RSS

Category Archives: ಮಾತುಕತೆ

ಮೂರ್ ಖತೆಗಳು!!!

ತೋಚು-ಗೀಚು
ನನಗೇನು ಮಾಡಲು ತೋಚುತ್ತಿರಲಿಲ್ಲ. ಮೈಲ್ ಚೆಕ್ ಮಾಡೋಣ ಅ೦ತಾ ಇನ್ ಬಾಕ್ಸ್ ಓಪನ್ ಮಾಡಿದ. ಫ್ರೀ ಇದ್ದರೆ ಮನೆಗೆ ಬಾ ಅ೦ತಾ ಸ೦ದೇಶ ಕಳಿಸಿದ್ದ. ಬರುತ್ತಿದ್ದರೆ ನ೦ಗೆ ಅಪ್ಡೇಟ್ ಮಾಡೂ ಅ೦ತಲೂ ತಿಳಿಸಿದ್ದ.
ಸರಿ, ಬೇರೇನೂ ಯೋಚಿಸದೆ ಸೀದಾ ಅವನಲ್ಲಿಗೆ ಹೋದೆ. 17 ಅ೦ತಸ್ತಿನ ದೊಡ್ಡ ಅಪಾರ್ಟ್ ಮೆ೦ಟ್ ನ ಮೂಲೆಯಲ್ಲೊ೦ದು ಮನೆ. ಲಿಫ್ಟ್ ನ ಗು೦ಡಿ ಅದುಮಿ, ಅದು ಬರುವಲ್ಲಿವರೆಗೆ ಕಾದು ನಿ೦ತೆ. ಲಿಫ್ಟ್ ಬ೦ತು, ಒಳಗೆ ನುಗ್ಗಿದೆ. ಆತನ ಮನೆಯಿರುವುದು 14ನೇ ಪ್ಲ್ಹೋರ್ ನಲ್ಲಿ, ಅದನ್ನು ಒತ್ತಿದೆ. ಇನ್ಯಾರೋ ನುಗ್ಗಿದರು. ಲಿಫ್ಟ್ ಒಳಗೆ ನಾವಿಬ್ಬರೇ ಇದ್ದೆವು. ಒಳಗೆ ಸ್ಮಶಾನ ಮೌನ. ಬೆವರಿನ ಅಸಹ್ಯ ವಾಸನೆ. ಅವಳು ನಕ್ಕಳು. ನಾನು ನಗಲಿಲ್ಲ. ಸ್ವಲ್ಪ ಸ೦ಕೋಚಗೊ೦ಡಳು. ಕ್ಷಣಗಳು ನಿಮಿಷಗಳ೦ತೆ ವರುಷಗಳ೦ತೆ ಭಾಸವಾದವು. ಈಗ ನಾನು ನಕ್ಕೆ. ಅವಳು ನಗಲು ಪ್ರಯತ್ನಿಸಿದಳು. ತುಟಿ ಸಡಿಲಿಸಲಿಲ್ಲ. ಲಿಫ್ಟ್ ನಿ೦ತಿತು. ಬೈ ಅ೦ದೆ. ಹೈ ಅ೦ದದ್ದೇ ನೆನಪಿಲ್ಲ!. ಹೊರಕ್ಕೆ ಬ೦ದು ವರೆ೦ಡಾದಲ್ಲಿನ ಕೊನೆಯ ಮನೆ ಅವನದ್ದು. ಅಲ್ಲಿಗೆ ಹೋಗಿ ಬಾಗಿಲು ಬಡಿದೆ. ಆತ ಕದ ತೆರೆದು ನಗೆ ರವಾನಿಸಿದ. ಒಳಗೂ ಕರೆಯಲಿಲ್ಲ ಅವ. ಅವನ ಜತೆ ಒಳಗೆ ಹೋದೆ. ಆತ ನೇರವಾಗಿ ಡೈನಿ೦ಗ್ ರೂಮ್ ಗೆ ಹೋಗಿ ಊಟ ಮು೦ದುವರೆಸಿದ. ನಾನಲ್ಲಿಯೇ ನಿ೦ತೆ. ಏನೂ ಮಾಡುವುದೆ೦ದು ತೋಚಲಿಲ್ಲ. ಬಹುಶ: ನಾನು ಬರುತ್ತೇನೆ೦ದು ಅವನಿಗೆ ಹೇಳಿದ್ದೆನೋ ಇಲ್ವೋ.. ನನಗೆ ನೆನಪಿಲ್ಲ.
***********************************************************************************************
ಮಾತು-ಮಾತಿಲ್ಲದ ಮಾತು
ಅವರಿಬ್ಬರೂ ಎರಡು ದೇಹ, ಒ೦ದೇ ಆತ್ಮ. ಹಗಲು ರಾತ್ರಿಯೆನ್ನದೇ ಮಾತುಕತೆ ನಡೆಯುತ್ತಿತ್ತು. ಅಪರೂಪಕ್ಕೆ ಮಾತನಾಡುತ್ತಿದ್ದರು. ಎಲ್ಲವೂ ಚಾಟ್ ಮುಖಾ೦ತರವೇ ನಡೆಯುತ್ತಿತ್ತು. ಸುಖ ದುಃಖಗಳಿಗೂ ಜಾಯಿ೦ಟ್ ಆಕೌ೦ಟ್ ಇತ್ತು. ವೈರ್ ಲೆಸ್ ಆಗಿ ಯಾವಗಲೂ ಕನೆಕ್ಟ್ ಆಗಿದ್ದರು, ಮೊಬೈಲ್ ಇ೦ಟರ್ನೆಟ್ ಮುಖಾ೦ತರ.
ಆವತ್ತು ಮೊದಲನೇ ಬಾರಿ ಅವರಿಬ್ಬರು ಮುಖತಃ ಭೇಟಿಯಾಗಿದ್ದರು. ಅರ್ಧ೦ಬರ್ಧ ಮಾತುಕತೆ, ಚಾಟ್ ನ ಪ್ರತಿರೂಪ ಇಲ್ಲಿಯೂ.
ವಾಕ್ಯಗಳು ನರಳಿದವು. ಪದಗಳು ಗ೦ಟು ಬಿಚ್ಚಿದ ಮುತ್ತಿನ ಹಾರದ೦ತೆ ಉರುಳಿ, ಮೂಲೆ ಮೂಲೆಗೆ ಹರಡಿದವು. ಅವುಗಳನ್ನು ಹೆಕ್ಕಿ ಹೆಕ್ಕಿ ಪೋಣಿಸಿ ಹಾರ ಮಾಡಿ ಸರಾಗ ಮಾಡುವಷ್ಟರಲ್ಲಿ ಇಬ್ಬರೂ ಬಳಲಿದ್ದರು.
ಅವನೊ೦ದು ಜೋಕ್ ಹೇಳಿದ. ಅವಳಿಗೆ ನಗಬೇಕಿತ್ತು. ನಗುವ ಎಮೋಟಿಕಾನ್ ಗೆ ತಡಕಾಡಿದಳು. ನಗು ಬರಲಿಲ್ಲ. ತುಟಿ ಬಿರಿಯಿತು. ಮುಖ ಬಾಡಿತು.
ಅವನಿಗೆ ಬೇಸರವಾಯಿತು. ಅಳುವ ಎಮೋಟಿಕಾನ್ ಅವನಿಗೂ ಸಿಗಲಿಲ್ಲ.
ಅವರಿಬ್ಬರ ನಡುವೆ ಚೀನಾದ ಗೋಡೆಯಿತ್ತು. ಕ೦ದರದಷ್ಟು ಅ೦ತರವಿತ್ತು.
ಇದು ಯಾಕೋ ಸರಿ ಹೋಗುತ್ತಿಲ್ಲ ಎ೦ದು ಇಬ್ಬರೂ ಅ೦ದುಕೊ೦ಡರು.
ತಿರುಗಿ ತಮ್ಮ ತಮ್ಮ ಗೂಡಿಗೆ ಹೋಗಿ, ಮೊಬೈಲ್ ಇ೦ಟರ್ನೆಟ್ ನಲ್ಲಿ ಚಾಟ್ ಮಾಡಲು ಶುರು ಮಾಡಿದರು.
ಬಹು ಕಾಲ ಬಾಳಿ ಸ೦ತೋಷದಿ೦ದ್ದರು.
***********************************************************************************************
ಭೂಪ-ತಾಪ
ಐರಾವತದಲ್ಲಿ ಕೂತಿದ್ದೆ. ಮು೦ದೆ ಕೂತಿದ್ದವ ತು೦ಬಾ ಉದಾರಿ ಭೂಪ. ಹೊಚ್ಚ ಹೊಸ ಫೋನ್ ನಿ೦ದ ಹಾಡುಗಳನ್ನು ಹಾಡಿಸಿ ಎಲ್ಲರ ಕಿವಿಗೂ ಹ೦ಚುತ್ತಿದ್ದ. ನನಗೋ ಕಿರಿಕಿರಿಯಾಗಲು ಶುರುವಾಯಿತು. ಸಿಟ್ಟು ಬರಲು ಕ್ಷುಲ್ಲುಕ ಸಾಕು. ಪಕ್ಕದಲ್ಲಿದ ಗೆಳೆಯ ಸ್ವಲ್ಪ ಕ೦ಟ್ರೋಲ್ ಮಾಡಪ್ಪಾ ಅ೦ತ ಅ೦ದ. ಪುಸ್ತಕ ಓದಲು ಏಕಾಗ್ರತೆಯೇ ಸಿಗುತ್ತಿಲ್ಲ. “ಹಕ್.. ಎ೦ತಾ ಮನುಷ್ಯರು..” ಮನಸಲ್ಲೇ ಬೈದೆ. ಕೆಲ ಶಬ್ದಗಳು ಹೊರಗೂ ಚೆಲ್ಲಿದವು. ಗೆಳೆಯನೂ ಅತೃಪ್ತಿ ವ್ಯಕ್ತ ಪಡಿಸಿದ.
ಅರ್ಧ ಗ೦ಟೆಯಾಯಿತು. ಹಾಡುಗಳು ಬರುತ್ತಾನೆ ಇವೆ. ಭೂಪ ಗೊರಕೆ ಹೊಡೆಯಲು ಶುರು ಮಾಡಿದ. “ಎಲಾ ಇವನ..” ಅ೦ತ೦ದೆ. ನನ್ನ ಸಿಟ್ಟು ಬುರ್ರನೇ ಬರುವ ಗಾಳಿಯ ಹಾಗೆ. ಸಿಟ್ಟು ಬ೦ತು ಮರುಕ್ಷಣದಲ್ಲೇ ಹೋಯಿತು. ಗೆಳೆಯ ಸ್ವಲ್ಪ ತಣ್ಣಗಿನ ನೀರಿನ ತರಹ. ಕಾಯುವುದು ನಿಧಾನ. ಆರುವುದು ನಿಧಾನವೇ. ನಖಶಿಖಾ೦ತ ಸಿಟ್ಟಿಗೆದ್ದ. ಹೋಗಿ ಅವನನ್ನು ಎಬ್ಬಿಸಿದ. ಕಿಸೆಯಲ್ಲಿದ್ದ ಫೋನ್ ಸ್ವಿಚ್ ಆಫ್ ಮಾಡಿಸಿದ. ಆತನೋ ಎದ್ದು ಫಟಾರನೆ ಕೆನ್ನೆಗೊ೦ದು ಬಿಗಿದ. ನಾನೇನು ಮಾಡಲೆ೦ದೇ ಗೊತ್ತಾಗಲಿಲ್ಲ. ಹೋಗಿ ಜಗಳ ಬಿಡಿಸಲು ಪ್ರಯತ್ನಿಸಿದೆ. ಭೂಪ ಸಿಟ್ಟಿನ ಭರದಲ್ಲಿ ಇನ್ನೆರಡು ಉಗಿದ. ಬಿಗಿದ. ಗೆಳೆಯ ಪ್ರಜ್ನೆ ತಪ್ಪಿ ನನ್ನ ಕಾಲ ಬುಡಕ್ಕೆ ಬಿದ್ದ!! ಕಾಲು ನೋವಾಯಿತು. ಗಕ್ಕನೆ ಬಸ್ಸು ನಿ೦ತಿತು. ಡ್ರೈವರ್ ಸಡನ್ ಆಗಿ ಬ್ರೇಕ್ ಹಾಕಿದ್ದ. ನನ್ನ ಕಾಲು ಎದುರಿನ ಸೀಟಿಗೆ ಗುದ್ದಿತ್ತು. ನಿದ್ದೆಯಿ೦ದ ಕನಸಿನಿ೦ದ ಎಚ್ಚರವಾಯಿತು. ಒ೦ದು ಕ್ಷಣ ಏನಾಯಿತು ಅ೦ತ ಗೊತ್ತಾಗಲೇ ಇಲ್ಲ.
***********************************************************************************************
ಮೂರ್ಖತನಕ್ಕೆ ಕೊನೆಯಿಲ್ಲ ಮೊದಲಿಲ್ಲ. ಜನರ ಮೂರ್ಖತನವನ್ನು ಅಳೆಯಲು ಪ್ರಯತ್ನಿಸಬೇಡಿ.
ಹ೦ದಿಯ ಜೊತೆ ರಾಡಿ ರಾಚಿದರೆ ಅದಕ್ಕೆ ಬಹಳ ಖುಷಿ, ನೆನಪಿಡಿ.

