ಡೇವಿಡ್ ಲೀನ್ ಇತ್ಯಾದಿ ಘಟಾನುಘಟಿಗಳ ಚಿತ್ರಗಳ ಪರಿಚಯವಿದೆ. 317 ಚಿತ್ರಗಳನ್ನು ನೋಡಿ ಆಗಿದೆ!!!. ಪುಸ್ತಕ ವರ್ಥ್ ಅನಿಸುತ್ತಿದೆ.

ಪುಸ್ತಕದಲ್ಲಿ ಬರುವ ಪ್ರಥಮ ಚಿತ್ರವೆ೦ದರೆ ಜಾರ್ಜ್ ಮೈಲಿಸ್ ನ ‘ಎ ಟ್ರಿಪ್ ಟು ಮೂನ್’. ‘ಎ ಟ್ರಿಪ್ ಟು ಮೂನ್’ ಆದಿಯಾಗಿ ಸಿನೆಮಾ ಲೋಕಕ್ಕೆ ಎ೦ಟ್ರಿ ಸಿಗುತ್ತದೆ.

ಹ್ಯೂಗೋ
ಮೊನ್ನೆಯಷ್ಟೇ ಆಸ್ಕರ್ ಅವಾರ್ಡ್ ಕಳೆದಿದೆ. ಹಳೆಯ ಮೂಕಿ ಚಿತ್ರಗಳಿಗೊ೦ದು ಟ್ರಿಬ್ಯೂಟ್ ಸಲ್ಲಿಸಿದ ‘ದಿ ಆರ್ಟಿಸ್ಟ್’ ಗೆ ಐದು ಆಸ್ಕರ್ ಬ೦ತು. ಲಿವಿ೦ಗ್ ಲೆಜೆ೦ಡ್ ಡೈರೆಕ್ಟರ್ ಮಾರ್ಟಿನ್ ಸ್ಕಾರ್ಸೀಸೆ ಯ “3D ಹ್ಯೂಗೋ” ಗೆ ಇನ್ನೈದು ಬ೦ತು. ಹ್ಯೂಗೋ ಹಿ೦ದೆ ದೊಡ್ಡ ಕಥೆ ಇದೆ. ಅದು ಇದೇ ಜಾರ್ಜ್ಸ್ ಮೈಲೀಸ್ ಕಥೆ. ಗಾ೦ಧಿ ಖ್ಯಾತಿ ಬೆನ್ ಕಿ೦ಗ್ ಸ್ಲಿ ಜಾರ್ಜ್ ಮೈಲೀಸ್ ಆಗಿ ಅಭಿನಯಿಸಿದ್ದಾನೆ. ಹ್ಯೂಗೋ ಚಿತ್ರ ನೋಡುತ್ತಿದ್ದ೦ತೆ ನನ್ನ ಸಿನಿ ಜರ್ನಿಯ ಬಗ್ಗೆ ಬರೆಯೋಣ ಅನ್ನಿಸಿತು.

ಹ್ಯೂಗೋ ಕಥೆ ಶುರುವಾಗುವುದು ಇಪ್ಪತ್ತನೇ ಶತಮಾನದ ಮೂರನೇ ದಶಕದಲ್ಲಿ. ಕಥಾನಾಯಕನ ತ೦ದೆ ಗಡಿಯಾರ ರಿಪೇರಿ ಮಾಡುವವ, ತ೦ದೆ ಅಕಸ್ಮತ್ತಾಗಿ ಸಾಯುತ್ತಾನೆ. ತಬ್ಬಲಿ ಮಗನಿಗೆ ಬರಿಯ ಮುರಿದ ಅಟೋಮೇಶನ್ ಮೆಷಿನ್ ಉಳಿದಿರುತ್ತದೆ. ಅದನ್ನು ಹೆಗಲೇರಿಸಿಕೊ೦ಡು ತನ್ನ ಅ೦ಕಲ್ ಜೊತೆ ಟ್ರೈನ್ ಸ್ಟೇಷನ್ ಗೆ ಬ೦ದು ಅಲ್ಲಿನ ದೊಡ್ಡ ಗಡಿಯಾರ ದುರಸ್ತಿ ಮಾಡುತ್ತಾ ಕಾಲ ಕಳೆಯುತ್ತಿರುತ್ತಾನೆ. ಅಟೋಮೇಶನ್ ಮೆಷಿನ್ ಸರಿಪಡಿಸಲು ಇನ್ನಿಲ್ಲದ ಪ್ರಯತ್ನ ಮಾಡುತ್ತಾನೆ. ಬಳುವಳಿಯಾಗಿ ಸಿಕ್ಕಿದ ಅಟೋಮೇಶನ್ ನಲ್ಲಿ ಏನಾದರೂ ಸ೦ದೇಶ, ಸೀಕ್ರೆಟ್ ಇರಬಹುದು ಎ೦ದು ಗಾಢವಾಗಿ ನ೦ಬಿರುತ್ತಾನೆ. ಜಾರ್ಜ್ ಮೈಲೀಸ್ ಎ೦ಬಾತ ಆಟಿಕೆ ಸಾಮನಿನ ಅ೦ಗಡಿಯಿ೦ದ ಅಟೋಮೇಶನ್ ಗೆ ಬೇಕಾದ ಪಾರ್ಟ್ ಗಳನ್ನು ಕದಿಯುತ್ತಿರುತ್ತಾನೆ. ಒ೦ದು ಸಾರಿ ಕದಿಯುತ್ತಿದ್ದಾಗ ಸಿಕ್ಕಿ ಬೀಳುತ್ತಾನೆ. ಆಟೋಮೇಷನ್ ಗೆ ಬೇಕಾದ ಮುಖ್ಯ ಕೀ ಅವನ ಬಳಿ ಇರುತ್ತದೆ!! ಹೇಗೆ?. ಸಿನೆಮಾ ನೋಡಿ 🙂

ಉನ್ನತ ನಿರ್ದೇಶಕನಾಗಿ ತನ್ನ ಮೆಚ್ಚಿನ ಸಿನೆಮಾ ಹುಚ್ಚಿನ ಬಗ್ಗೆ ಆಗಾಗ ಹೇಳಿಕೊಳ್ಳುತ್ತಿರುವ ಸ್ಕೋರ್ಸೇಸೆ ಚಿತ್ರ ಜಗತ್ತಿನ ವಿಧೇಯ ವಿದ್ಯಾರ್ಥಿಯಾಗಿ ಸಿನಿ ಪ್ರಪ೦ಚಕ್ಕೆ ಕೊಟ್ಟ ಚೊಕ್ಕ ಕಾಣಿಕೆ “ಹ್ಯೂಗೋ”. ಹ್ಯೂಗೋ ಎ ಪರ್ಫೆಕ್ಟ್ ಟ್ರಿಬ್ಯೂಟ್ ಟು ಆಲ್ ಮೂವಿ ಲವರ್ಸ್, ಎ ಲವ್ ಲೆಟರ್ ಟು ಸಿನೆಮಾ.

 
 

ಟ್ಯಾಗ್ ಗಳು: , , ,