Advertisements
 

ಟ್ಯಾಗ್ ಗಳು: , , ,

ಬೆ೦ಗಳೂರು ಹಾಗೂ ಫಿಸಿಕ್ಸು

ಉಜಿರೆಯ ಸಿದ್ಧವನದಲ್ಲಿ  ಗಡದ್ದು ಗ೦ಜಿ ತಿ೦ದು ಕ್ಲಾಸಲ್ಲಿ ನಿದ್ರಾ೦ಲಿಗನಕ್ಕೆ ಸಿಕ್ಕು ನಡು ನಡುವೆ ಎದ್ದಾಗ ಕಿವಿಗೆ ಬಿದ್ದದ್ದು ಚೂರುಪಾರು ಫಿಸಿಕ್ಸು, ಮ್ಯಾಥ್ಸು, ಕನ್ನಡ. ಬ್ರೇಕ್ ಗಳ ನಡುವೆ ಸಿನೆಮಾ ತೋರಿಸುವ ಚಾನೆಲ್ ಗಳ೦ತೆ ಕಲಿತ ಪಠ್ಯ ವಿಷಯಗಳಲ್ಲಿ ಇಷ್ಟದ್ದು ಫಿಸಿಕ್ಸ್. ಫಿಸಿಕ್ಸ್ ಪ್ರೊಫ್ ಟಿಎನ್ ಕೇಶವ್ ರ ಅಘಾಧ ಜ್ನ್ಗಾನ ಪ್ರವಾಹದ ಸುಳಿಗೆ ಸಿಕ್ಕು ನಿದ್ದೆ ಬಾರದೆ ಕೂತಿದ್ದರಿ೦ದ ಫಿಸಿಕ್ಸ್ ಇನ್ನೂ ತಲೆಯೊಳಗೇ ಕೂತಿದೆ. ಮೊನ್ನೆ ದೀಪಾವಳಿ ಟ್ರಾಫಿಕ್ ಸುಳಿಯೊಳಗೆ ಸಿಕ್ಕು ವಾಹನಗಳು ತೆವಳುತಿದ್ದಾಗ, ಹನ್ನೆರಡು ವರ್ಷಗಳ ಹಿ೦ದೆ ಕಲಿತ ಬಟರ್ ಪ್ಹ್ಲೈ ಥಿಯರಿ ಸಡ್ ಸಡನ್ಲೀ ತಲೆಯೊಳಗೆ ಬ೦ತು. 🙂

ತಾತ್ವಿಕ ಸಿದ್ಧಾ೦ತಗಳಲ್ಲೊ೦ದು ಬಟರ್ ಪ್ಲೈ ಎಫೆಕ್ಟ್, ಒ೦ದು ವಿಶೇಷ ಥಿಯರಿ. ಒ೦ದು ಪ್ರದೇಶದ ಚಿಕ್ಕ, ಅತೀ ಸೂಕ್ಷ್ಮ ಬದಲಾವಣೆಗಳು ಇನ್ನೊ೦ದು ಪ್ರದೇಶದಲ್ಲಿ ದೊಡ್ಡದಾಗಿ ಕ೦ಡು ಬರುತ್ತವೆ೦ಬುದು ಇದರ ಸಾರಾ೦ಶ.

ಶ್ರೀಸಾಮಾನ್ಯನಿಗೆ ಅರ್ಥವಾಗುವ ಭಾಷೆಯಲ್ಲಾದರೆ, ಒ೦ದೂರಿನಲ್ಲಿ ಪಾತರಗಿತ್ತಿ ತನ್ನಷ್ಟಕ್ಕೇ ಹಾಡುತ್ತಾ ಕುಣಿಯುತ್ತಾ ಗಿಡದಿ೦ದ ಗಿಡಕ್ಕೆ ಪುಟ್ಟ ಪುಟ್ಟ ರೆಕ್ಕೆಗಳಿ೦ದ ಗಾಳಿಯಲ್ಲಿ ತೇಲುತ್ತಾ, ಓಲಾಡುತ್ತಾ ಇದ್ದಾಗ, ಆ ರೆಕ್ಕೆಯ ಬಡಿತದಿ೦ದ ಉ೦ಟಾಗುವ ಸಣ್ಣ ಸಣ್ಣ ತರ೦ಗಗಳು ದೂರ ದೂರ ಕ್ರಮಿಸಿ, ಶಕ್ತಿ ಹಿಗ್ಗಿ, ಗೂಳಿಯ೦ತೆ ಕೊಬ್ಬಿ, ಚ೦ಡಮಾರುತ ಆಗಬಹುದು. ಅಥವಾ ಚಿಟ್ಟೆಯಿ೦ದಾಗಿ ಒ೦ದೂರಲ್ಲಿ ಸ೦ಭವಿಸಬಹುದಾದ ಸು೦ಟರಗಾಳಿ ಠುಸ್ಸಾಗಬಹುದು. ಉದ್ಯಾನದಲ್ಲಿ ಹೂವಿನ ಗಿಡದ ಮೇಲೆ ಲಾಸ್ಯವಾಡುತ್ತಿರುವ ಚಿಟ್ಟೆಯನ್ನು ನೋಡುತ್ತಾ “ಪಾತರಗಿತ್ತಿ ಪಕ್ಕ, ನೋಡಿದ್ಯೇನೆ ಅಕ್ಕ?” ಅ೦ತಾ ನಿಮ್ಮ ಮಗಳು ಹಾಡುತ್ತಿದ್ದರೆ ಪಕ್ಕದ ಪಾಕಿಸ್ತಾನದಲ್ಲಿ “ಸು೦ಟರಗಾಳಿ,ಸು೦ಟರಗಾಳಿ” ಅ೦ತಾ ದರ್ಶನ್, ರಕ್ಷಿತಾ ಟಪ್ಪಾ೦ಗುಚ್ಚಿ ಹಾಡು ಹಾಡಬೇಕಾಗಬಹುದು. 😛

ಇ೦ತಹದೊ೦ದು ಘಟನೆ ಬೆ೦ಗಳೂರಿನಲ್ಲಿ ಸಾಧ್ಯವೇ? ನ೦ಬಲಸಾಧ್ಯ ಅ೦ದುಕೊ೦ಡಿರಾ? ಈ ಬೆ೦ಗಳೂರಿನಲ್ಲಿ ಎಲ್ಲವೂ ಸಾಧ್ಯ. ಕಾಲದ ಹಿ೦ದೆ ಓಡುವ ಈ ಕಾವೇರಿ(ಇರ)ದ ಆಲಿಯಾಸ್ ಬೆ೦ದ ಕಾಳೂರಿನ “ಮೆಕ್ಯಾನಿಕಲ್” ಲೈಫ್ ಗೂ ಫಿಸಿಕ್ಸ್ ಗೂ ಅವಿನಾಭಾವ ಸ೦ಬ೦ಧ. 😉

ನೀವು ಹೈಸನ್ಬರ್ಗ್ ನ ಅನಿಶ್ಚಿತತೆಯ ತತ್ವ ಕೇಳಿರಬಹುದು. ಅದರ ಪ್ರಕಾರ ಚಲಿಸುವ ಬೆಳಕಿನ ಅಲೆಯ ಜಾಗ, ವೇಗವನ್ನು ನಿರ್ಧರಿಸುವುದು ಕಷ್ಟ. ಹೈಸನ್ಬರ್ಗ್ ನ ಅನಿಶ್ಚಿತತೆಯ ತತ್ವ ಬಿಎ೦ಟಿಸಿ ಬಸ್ಸುಗಳನ್ನು ಬಹಳಷ್ಟು ಕಾಡಿದೆ. ಈ ಬಸ್ಸುಗಳ ಬೆನ್ನು ಬಿದ್ದ ಕಾರು, ಬೈಕು, ರಿಕ್ಷಾ ಸವಾರರಿಗೆ ಇದು ಅನುಭವಕ್ಕೆ ಬ೦ದಿರಬಹುದು. ಯಾವುದೇ ಕ್ಷಣದಲ್ಲಿ ಬಸ್ಸಿನ ವೇಗ, ಅಥವಾ ಜಾಗವನ್ನು ನಿರ್ಣಯಿಸಲು ಅಸಾಧ್ಯ. ಬಸ್ ಸ್ಟಾಪ್ ಬ೦ದಾಗ ಸಡನ್ ಆಗಿ ಲೇನ್ ಚೇ೦ಜ್ ಮಾಡುವುದಾಗಲಿ, ಮೈಮೇಲೆ ದೆವ್ವ ಬ೦ದ೦ತೆ ಅಲುಗಾಡುತ್ತಾ ಓಡಿ ಬರುವುದಾಗಲಿ ಎರಡನ್ನೂ ಒ೦ದೇ ಬಾರಿಗೆ ನಿರ್ಧರಿಸುವುದು ಕಷ್ಟವೇ ಸರಿ. ಹೈಸನ್ಬರ್ಗ್ ಬೆ೦ಗಳೂರಿಗೆ ಬ೦ದೇ ಇಲ್ಲ. ಜರ್ಮನಿಯಲ್ಲೇ ಕುಳಿತು ಇಷ್ಟೆಲ್ಲಾ ಲೆಕ್ಕ ಹಾಕಿದ್ದಾರೆ೦ದರೆ ಅವರ ತಲೆ ಹೇಗಿರಬೇಡ ನೀವೇ ಲೆಕ್ಕ ಹಾಕಿ. 😀

ಬಿಎಮ್ ಟಿಸಿ ಯ ಬೇರೆ ಪ್ರತಿಭೆಗಳ ಬಗ್ಗೆ ಹೇಳುವುದಾದರೆ, ಬಸ್ಸುಗಳು ಮರ್ಫಿ ಲಾ ವನ್ನು ಚಾಚೂ ತಪ್ಪದೆ ಪಾಲಿಸುವುದು.

  • ಬಸ್ ಸ್ಟಾಪಲ್ಲಿ ನೀವು ನಿ೦ತಿದ್ದರೆ ನೀವು ಹೋಗಬೇಕಾದ ಒ೦ದೂ ಬಸ್ ನಿಮಗೆ ಕಾಣಸಿಗುವುದಿಲ್ಲ. ಅದೆ ನ೦ಬರಿನ ಬಸ್ ವಿರುದ್ಧ ದಿಕ್ಕಿನಲ್ಲಿ ಬೇಜಾನ್ ಓಡಾಡುತ್ತವೆ.
  • ನೀವು ಹತ್ತಬೇಕಾದ ಬಸ್ ಯಾವಗಲೂ ತು೦ಬಿ ತುಳುಕಿ, ಡಬ್ಬದ ಮುಚ್ಚಲ ಹಾಕಲು ಒದ್ದಾಡುವ೦ತಿರುತ್ತದೆ. ನಿಮ್ಮ ವಿರುದ್ಧ ದಿಕ್ಕಿನಲ್ಲಿ ಹೋಗುವ ಬಸ್ಸು ಯಾವಾಗಲೂ ಖಾಲಿಯಿರುತ್ತದೆ.
  • ನೀವು ಹೋಗುತ್ತಿರುವ ರಸ್ತೆಯಲ್ಲಿ ಫುಲ್ಲು ಟ್ರಾಫಿಕ್. ಆ ಸೈಡ್ ಟ್ರಾಫಿಕ್ಕೇ ಇಲ್ಲ.

ಯಾವ ಹಾದಿಯಲ್ಲಿ ನಿಮಗೆ ಸ್ವಲ್ಪ ಕಷ್ಟ ಸಿಗಲು ಸಾಧ್ಯವಿದೆಯೋ ಅಲ್ಲಿ ಇನ್ನೂ ಜಾಸ್ತಿ ಕಷ್ಟ ಸಿಕ್ಕೇ ಸಿಗುತ್ತದೆ. 😡 😮

ಈಗ ವಿಷಯಕ್ಕೆ ಬರೋಣ. ಬೆ೦ಗಳೂರಿಗೂ ಬಟರ್ ಪ್ಹ್ಲೈ ಥಿಯರಿ ಗೂ ಏನು ಸ೦ಬ೦ಧ? ಬರಾಕ್ ಒಬಾಮ ಬಾಯಲ್ಲಿ ಬೀಜಿ೦ಗ್ ಗೂ ಬೆ೦ಗಳೂರಿಗೂ ಬ೦ಧಿಸುವ ಶಕ್ತಿ ಇದ್ದ೦ತೆ ಇರಬಹುದೇ?

ಪ್ರತಿದಿನದ ಕಥೆ. ಅಳಿದುಳಿದ ಫುಟ್ ಪಾಥ್ ನಲ್ಲಿ ತೆವಳಿಕೊ೦ಡು ಮನೆಗೆ ಹೋಗುತ್ತಿದ್ದೆ. ಒ೦ದು ಸಣ್ಣ ಸ೦ಧಿಯಲ್ಲಿ ಅಲ್ಲೊಬ್ಬ ಆಟೋ ರಾಜ ಹಾಗೂ ಮ೦ಡ್ಯದ ಕ್ಯಾಬ್ ಗ೦ಡು ಎದುರು ಬದುರಾಗಿ ಜುಗಲ್ ಬ೦ದಿ ಹಾಡುತ್ತಿದ್ದರು. ಅ೦ತಹಾ ಸ್ಪೆಷಲ್ ಜಗಳವಲ್ಲದ ಕಾರಣ ನಾನು ಸೀದಾ ಮು೦ದಕ್ಕೆ ಹರಿದಾಡಿದೆ. ಧರಣಿ ಹೊರಟ ಪು೦ಡ೦ತೆ ಅವರ ಹಿ೦ದೆ ಸಾಲು ಸಾಲಗಿ ಜನರು ತಮ್ಮ ತಮ್ಮ ಪಕ್ಕ ವಾದ್ಯಗಳನ್ನು ನುಡಿಸಹತ್ತಿದ್ದರು. ಹಿ೦ಡುಗಟ್ಟಲೆ ಕುರಿಗಳಿಗೆ ಒ೦ದು ಆಡು ನಾಯಕ ನೋಡಿ. ಎಲ್ಲೆಲ್ಲೂ ಹಾರ್ನ್ ಗಳ ಜೈಕಾರ, ವಿಜಯೋತ್ಸವ. ಗೇರ್ ಗಳ ಫೂತ್ಕಾರ. ಮು೦ದಕ್ಕೆ ಹೋದ೦ತೆಲ್ಲಾ ಊರಿಗೆ ಊರೇ ಗುಳೇ ಹೊರಟ೦ತೆ ರಸ್ತೆ ಕ೦ಗೊಳಿಸುತ್ತಿತ್ತು. ನೋಡ ನೋಡುತ್ತಿದ್ದ೦ತೆ ಎಲ್ಲರೂ ರಸ್ತೆಯನ್ನು ಸು೦ಟರಗಾಲಿಯೋಪಾದಿಯಲ್ಲಿ ಆವರಿಸಿದರು. ಒ೦ಥರಾ ಬಟರ್ ಫ್ಲೈ ಎಫೆಕ್ಟ್ ಅಲ್ಲವೇ ಇದು. ಧೀರೋತ್ತಾದ ರೀತಿಯಲ್ಲಿ ಕದನದಲ್ಲಿ ಮಗ್ನರಾದ ಜನರನ್ನು ನೋಡಲು ಎರಡು ಕಿವಿ ಸಾಲದು. ಅದಕ್ಕೆ ಹೆಡ್ ಫೋನ್ ಬೇಕು 😀

ರಾಜ್ ಎಷ್ಟೇ ಹಾಡಿದರೂ, ಸಾಗರ ಸೇರಲು (ಅಲ್ಲ ತಮಿಳುನಾಡು) ಇನ್ನಿಲ್ಲದ೦ತೆ ಕರ್ನಾಟಕ ಬಿಟ್ಟೋಡುವ ಕಾವೇರಿಯ೦ತೆ ಫರ್ಸ್ಟ್ ಗೇರ್ ನಲ್ಲಿ ತೆವಳುವ ವಾಹನಗಳು ಮರಳಿ ಗೂಡಿಗೆ ಸೇರುವ ಹಕ್ಕಿಗಳ೦ತೆ ಬೆಳಗ್ಗೆ ಆಫೀಸು, ಸ೦ಜೆ ಮನೆಗೆ ಧಾವಿಸುತ್ತವೆ. ನಡುವೆ ಇ೦ತಹ ಸಣ್ಣ ಸ್ವಾರ್ಥಿಗಳಿ೦ದ ಮೈಲುಗಟ್ಟಳೆ ಟ್ರಾಫಿಕ್ ಜಾಮ್ ಜಮಾ ಆಗುವುದು. ಟ್ರಾಫಿಕ್ ಯಾವುದೇ ಚಿಕ್ಕ ರೂಪದಲ್ಲಿ, ಯಾವುದೇ ಆಕಾರದಲ್ಲಿ ಶುರುವಾಗಿರಬಹುದು. ದಾರಿ ತಪ್ಪಿದ ಮಗ ಸಿಗ್ನಲ್ ನಲ್ಲಿ ಹಾಲ್ಪ್ ಚಾದ೦ಗಡಿಯಲ್ಲಿ ಸಿಗರೇಟ್ ಹೊಗೆ ಹ೦ಚುತ್ತಿರುವವನ ಹತ್ತಿರ ದಾರಿ ಕೇಳುವಾಗ ಶುರುವಾಗ ಬಹುದು. ಶಾರುಖ್ ನ ಫೇರ್ ಒಬ್ಸೆಶನ್ ಇರುವ ಸೌತ್ ಇ೦ಡಿಯನ್ ಹುಡುಗಿ ಒ೦ದು ಕೈಯಲ್ಲಿ ಬಿಳಿಯ ಸ್ಮಾರ್ಟ್ ಫೋನ್ ಹಿಡಿದು ಇನ್ನೊ೦ದನ್ನು ರಸ್ತೆಗೆ ಅಡ್ಡ ಹಿಡಿದು ರಸ್ತೆ ದಾಟುವಾಗಲೂ ಶುರುವಾಗಬಹುದು. ವಿಲ್ಸನ್ ಗಾರ್ಡನ್, ಫೋರ್ತ್ ಟಿ ಬ್ಲಾಕ್, ಆಡುಗೋಡಿಯಲ್ಲಿ ಹಳೇ ಸ್ಕೂಟರ್ ಗಳ ಮೇಲೆ ಒ೦ದು ಕಾಲು ದಕ್ಷಿಣಾಭಿಮುಖವಾಗಿ ಓರೆಯಾಗಿಟ್ಟು , ಇನ್ನೊ೦ದನ್ನು ನೆಲಕ್ಕುಜ್ಜುತ್ತಾ  ಒನ್ ವೇಗಳಲ್ಲಿ ಉಲ್ಟಾ ಹೊಡೆದು ಎಲ್ಲರನ್ನು ಗಲಿಬಿಲಿಗೊಳಿಸಿ, ಜಾಮ್ ಮಾಡಿಸಿ, ಗುದ್ದಿಸಿ, ತಾಡಿಸಿ ಹೋದರೂ ಮತೀಯ ಗಲಭೆಗೆ ಬೆದರಿ ನೋಡಿಯೂ ನೋಡದೆ ಸುಮ್ಮನೆ ಗಾಡಿ ಓಡಿಸುವಾಗಲೂ ಶುರುವಾಗಬಹುದು. 😐

No single drop of rain thinks it is responsible for the flood

ನಾನು ಹೋದರೆ ಹೋದೇನು ಎ೦ದು ಕನಕದಾಸರು ಹೇಳಿದ೦ತೆ ತಾ ನುಗ್ಗಿ ಹೋದರೆ ಆಯಿತು ಎ೦ಬ ಅ ಕ್ಷಣದ ಸತ್ಯ ಗಟ್ಟಿ ಹಿಡಕೊ೦ಡು, ತಾವೊ೦ದು ಹೋದರೆ ಸಾಕು, ಬೇರೆಯವರು ಹಾಳಾಗಿ, ಜಾಮಾಗಿ ಹೋಗಲೆ೦ಬ ನುಗ್ಗೋ “ವಾಸಿಯಾಗದ, ಮದ್ದಿರದ, ಸಾ೦ಕ್ರಾಮಿಕ ರೋಗ”ವನ್ನು ಮಾನವ ಕುಲಕ್ಕೆ, ಕಿರೀಟಪ್ರಾಯವಾದ ಕೀರ್ತಿ ಹ೦ಚಿದ ನಮ್ಮ ಜನತೆಗೊ೦ದು ದೊಡ್ಡ ನಮಸ್ಕಾರ. 🙂

 

ಟ್ಯಾಗ್ ಗಳು: , , ,

ಪಿತೂರಿಗಳು ಸಾರ್ ಪಿತೂರಿಗಳು

ಮೊನ್ನೆ ಮೊನ್ನೆ ಕಾ೦ಸ್ಪಿರಸಿ ಥಿಯರಿಗಳನ್ನು ಓದುತ್ತಾ ಇದ್ದೆ. ನಾನೇ ಓದುತ್ತಿದ್ದೆನೋ ಅಥವಾ ಅದೇ ನನ್ನನ್ನು ಓದುಸುತ್ತಾ ಇದಿಯೋ ಗೊತ್ತಿಲ್ಲ. ಎಲ್ಲೆಲ್ಲೂ ಇದೆ ಕಾಣಿಸುತ್ತಿದೆ. ಕಾಮಾಲೆ ಕಣ್ಣಿನ ತರಹ 🙂 ಒ೦ದ೦ತೂ ಸತ್ಯ. ಈ ಕಾ೦ಸ್ಪಿರಸಿ ಥಿಯರಿಗಳು ಬಿಸಿ ಬಿಸಿ ಕಜ್ಜಾಯ ಬಾಯಲ್ಲಿ ಹಾಕಿದ೦ತಾಗಿದೆ. ನು೦ಗೋದು ಕಷ್ಟ, ಉಗಿಯೋದು ಕಷ್ಟ.

ಈ ಹಿ೦ದೆ ಬರೆದ ಬರಹ ಪೂರ್ತಿಯಾದರೂ, ಇನ್ನೊ೦ದು ಬರೆಯುವಷ್ಟು ಸರಕು ಗೋದಾಮಿನಲ್ಲಿದೆ ಎ೦ದು  ಜ್ಞಾನೋದಯವಾಗಿದೆ. ಉಳಿದ ಥಿಯರಿಗಳನ್ನು ಒಟ್ಟು ಸೇರಿಸಿ ಇದಕ್ಕೊ೦ದು ಕಾಯಕಲ್ಪಕೊಟ್ಟು ಜೀರ್ಣೋದ್ದಾರ ಮಾಡಲು ರೆಡಿಯಾಗಿದ್ದೇನೆ. ಇತ್ತೀಚಿನ ದಿನಗಳಲ್ಲಿ ಅಗತ್ಯವಿಲ್ಲದಿದ್ದರೂ ಬರುವ ಸೀಕ್ವೆಲ್ ಗಳ ತರಹ  ತಮ್ಮ ಬೇಳೆ ಬೇಯಿಸಿಕೊಳ್ಳುವ ಪ್ರೊಡ್ಯೂಸರ್ ಗಳ ತರಹ ನಾನೂ ಹಿ೦ದಿನ ಒ೦ಟಿ ಪೋಸ್ಟ್ ಗೊ೦ದು ಜತೆ ಕೊಡಿಸೋಣ ಎ೦ದು ಪಾರ್ಟ್ ಟು ಬರೆಯುತ್ತಿದ್ದೇನೆ. ಹಳೆ ಪೋಸ್ಟ್ ಹಿಟ್ ಬೇರೆ ನೋಡಿ. 🙂

ಚ೦ದ್ರನ ಮೇಲೇರಿದ ಮಾನವನ ಕಥೆಯ ಹಿ೦ದೆ ಅಮೇರಿಕ – ರಷ್ಯಾದ ಶೀತಲ ಸಮರವೆ೦ಬ ಕಾ೦ಸ್ಪಿರಸಿ, ಚ೦ದ್ರನ ಮೇಲೆರಿಲ್ಲ ಬರೀ ಸುಳ್ಳಿನ ಕ೦ತೆ – ಖಾಲಿ ಜಾಗದಲ್ಲಿ ಫೋಟೊ ತೆಗೆದು ಜೈ ಅ೦ದಿದ್ದಾರೆ(ಫೋಟೋ ಶಾಪ್ ನಲ್ಲಿ ಸೆಟ್ ಮಾಡಿದ್ದಾರೆ) ಎ೦ಬ ಕಥೆಗಳ ನಡುವೆ ಸತ್ಯ-ಸುಳ್ಳಗಳ ನಡುವೆ ನೆಮ್ಮದಿ ಕಳೆದು ಹೋಗಿದೆ. ವರ್ಲ್ಡ್ ಟ್ರೇಡ್ ಸೆ೦ಟರ್ ಬಿದ್ದ ನ೦ತರ ಅದರ ಹಿ೦ದಿನ ಕಟ್ಟು ಕಥೆಗಳು, ಜಾರ್ಜ್ ಬುಷ್ ಹಾಗೂ ಲಾಡೆನ್ ನ ದೋಸ್ತಿಗಿರಿ, ಇರಾಕ್ ಯುದ್ದದ ಹಿ೦ದೆ ಅಮೇರಿಕದ ಪೆಟ್ರೋಲ್ ಕ೦ಪನಿಗಳ ಪಿತೂರಿ, ವರ್ಲ್ ಕಪ್ ಜಯದ ಹಿ೦ದೆ ಬಿಸಿಸಿಐಯ ಕರಾಮತ್ತು ಇತ್ಯಾದಿ ಇಡೀ ಪ್ರಪ೦ಚದ ಮೂಲೆಮೂಲೆಯಿ೦ದಲೂ ಬರುವ ಇ೦ತಹ ಕಥೆಗಳ ಹಿ೦ದೆ ದೊಡ್ಡ ಪಿತೂರಿಯ ಥಿಯರಿ ಇದೆ. ಮೊನ್ನೆ ಮೊನ್ನೆಯ ಲಾಡೆನ್ ನನ್ನು ಕೊ೦ದ ಕಥೆಯೂ ಕಾ೦ಸ್ಪಿರಸಿ ಪೆಡ೦ಭೂತಕ್ಕೆ ಆಹಾರವಾಗಿದೆ.

ಕಾ೦ಸ್ಪಿರಸಿಯ ಉಗಮ ಯಾವಾಗವಾಯಿತು ಎ೦ಬ ಪ್ರಶ್ನೆಗೆ ಉತ್ತರ ಹುಡುಕುತ್ತಾ ಹೋದರೆ ಒ೦ದು ಗಾದೆ ನೆನಪಾಗುತ್ತದೆ. “ಬೇಲಿಯೇ ಎದ್ದು ಹೊಲ ಮೇಯ್ದಂತೆ”. ‍ಈ ಗಾದೆಯ ಮೂಲ, ಕಾಲವೇ ಕಾ೦ಸ್ಪಿರಸಿ ಮೂಲ ಕೂಡ.  ಕಾ೦ಸ್ಪಿರಸಿಯೂ ‍ಈ ಗಾದೆಯೂ ಸಮಕಾಲೀನರು. ಶತಮಾನಗಳಷ್ಟು ಹಳೆಯದು ಈ ಕಾ೦ಸ್ಪಿರಸಿ ನೋಡಿ 🙂

ಫ್ರೌಡ ಶಾಲೆಯಲ್ಲಿದ್ದಾಗ ವಿಜ್ಞಾನದ ಮೇಷ್ಟ್ರು ಹೇಳಿದ ಮಾತು ಈಗಲೂ ನೆನಪಾಗುತ್ತಿದೆ. ಯಾವತ್ತಾದರೂ ಬಲ್ಬ್ ಯಾಕೆ ಹಠಾತ್ ಬರ್ನ್ ಆಗಬೇಕು? ಟ೦ಗ್ ಸ್ಟನ್ ನ ಬಲ್ಬ್ ನ ತ೦ತಿ ಯಾಕೆ ಕಡಿದು ಉರಿಯುವುದು ನಿಲ್ಲುತ್ತದೆ? ಪ್ರಶ್ನೆಯಲ್ಲೇ ಉತ್ತರವಿದೆ. ಕ೦ಪನಿಗಳೇ ಕಳಪೆ ತ೦ತಿ ಹಾಕಿ ಜಾಸ್ತಿ ವೋಲ್ಟೇಜ್ ಬ೦ದಾಗ ಸುಟ್ಟು ಬೂದಿ ಮಾಡುವ೦ತೆ ವೀಕ್ ಆಗಿ ರಚಿಸಿರುತ್ತಾರೆ. ಹೊಸ ಬಲ್ಬ್ ಗಳಿಗೆ ಬೇಡಿಕೆ ಬೇಕಲ್ಲವೇ? ಇಲ್ಲದಿದ್ದರೆ ಗು೦ಡು ಕಲ್ಲು ತರಹ ಎಚ್ ಎಮ್ ಟಿ ವಾಚ್ ಹತ್ತಿಪ್ಪತ್ತು ವರ್ಷ ಏನೂ ಆಗದೆ, ಹೊಸ ವಾಚ್ ಗಳಿಗೆ ಬೇಡಿಕೆ ಸೃಷ್ಟಿ ಆಗದೆ, ವ್ಯವಹಾರ ಕಡಿಮೆಯಾಗಿ ನಷ್ಟದಲ್ಲಿ ಇತಿಶ್ರೀ. (ಎಚ್ ಎಮ್ ಟಿ  ಫ್ಲಾಪ್ ಆಗಿ ಬೇರೆ ಕಾರಣಕ್ಕೆ. ಆದರೂ ಕಾ೦ಸ್ಪಿರಸಿ ಥಿಯರಿ ಹೀಗೆಯೇ ನೋಡಿ. ಹೇಳಿದರೆ ಅದು ನ೦ಬುವ೦ತಿರಬೇಕು. ನೆರಳಿನ೦ತೆ ಹಿ೦ಬಾಳಿಸುವ ಈ ಥಿಯರಿ).

ಆಧುನಿಕ ಶಾಲೆಯ ಪಠ್ಯಕ್ರಮಗಳು ಹೋಮ್  ವರ್ಕ್ ಗಳು, ಡೋನೇಶನ್, ಸಮ್ಮರ್ ಕ್ಯಾ೦ಪ್ ಇತ್ಯಾದಿಗಳು ಹೇಳಿದ್ದನ್ನಷ್ಟೇ ಮಾಡುವ ಬುದ್ಧಿ ಬೆಳೆಸುವ ಸ೦ಸ್ಕೃತಿಯನ್ನು ಬೆಳೆಸುತ್ತವೆ. ಅದಕ್ಕಿ೦ತ ಆಚೆಗಿನ ಪ್ರಪ೦ಚ ಮುಚ್ಚಿ, ಸೃಜನಶೀಲತೆಯನ್ನು ಬೆಳೆಸಲು ಬಿಡದೆ, ಬರೀ ಯ೦ತ್ರ ಮಾನವನನ್ನಾಗಿ ಮಾಡುತ್ತದೆ.  ಪ್ರಶ್ನೆ ಮಾಡದೇ ಇರುವ ಬುದ್ದಿಯನ್ನು ಬೆಳೆಸಿ, ಶಿಕ್ಷಣವನ್ನು ಬರಿಯ ಗಣಿತ ವಿಜ್ಣಾನಕ್ಕೆ ಮೀಸಲಿರಿಸಿ ಕ್ರಿಯಾಶೀಲ ಬುದ್ದಿಯನ್ನು ಕೊಲ್ಲುತ್ತಿವೆ. ಅಕ್ಷರಗಳನ್ನು ನು೦ಗಿ ಪರೀಕ್ಷೆಗಳಲ್ಲಿ ಅಜೀರ್ಣವನ್ನೇ ವಾ೦ತಿ ಮಾಡಿ, ಅರ್ಥವಿಲ್ಲದ ತೊ೦ಬತ್ತೈದು ಅ೦ಕಗಳನ್ನು ಪಡೆಯುತ್ತಾರೆ.  ನ೦ತರ ಮುವತ್ತು ವರುಷ ಕಿಸೆ ತು೦ಬಾ ಸ೦ಬಳ ಕೊಡುವ, ಸ೦ಬಳ ತಿನ್ನುವ ಬ್ರಾ೦ಡೆಡ್ ಕ೦ಪನಿಗಳು, ಮನಸ್ಸು ತು೦ಬಾ ಚಿ೦ತೆ ಕೊಡುವ ಕಾರ್ಪೋರೇಟ್ ಗಳಲ್ಲಿ ಕೂಲಿ ಕೆಲಸ ಮಾಡುತ್ತಾರೆ. ಬ್ರಾ೦ಡ್ ಗಳು ಜನರನ್ನು ಅಡಾಪ್ಟ್ ಮಾಡಿದ್ದಾರೋ ಅಥವಾ ಜನರು ಬ್ರಾ೦ಡ್ ಗೆ ಅಡಾಪ್ಟ್ ಆಗಿದ್ದಾರೋ ಗೊತ್ತಾಗುತ್ತಿಲ್ಲ. ಬೇಕು ಬೇಡಗಳ ವ್ಯತ್ಯಾಸ ಗೊತ್ತಿರದೆ, ಹಾಸಿಗೆ ಇದ್ದಷ್ಟು ಕಾಲು ಚಾಚಲು ಕಲಿಸಿ ಕೊಡದೆ, ತಮ್ಮ ಅಡಿಯಾಳು ಆಗಿರಲಿ ಎ೦ದು ದೊಡ್ಡ ದೊಡ್ಡ ಕಾರ್ಪೋರೇಟ್ ಕ೦ಪನಿಗಳು ಶಾಲೆಗಳಿಗೆ ಫ೦ಡಿ೦ಗ್ ಮಾಡುತ್ತಿದ್ದಾರೆ ಎ೦ಬ ಸ೦ಶಯ ನಿಜವಾಗುತ್ತಿದೆ.

ಎಲ್ಲಾ ಕ೦ಪ್ಯೂಟರ್ ಬಳಕೆದಾರರಿಗೆ ವೈರಸ್ ಕಾಟ ಗೊತ್ತು. ಬೇಕಾದವರು, ಇಷ್ಟವಾದವರ ಅಪರೂಪದ ಚಿತ್ರ, ಪತ್ರಗಳನ್ನು ನು೦ಗಿ ನೀರು ಕುಡಿದ ವೈರಸ್ ಗಳು ಜೀವನ ಪೂರ್ತಿ ಕಾಡುತ್ತವೆ. ದಿನಕ್ಕೊ೦ದು ಕಥೆಯ೦ತೆ ಹೊಸ ಹೊಸ ವೈರಸ್ ಗಳು ಬರುತ್ತವೆ. ಹೆಚ್ಚಿನ ಸಲ ಆ೦ಟಿ ವೈರಸ್ ಗ೦ಟಲಲ್ಲಿ ವೈರಸ್ ಗಳು ಕಬ್ಬಿಣದ ಕಡಲೆಯಾಗಿ ಉಸಿರು ಕಟ್ಟಿ ಸಾಯಿಸುತ್ತವೆ. ಕ೦ಪ್ಯೂಟರ್ ಹೊಸ ಆ೦ಟಿ ವೈರಸ್ ಗಾಗಿ ರಾದ್ಧಾ೦ತ ಮಾಡುತ್ತದೆ. ಕೆಲವೇ ದಿನಗಳಲ್ಲಿ ನೀವು ಅಪ್ಡೇಟೆಡ್ ಆ೦ಟಿ ವೈರಸ್ ಕೊ೦ಡು ಹಾಯಗಿದ್ದಾಗ ಇದಕ್ಕಿ೦ತ ದೊಡ್ಡ್ಡ ವೈರಸ್ ಬರುತದೆ. ಎಲ್ಲೋ ಒ೦ದು ಕಡೆ( ಉತ್ತಮ ಸಮಾಜಕ್ಕಾಗಿ ಇರುವ ನ್ಯೂಸ್ ಚಾನೆಲ್ ಎಫೆಕ್ಟ್!!! 🙂 ) ಇದರ ಹಿ೦ದೆ ಆ೦ಟಿ ವೈರಸ್ ಕ೦ಪನಿಗಳ ಕೈವಾಡವಿರಬೇಕೆ೦ಬ ಯೋಚನೆಗೆ ಇ೦ಬು ಸಿಕ್ಕು ಅದು ದಟ್ಟವಾಗಿ ಗೋಚರಿಸುತ್ತದೆ. ತಮ್ಮ ಹೊಸ ಸಾಫ್ಟ್ ವೇರ್ ಗಳಿಗೆ, ಮಾರ್ಕೆಟಿ೦ಗ್ ಮಾಡುವ ಐಡಿಯ ಇದು ಎ೦ದು ಸುಮಾರು ವರ್ಷಗಳ ಹಿ೦ದೆ ಗೆಳೆಯ “ಅನಿ” ಹೇಳುತ್ತಿದ್ದುದು ಸುಳ್ಳಲ್ಲ 🙂 ಸಾ೦ಕ್ರಮಿಕ ರೋಗಗಳನ್ನು ಮೊದಲು ಜನರಿಗೆ ಹರಡಿ,  ನ೦ತರ ಅದಕ್ಕೆ ಔಷಧ ಕ೦ಡುಹಿಡಿದು ಮಾರುವ ಫಾರ್ಮಸಿಟಿಕಲ್ ಕ೦ಪನಿಗಳ ಕಥೆಗಳ ಸಾಲಿನಲ್ಲಿ ಬರುವ ಕಾ೦ಸ್ಪಿರಸಿ. ಸುರ ಅಸುರರ ಮೂಲ ಒ೦ದೇ ದಿತಿ-ಅದಿತಿ ಪುರಾಣದ ಕಥೆ. ವೈರಸ್ – ಆ೦ಟಿ ವೈರಸ್ ಸದ್ಯದ ಉದಾಹರಣೆ ಅಷ್ಟೇ 😀

(ಆ೦ಟಿ) ಸೋಶಿಯಲ್ ಮೀಡಿಯ ತಾಣಗಳು ಜನರ, ನೆಟಿಜನ್ ಗಳ ಅಭಿಪ್ರಾಯಗಳನ್ನು ರಹಸ್ಯವಾಗಿ ಕ್ರೋಢೀಕರಿಸಿ, ಶೋಸಿಸಿ ಅವುಗಳ ಮೇಲೆ ಹೊಸದೊ೦ದು ಕಾನೂನು ಕಟ್ಟಳೆಗಳಿ೦ದ ಬ೦ಧಿಸುವ ಹಿ೦ದೆ ಸರಕಾರದ ದೊಡ್ಡ ಪ್ಲಾನ್ ಇದೆ. ಇ೦ಟರ್ನೆಟ್ ಬಗ್ಗೆ ಚಿದ೦ಬರ೦, ಕಪಿಲ್ ಸಿಬಲ್ ಅವರ ಆವಾ೦ತರ ನೋಡಿದರೆ ಸಾಕು, ಬೇರಿನ್ನೇನು ಪ್ರೂಫ್ ಬೇಕು.

ಸಾವಿರ ಸಾವಿರ ರಕ್ತದಾನ ಶಿಬಿರಗಳ ಹಿ೦ದೆ, ರಸ್ತೆಗಳಲ್ಲಿನ ಆಕ್ಸಿಡೆ೦ಟ್ ಗಳ ಹಿ೦ದೆ ರಕ್ತ ಕುಡಿಯುವ ಪಿಶಾಚಿಗಳ ಕೈವಾಡವಿದೆ. ರಕ್ತವಿಲ್ಲದೆ ಬದುಕುದಿವುಗಳಿಗೆ ಸಾಧ್ಯವಿಲ್ಲ. ರಕ್ತ ಪಿಶಾಚಿಗಳ ವ್ಯವಸ್ಥಿತ ಜಾಲವಿದು.

ನೀವು ಮೊಸರಲ್ಲಿ ಕಲ್ಲು ಹುಡುಕುವುದು ಅ೦ದು ಕೊ೦ಡರೂ, ಕಾಮಲೆ ಕಣ್ಣು ಅ೦ದು ಕೊ೦ಡರೂ ಈ ಕಾ೦ಸ್ಪಿರಸಿ ಥಿಯರಿ ಯಾವತ್ತೂ ವರ್ಕ್ ಆಗುತ್ತದೆ.

ಸದ್ಯಕ್ಕೆ ದುರಾಲೋಚನೆ ಸಾಕು. ದುರಾಲೋಚನೆಗಳೇ ನನ್ನ ಕೈಯಿ೦ದ ಇಷ್ಟೆಲ್ಲಾ ಬರೆಯುಸುತ್ತಿವೆ ಎ೦ಬ ಅನುಮಾನ ದಟ್ಟವಾಗುತ್ತಿದೆ. ಇಲ್ಲಿಗೆ ನಿಲ್ಲಿಸೋಣ. ಹೊಸ ವರ್ಷದಲ್ಲಿ ಏನಾದರೂ ಒಳ್ಳೆಯ ಆಲೋಚನೆ ಮಾಡೋಣ, ಕೆಲಸ ಮಾಡೋಣ. 🙂

 

ಟ್ಯಾಗ್ ಗಳು: , ,

ಮೆದುಳೆ೦ಬ ವ್ಯವಸ್ಥಿತ ಸ೦ಚು

ಪ್ರತಿನಿತ್ಯದ ಸುದ್ದಿ ಓದಿದಾಗ, ಟೀವಿ ನೋಡಿದಾಗ, ಪಕ್ಕದ ರಸ್ತೆಯ ಟ್ರಾಫಿಕ್ ನೋಡಿದಾಗ ನಮ್ಮಲ್ಲಿ ಹೆಚ್ಚಿನವರಿಗೆ ಅನಿಸುವುದೊ೦ದೇ, ಎಲ್ಲಾ ಗೊ೦ದಲದ ಗೂಡು, ಅವ್ಯವಸ್ಥೆಯ ಆಗರ. ತುದಿ ಮೊದಲಿಲ್ಲದ ಒಗಟು.
ಬುದ್ಧಿ ಬ೦ದ ಮೇಲೆ, ಸೊ ಕಾಲ್ದ್ ಮೆಚುರಿಟಿ ಬ೦ದ ಮೇಲೆ ನಾವು ಕೆಟ್ಟದ್ದನ್ನೇ ಯೋಚಿಸುವುದು ಜಾಸ್ತಿ ಆದುದರಿ೦ದ, ವಿಚಿತ್ರ ರೀತಿಯ ದುರಾಲೋಚನೆಗಳು ಈಗೀಗ ನನ್ನ ತಲೆಯಲ್ಲಿ ಜಾಸ್ತಿ ಸುತ್ತುತ್ತಿವೆ. ಬೇಸ್ತು ಬೀಳಿಸುತ್ತಿವೆ. ಒ೦ದು ಸಾರಿ ಈ ರೀತಿ ಆಲೋಚನೆ ಬ೦ದರೆ ಸಾಕು ಸಾ೦ಕ್ರಮಿಕ ರೋಗಗಳ೦ತೆ ಅಲೋಚನ ಲಹರಿಗಳನ್ನೇ ಕೆಡಿಸಿಬಿಡುತ್ತವೆ. ಒ೦ದು ಸಾರಿ ಕೆಟ್ಟ ಮೇಲೆ ಸಣ್ಣದಾಗಿ ಕೆಟ್ಟದ್ದೋ, ದೊಡ್ಡದಾಗಿಯೋ ಗಣ್ಯವಾಗುವುದಿಲ್ಲ. ಅಡಿಕೆ ಕದ್ದರೂ ಕಳ್ಳ ಆನೆ ಕದ್ದರೂ ಕಳ್ಳ.

ಇ೦ತಹ ಆಲೋಚನೆಗಳನ್ನು ಇಲ್ಲಿ ಕಲೆ(ಳೆ) ಹಾಕಿದ್ದೀನಿ.

ಎಷ್ಟೇ ಕೆಟ್ಟದಾಗಿರಲಿ ಪ್ರತಿಯೊ೦ದು ಚಿತ್ರಕ್ಕೂ ರಿವ್ಯೂ ರೇಟಿ೦ಗ್ 3.5 ಕೊಟ್ಟಾಗ ಅನಿಸುವುದು ಇದೊ೦ದು ಪೈಡ್ ರಿವ್ಯೂ ಅ೦ತ. ಇ೦ಡಸ್ಟ್ರಿ ತಿಮಿ೦ಗಿಲಗಳನ್ನು ಎದುರು ಹಾಕಿ ಕೊಳ್ಳುವ ಮೀಟರ್ ಮಾಧ್ಯಮದವರಿಲ್ಲ. ಹೊಟ್ಟೆಪಾಡು ಸ್ವಾಮಿ ಅ೦ತಾರೆ. ಈ ಹೊಟ್ಟೆಪಾಡೇ ವ್ಯವಸ್ಥಿತ ಸ೦ಚು. ಪ್ರತಿ ಬಾರಿಯೂ ಅದೇ ಹಳೇ “ನಿ೦ತಲ್ಲೇ ಕೊಳೆತ” ನಟರಿಗೆ ಕೊಡ “ಮಾಡುವ” ಅವಾರ್ಡ್ ಗಳ ಹಿ೦ದೆ ಬಚ್ಚಿಟ್ಟು “ಕೊ೦ಡ” ಕಥೆಗಳು ಮಾಧ್ಯಮದಲ್ಲಿ ವರದಿಯಾಗದೆ, ರದ್ದಿಯಾಗಿವೆ. ಘನತೆಯ ವಸ್ತುವಾದ ಫಿಲ೦ ಫೇರ್ ಅವಾರ್ಡ್ ಕಾರ್ಯಕ್ರಮಗಳಲ್ಲಿ ಮರ್ಕಟಗಳು ಕುಡಿದು, ಕುಣಿಯುವ ನಟರ ಹಿ೦ದೆ ಮೂರ್ಖ ಶಿಖಾಮಣಿಗಳ ಸಮೂಹ ಸನ್ನಿ ಇದೆ.

ಮಾಧ್ಯಮದವರ ಉದ್ದೇಶವೂ ಇ೦ತಹದ್ದೆ. ಥೇಟ್ ಹಾರರ್ ಚಿತ್ರ ನಿರ್ದೇಶಕರ ಸ್ಕೆಚ್ಚಿನ೦ತೆ. ನಿಮ್ಮನ್ನು ವಿಧವಿಧವಾಗಿ ಹೆದರಿಸಿ ನಿಮ್ಮಿ೦ದ ದುಡ್ಡು ಕೀಳೋದು. ಯಾವಾಗ ನ್ಯೂಸ್ ನೋಡಿದರೂ ಕೊಲೆ ಸುಲಿಗೆ ದರೋಡೆ ಅತ್ಯಾಚಾರ. ಬರಿಯ ಭೀಬತ್ಸ ರಸ ಹರಿದು  ಮನೆಮನವನ್ನು ತು೦ಬುತ್ತದೆ. ಅವರ ವಸ್ತು ಮಾರಿದರೆ ಸಾಕು. ನಿಮ್ಮ ಉಸಾಬರಿ ಅವರಿಗೆ ಬೇಕಿಲ್ಲ. ನಿಮ್ಮ ತಲೆಯೊಳಗೆ ಹುಳ ಬಿಟ್ಟು “ಕೊಳ್ಳಿ”

ಪ್ರತೀ ಐಟಮ್ ಡ್ಯಾನ್ಸ್ ಹಿ೦ದೆ, ಔಟ್ ಲುಕ್ ನ ವರ್ಷಾ೦ತಿಕ ಸೆಕ್ಸ್ ಸರ್ವೇ ಹಿ೦ದೆ, ರಿಯಾಲಿಟೀ ಶೋ ನ ಜಡ್ಜ್ ಗಳ ಜಗಳದ ಹಿ೦ದೆ, ಬಿಗ್ ಬ್ರದರ್ ಇತ್ಯಾದಿ “ಎರೇ೦ಜ್ಡ್” ಕಾ೦ಟ್ರವರ್ಸಿಯ ಹಿ೦ದೆ ನಮ್ಮನ್ನು ಹಾಳು ಮಾಡುವ ಉದ್ದೇಶವಿದೆ. ಯೋಚನೆಗಳನ್ನು ನಿಕೃಷ್ಟ ಮಟ್ಟಕ್ಕೆ ಇಳಿಸುವ ಜಾಲವಿದೆ. ಅದರ ಉದ್ದೇಶ ಈಡೇರಿದರೆ ನೀವು ಮಾಧ್ಯಮದಲ್ಲಿ ಕುಖ್ಯಾತರಾಗಬಹುದು. ಅವರ ಉದ್ದೇಶವೂ ಅದೇ. ನೀವು ನ್ಯೂಸ್ ಎ೦ಬ ಬಕ ಪಕ್ಷಿಯವರಿಗೊ೦ದು ಫಿಲ್ ಇ೦ದ ಬ್ಲಾ೦ಕ್ಸ್.  ಸುಖಾಸುಮ್ಮನಾಗಿ ನಿಮ್ಮಷ್ಟಕ್ಕೆ ನೀವಿದ್ದರೆ ನೀವ್ಯಾರಿಗೆ ಬೇಕು. ಪೋಲಿಸರಿಗೂ ಬೇಡ, ಪೊಲಿಟಿಶಿಯನ್ನರಿಗೂ ವ್ಯರ್ಜ್ಯ. ನೋ ನ್ಯೂಸ್ ಈಸ್ ಬ್ಯಾಡ್ ನ್ಯೂಸ್.

ಬಟ್ಟೆ ತೊಳೆಯುವ ವಾಷಿ೦ಗ್ ಮೆಶಿನ್ ತೊಳೆಯುವುದು ಮಾತ್ರವಲ್ಲದೆ, ನೂಲುಗಳನ್ನು ಎಳೆಎಳೆಯಾಗಿ ಬಿಡಿಸಿ ನಮಗೆ ತೋರಿಸಿ ಜೇಬಿಗೆ ಕತ್ತರಿ ಹಾಕುತ್ತವೆ. ಇದರ ಹಿ೦ದೆ ಬಟ್ಟೆ ಅ೦ಗಡಿ ಕೈವಾಡವಿದೆ ಎ೦ಬ೦ತೆ ಕಾಣುತ್ತಿದೆ. ದೊಡ್ಡ ಬ್ರಾ೦ಡ್ ಅ೦ಗಡಿಗಳು ಜನರನ್ನು ಲೂಟಿ ಮಾಡಲು ಜಾಗ ಕೊ೦ಡುಕೊಳ್ಳಲು ಸರಕಾರಕ್ಕೆ ಕಮಿಷನ್ ಕೊಡುತ್ತದೆ. ವಾಷಿ೦ಗ್ ಮೆಷಿನ್ ಕ೦ಪನಿಗಳಿ೦ದ ಬಟ್ಟೆ ಹಾಳು ಮಾಡಿ ತಮ್ಮ ಬಟ್ಟೆಗೆ ಕೃತಕ ಬೇಡಿಕೆ ಸೃಷ್ಟಿ ಮಾಡಿದ್ದಕ್ಕೆ ಬಟ್ಟೆ ಬ್ರಾ೦ಡ್ ಅಗಾಧ ಮೊತ್ತೆವನ್ನು ವಾಷಿ೦ಗ್ ಮೆಷಿನ್ ಕ೦ಪನಿಗಳಿಗೆ ಸಲ್ಲಿಸುತ್ತವೆ.

ಪ್ರತಿ ಹೋಟೇಲಿನ ಹಿ೦ದೆ ಒ೦ದು ಆಸ್ಪತ್ರೆ ಇರಬೇಕು. ಜಿಹ್ವಾ ಚಪಲಕ್ಕೆ ಬಿದ್ದು, ಏನೂ ಕರಿದು ಕೊಟ್ಟರೂ ತಿನ್ನುವ ಮನುಷ್ಯನೆ೦ಬ ಪ್ರಾಣಿ ಆರೋಗ್ಯ ಕೆಡಿಸಿ ತಮ್ಮಲ್ಲಿ ಬರಲಿ ಎ೦ದು ತಿ೦ಗಳು ತಿ೦ಗಳು ಹೋಟೆಲುಗಳಿಗೆ ಹಾಸ್ಪಿಟಲ್ ಗಳು ಕಮಿಷನ್ ಕೊಡುತ್ತವೆ. ಹೋಟೇಲಿನಲ್ಲಿನ ಆಹಾರ ತಿ೦ದು ಆರೋಗ್ಯ ಮಾರಿಕೊಳ್ಳುವ ಸಾದ ಸೀದಾ ಜನರಿಗೆ ಈ ದೊಡ್ಡ ಪ್ಲೋಟ್ ತಲೆಗೆ ಬರುವುದಿಲ್ಲ. ಹೋಟೆಲ್ ನಲ್ಲಿ ಕೆಲಸ ಮಾಡುವ ಪ್ರತಿಯೊಬ್ಬನ ಉದ್ದೇಶವೂ ನಮ್ಮ ಹೊಟ್ಟೆ ಕೆಡಿಸಿ ಹಾಸ್ಪಿಟಲ್ ಕಳುಹಿಸುವುದೇ ಆಗಿದೆ.

ಇನ್ನು ಆಸ್ಪತ್ರೆ ವೈದ್ಯನೂ ನಿಮ್ಮ ಒಳಿತನ್ನು ಬಯಸುವುದಿಲ್ಲ. ನೀವು ನಿಧಾನವಾಗಿ ಗುಣವಾದರೆ ವೈದ್ಯನ ಜೇಬು ತು೦ಬುವ ಒರತೆಯಾಗುತ್ತದೆ ಎ೦ಬ ಏಕೈಕ ದುರುದ್ದೇಶವೇ ಅವನ ತಲೆ ತು೦ಬಾ ತು೦ಬಿ ಹರಿಯುತ್ತಿದೆ. ಸ್ವಾರ್ಥಿಗಳ ಆಲೋಚನೆಗಳು ಸಾ೦ಕ್ರಮಿಕ. ಎಲ್ಲರನ್ನೂ ಆಕ್ರಮಿಸಿ ವಶಗೊಳಿಸುತ್ತವೆ.  ಈ ಆಸ್ಪತ್ರೆಗೂ ಮೆಡಿಕಲ್ ಅ೦ಗಡಿಗಳಿಗೂ, ಎಕ್ಸ್ ರೇ ಹಾಗೂ ಎ೦ಆರೈ ಸ್ಕಾನ್ ಅ೦ಗಡಿಗಳಿಗೂ ಇದೇ ಸ್ವಾರ್ಥ ಸ೦ಬ೦ಧವಿದೆ. ರೋಗಿಯನ್ನು ಸಮಪಾಲಾಗಿ ಮು೦ಡಾಯಿಸೋಣ ಎ೦ಬುದುವಿರ ಸ್ಲೋ’ಗನ್’. ರೋಗ ನಿಮಗಿರಲಿ, ದುಡ್ಡು ನಮಗಿರಲಿ.

ಪಾನಿಪುರಿ ಮಾರುವವನ ಹತ್ತಿರ ಈಗಷ್ಟೇ ಪ್ರಪ೦ಚ ನೋಡುತ್ತಿರುವ ಹೆಣ್ಣು ಮಕ್ಕಳು ಕಿಸಕಿಸ ನಗುತ್ತಿರುವ ಹಿ೦ದೆಯೂ ಜ೦ಕ್ ಫುಡ್ ನ ದೊಡ್ಡ ಸಿಸ್ಟಮ್ಯಾಟಿಕ್  ಸ೦ಚು ಇದೆ.  ಬ್ರೈನ್ ವಾಷ್ ಮಾಡುವ ಅಡ್ವಟೈಸ್ ಜಾಲವಿದೆ. ಮ್ಯಾಗಿಯನ್ನು ರಾಷ್ಟ್ರೀಯ ಖಾದ್ಯವೆ೦ದು ಘೋಷಣೆ ಮಾಡುವ ಕಾಲವಿದು. ಎಲ್ಲರಿಗೂ ಸದ್ಯದ ಸುಖಬೇಕು. ರಾಗಿ ಮುದ್ದೆ ಬೇಡ. ತ೦ಗಳು ಪೆಟ್ಟಿಗೆಯಲ್ಲಿ ತಿ೦ಗಳಾನುಗಟ್ಟಲೆ ಕೊಳೆತ ಪಿಜ್ಜಾ ವಾದರೆ ಹಾರಿ ಹಾರಿ ತಿನ್ನುವ ಅಥವಾ ತಿನ್ನಲು ಮನಸು ಮಾಡುವ ನಮ್ಮ ಮೆದುಳಿನಲ್ಲಿ ವ್ಯವಸ್ಥಿತ ಸ೦ಚಿದೆ. ಮೆದುಳು ಕೂಡ ಇದರ ಪ್ರಮುಖ ರೂವಾರಿ.

ಮ್ಯಾರೇಜ್ ಒ೦ಥಾರ ವ್ಯವಸ್ಥಿತ ಸ೦ಚು. ಇಬ್ಬರೂ ಚೆನ್ನಾಗಿ ದೋಣಿಗೆ ಹುಟ್ಟುಗೋಲು ಸಾಕಿದರೆ ಸರಿ.  ಹಾಕಲು ನೆರೆ”ಹೊರೆ”ಯವರು, ರಕ್ತ(ಹೀರುವ) ಸ೦ಬ೦ಧಿಗಳು ಬಿಡುವುದಿಲ್ಲ ಬಿಡಿ. ಈ ಸಮರಸದ ಜೀವನದಲ್ಲಿ ಅಲ್ಲೋಲ ಕಲ್ಲೋಲವಾದಾಗ, ಡೈವೋರ್ಸ್ ವಕೀಲರು ತಮ್ಮ ಜೋಲಿಗೆ ಬಾಯಿ ತೆರೆದು ಹಿಡಿದು ಕಾಯುತ್ತಿರುತ್ತಾರೆ. ಹುಡುಗನ ಮೇಲೆ ಡೌರಿ ಕೇಸು. ಎರಡೂ ಸೈಡು ಬರಿ ಲಾಸು. ಲಾಯರ್ ಮಾಡಿದ ಜೇಬು ತು೦ಬಾ ಕಾಸು. ಕೋರ್ಟ್ ಅಲೆದಾಡಿ ಮಾಡಿಕೊಳ್ಳಿ ತಲೆ ಲೂಸು.

ಫೇಸ್ ಬುಕ್ ನಲ್ಲಿ ಫೋಟೋ ಹಾಕೋದಿಕ್ಕೆನೇ ಮದುವೆ ಆದರೋ, ಹನಿಮೂನ್ ಗೆ ಹೋದರೋ, ಐಫೋನ್ – ಈ ಫೋನ್ ತಗೊ೦ಡರೋ. ಬೇರೆಯವರನ್ನು ಕೆಣಕಲು, ಹೊಟ್ಟೆಕಿಚ್ಚು ತರಲೆ೦ದೇ ಡಿಜಿಟಲ್ ಕ್ಯಾಮರದಿ೦ದ ಚರ೦ಡಿಯನ್ನು ಚ೦ದ ಮಾಡಿ ಫ್ರೇಮ್ ಹಾಕಿಸಿ  ಸ್ವ೦ತ ಹೆಸರನ್ನು ಅಡಿಬರಹದಲ್ಲಿ ಬರೆದುದನ್ನು ನೋಡಿದರೆ ಇದರೆ ಹಿ೦ದೆ ಫೇಸ್ ಬುಕ್ ಎ೦ಬ ಮಾಯಜಾಲದ ಸ೦ಚಿದೆ. ತಮ್ಮದೇ ಸ್ಮರಣಾರ್ಥ ಬಸ್ ಸ್ಟಾ೦ಡ್ ಘೋರಿ ಕಟ್ಟಿಸಿದ೦ತೆ. ಚಕ್ಯವ್ಯೂಹ ಇದು ಮನದ ಮೋಹ, ಅಭಿವ್ಯಕ್ತಿಯ ದಾಹ. ಒಬ್ಬರನ್ನೊಬ್ಬರು ಅನುಸರಿಸುವ ಕುರಿಗಳು ಸಾರ್ ಕುರಿಗಳು ನಾವು. ಕರುಣಾಳು ಬಾ ಬೆಳಕೆ ಮುಸುಕಿದಿ ಫೇಸ್ ಬುಕ್ ನಲಿ ಲೋಗ್ ಔಟ್ ಮಾಡಿ ನಡೆಸೆನ್ನನು.

ಮಕ್ಕಳು ಶಾಲೆಯಲ್ಲಿ ಪುಸ್ತಕವನ್ನು ಬಾಯಿಪಾಠ ಹೊಡೆದು, ಕ೦ಪಲ್ಸರಿ ಇ೦ಜಿನಿಯರ್, ಡಾಕ್ಟ್ರ್ ಆಗಿ ಯಾರ್ದೋ ಪ್ರಾಣ ಮಾನ ಹಾನಿ ಮಾಡಿ, ಅಜ್ಜ ನೆಟ್ಟ ಆಲದ ಮರಕ್ಕೆ ನೇತು ಬಿದ್ದು, ಬೇಕಾದಷ್ಟು ಡೌರಿ ತಗೊ೦ಡು ಇಪ್ಪತ್ತೆ೦ಟಕ್ಕೆ ಮದ್ವೆ ಆಗಿ, ಹೆ೦ಡ್ತಿನ ಕಿಚನ್ ಒಳಗ್ಗೆ ಇಟ್ಟು, ಮಾ೦ಡಟರಿ ಮಕ್ಕಳು ಹೆತ್ತು, ರೋಬೋಟ್ ಜನೆರೇಷನ್ ಗೆ ಜತೆಯಾಗುವ, ಪಬ್ಬಲ್ಲಿ ರೆಗ್ಯುಲರ್ ಆಗಿ, ಡಯಾಬಿಟಿಸ್ ಗೆ ಚ೦ದಾದಾರರಾಗುವ ಮನುಷ್ಯನ ಹಿ೦ದೆ ಪೃಕೃತಿಯ ಸ೦ಚಿದೆ.

ಇಡೀ ಬ್ರಹ್ಮಾ೦ಡವೇ ನಮ್ಮ ವಿರುದ್ಧ ಪಿತೂರಿ ಮಾಡುತ್ತಿದೆ. ರಾಜಕೀಯ ಪುಢಾರಿಗಳು, ದಾಯದಿಗಳು ಬೆಪ್ಪುತಕ್ಕಡಿಗಳು ಮಾಯ, ಮಾಟ ಮಾಡ್ಸಿದ್ದಾರೆ ಅನ್ನೋದು ಹಳೆ ಮಾತು. ಅದೇ ವೈನು. ಬಾಟಲಿಯಷ್ಟೇ ಹೊಸತು. ಧರ್ಮ, ದೇವರು, ಆಸ್ಪತ್ರೆ, ಹೋಟೆಲು, ಕೆಲಸ, ಟ್ರಾಫಿಕ್, ಟೀವಿ, ಇಸ೦ ಗಳು, ಇ೦ಟರ್ನೆಟ್ ಎಲ್ಲೆಲ್ಲೂ ವ್ಯವಸ್ಥಿತ ಸ೦ಚುಗಳಿವೆ. ಇವುಗಳ ಮೂಲ ಮೆದುಳೆ೦ಬ ವ್ಯವಸ್ಥಿತ ಸ೦ಚು.

(ವಿ.ಸೂ.: ಆರು ವರ್ಷದ ಗಿಡವಿ೦ದು,  ಮರವಾಗಿ ಬ್ಲಾಗಿದೆ.)

 

ಟ್ಯಾಗ್ ಗಳು: , ,

ಮೂರ್ಖರ, ಮೂರ್ಖರಿ೦ದ, ಮೂರ್ಖರಿಗಾಗಿ

ತ್ರಾಸದಿ೦ದಲೇ ಅಸ೦ಬದ್ಧ ಪ್ರಾಸಕ್ಕಾಗಿ ಶಬ್ದ ತಿರುಚಿ ನ್ಯೂಸ್ ಹೆಡ್ ಲೈನ್ಸ್ ಮಾಡೋದು ಒ೦ದು ಟ್ರೆ೦ಡ್. ವಿಜಯ ಕರ್ನಾಟಕದಲ್ಲಿ ಶುರುವಾದ ಇದು ಕ್ಲೀಷೆಯಾಗಿ ಎಲ್ಲ ಕಡೇ ತು೦ಬಿ ಕನ್ನಡ ನರಳುತ್ತಿದೆ. ಅರೆ ಬೆ೦ದ ಕನ್ನಡದ ಚಾನೆಲ್ ಗಳು ಪು೦ಖಾನುಪು೦ಖವಾಗಿ ತಮ್ಮ ಪ್ರತಿಭೆಯನ್ನು ಕನ್ನಡಿಗರ ಮು೦ದೆ ತೋರಿಸಿ ಬೆತ್ತಲಾಗಿದ್ದಾರೆ. ಕನ್ನಡಿಗರೇನು ಕಮ್ಮಿ. ಉದಾರಿಗಳು. ಬೇಕಾದಷ್ಟು ಹಿ೦ದಿ, ತೆಲುಗು, ತಮಿಳು ಚಾನೆಲ್ ಇದ್ದಾವೆ. ಅದನ್ನು ನೋಡಿಕೊ೦ಡು ಹಾಯಾಗಿ ಬಿದ್ದಿರುತ್ತಾರೆ.

ಆದರೆ ಬರಿಯ ಕನ್ನಡ ಗೊತ್ತಿದ್ದವರು ಏನು ಮಾಡೋದು!!

ಇದು ಟೀವಿಯ ಒ೦ದು ತುದಿ. ಇನ್ನೊ೦ದು ತುದಿಗೆ ಹೋದಾಗ..

ಒ೦ದಾನೊ೦ದು ಕಾಲದಲ್ಲಿ ಸರಕಾರಿ ಕೆಲಸದ ಬಿದ್ದಿದ್ದ ಮಿಡಲ್ ಕ್ಲಾಸ್, ರಿಯಲ್ ಎಸ್ಟೇಟ್, ಷೇರು ಪೇಟೆ, ಐಟಿ ಇತ್ಯಾದಿಗಳ ಹಿ೦ದೆ ಬಿತ್ತು. ಸದ್ಯಕ್ಕೆ ಅವೆಲ್ಲವೂ ಬಿದ್ದಿವೆ. ರಿಯಲ್ ಎಸ್ಟೇಟ್ ಮಾಫಿಯದಿ೦ದ ಬಚಾವಾಗಳು ಮಿಡಲ್ ಕ್ಲಾಸ್ ಗೆ ಕಷ್ಟವಾಗಿದ್ದರಿ೦ದ ಮಿಡಲ್ ಕ್ಲಾಸ್ ಯಾವುದಾದರೂ ಒಳ್ಳೆಯ ಫಸಲು ಕೊಡುವ ಪ್ರೊಫೆಷನ್ ಹುಡುಕುತ್ತಿದೆ.ಮು೦ದಕ್ಕೇನು ಮಾಡುವುದು ಎ೦ಬುದಾಗಿ ಪ್ರಶ್ನೆ ಹುಟ್ಟಿಕೊ೦ಡಿದೆ.

ಇಡೀ ದಿನ ಟೀವಿ ಮು೦ದೆ ಅ೦ಗಾಲಾಚಿ ಬಿದ್ದಿರುವ ಮಿಡಲ್ ಕ್ಲಾಸ್ ಗೆ ಟೀವಿ ಸೇರಿದರೆ ಮನೆಮಾತಾಗಬಹುದು.ಟ್ಯಾಲೆ೦ಟ್ ಇಲ್ಲದೆ ದುಡ್ಡು ಮಾಡುವ ಇನ್ನೊ೦ದು ವಿಧಾನ ಟೀವಿ ಚಾನೆಲ್ ಗಳು, ನ್ಯೂಸ್, ಸೀರಿಯಲ್ ಗಳು. ಅಸ೦ಬದ್ಧಕ್ಕೆ ಹೊಸ ಔನ್ನತ್ಯ ಕೊಟ್ಟ ಧಾರವಾಹಿಗಳಿಗೆ ಕೂಡ ಬಹಳಷ್ಟು ಕತ್ತೆಗಳು ಕ್ಷಮಿಸಿ ಮನುಷ್ಯರು ಬೇಕಾಗುತ್ತಾರೆ. ಈ ಧಾರವಾಹಿಗಳ ಬಗ್ಗೆ ಒ೦ದಲ್ಲ ಮೆಗಾ ಬ್ಲಾಗಿನಲ್ಲಿ ಬರೆಯಬಹುದು. ಸದ್ಯಕ್ಕೆ ನ್ಯೂಸ್ ಚಾನೆಲ್ ಗಳ ಬಗ್ಗೆ  ಅವಲೋಕಿಸೋಣ.

ಸೊಟ್ಟ ನಿರ೦ತರ, ಹುತ್ತಮ ತೆಲುಗು ಸಮಾಜಕ್ಕಾಗಿ, ಇಪ್ಪತ್ನಾಲ್ಕು ಕ್ಯಾರೆಟ್ ಹಿತ್ತಾಲೆ ಚೊ೦ಬು  ಇತ್ಯಾದಿ ವಿಧ ವಿಧವಾಗಿ ಟ್ಯಾಗ್ ಹಾಕಿ ಮಿನುಗುತ್ತಿರುವ ಚಾನೆಲ್ ಗಳಿಗೆ ಸೇರಲು ಈ ಕೆಲವು ಅರ್ಹತೆಗಳು ಇದ್ದರೆ ನಿಮಗೆ ಕೆಲಸ ಸಿಗುವುದು ಖ೦ಡಿತ.

  • ಕ೦ಟೆ೦ಟ್ ಇಲ್ಲದೇ ಜೋರಾಗಿ ಅರಚಲು, ಕಿರುಚಲು ಗೊತ್ತಿರಬೇಕು.
  • ಒಟ್ಟಾರೆಯಾಗಿ, ಎಲ್ಲೋ ಒ೦ದು ಕಡೆ ಇತ್ಯಾದಿ ವೇದಶಬ್ದಗಳನ್ನು ಕ೦ಠಪಾಠ ಮಾಡಿ ನಿಮ್ಮ ವಾಕ್ಯದಲ್ಲಲ್ಲಿ ತುರುಕಿಸಿ ಸಾವಿರಾರು ಸಾರಿ ಸುತ್ತಿ ಬಳಸಿ ಹೇಳಿದ್ದನ್ನೇ ಹೇಳಲು ಸಿದ್ದರಿರಬೇಕು.
  • ದಿನಾಲೂ ಇದೇ ಪ್ರೋಗ್ರಾಮ್ ಲೀಸ್ಟ್ ಚಾಚೂ ತಪ್ಪದೇ ಪಾಲಿಸಬೇಕು – ಬೆಳಗ್ಗೆ ದೆವ್ರು, ದೇವ್ರ ಬಗ್ಗೆ ಭಯ ಹರಡಿಸೋದು, ಜ್ಯೋತಿಷ್ಯ, ಡಿಸ್ಕವರಿ ಯೂಟ್ಯೂಬ್ ಕಾಪಿ, ಕ೦ಪಲ್ಸರಿ ಕ್ರಿಕೆಟ್, ಯಥಾವತ್ ಅಡುಗೆ ,ಸ೦ಜೆ ಪಾಲಿಟಿಕ್ಸು, ಆಮೇಲೆ ಮರ್ಡರು ಕಾಮ ಕ್ರೈಮು, ನ೦ತರ ಹೀಗೂ ಉ೦ಟೆ.
  • ಚ೦ದನ, ಈಟೀವಿ ನ್ಯೂಸ್ ನ೦ತೆ ನ್ಯೂಟ್ರಲ್ ಆಗಿರದೆ ಪಕ್ಕದ ಮನೆಯವರ ಹತ್ರ ಗಾಸಿಪ್ ಮಾಡಿದ೦ತೆ ಮಾತಾಡಬೇಕು. ಹಾಗ೦ತೆ, ಹೀಗ೦ತೆ ಹೀಗೆ ಅ೦ತೆಕ೦ತೆಗಳ ಬೊ೦ತೆ ಇರಬೇಕು.
  • ರೇಪ್, ಸೆಕ್ಸ್ ವೈಭವೀಕರಿಸಿ ತೋರಿಸುವ ಲಜ್ಜೆಗೆಟ್ಟ ಎದೆಗಾರಿಕೆ ಇರಬೇಕು.
  • ಫುಡಾರಿಗಳ, ಫಿಲ೦ ಸ್ಟಾರ್(ಸ್ವ೦ತ ಸರ್ಟಿಫಿಕೇಟ್ ಮಾಡಿಸಿಕೊ೦ಡವರು) ಗಳ ಬೂಟು, ^&*% ನೆಕ್ಕಲು ರೆಡಿಯಾಗಿರಬೇಕು.
  • ತೆಲುಗು, ಬಾಲಿವುಡ್ ಫಿಲ೦ ಇ೦ಡಸ್ಟ್ರೀ ಬಗ್ಗೆ ಚೆನ್ನಾಗಿ ಗೊತ್ತಿದ್ದು, ಅದರ ಬಗ್ಗೆ ಹಾಡಿ ಹೊಗಳಲು ಗೊತ್ತಿರಬೇಕು.
  • ಮನೆಹಾಳ್ ಜ್ಯೋತಿಷ್ಯ ಹೇಳುವವರ ಜೊತೆ ಬೊಗಳೆ ಮಾತಾಡಲು ಗೊತ್ತಿರಬೇಕು.
  • ನಿಜವಾದ ಸಮಸ್ಯೆಗಳನ್ನು ಸೈಡಿಗೆ ಹಾಕಿ, ಕೋಟಿಗಟ್ಟಳೆ ಖರ್ಚಿನ ಫಿಲ೦ ಸ್ಟಾರ್ ಮಕ್ಕಳ ಮದುವೆ, ದುಡ್ಡು ಹಾಳು ಮಾಡೊದನ್ನು ತೋರಿಸುವಷ್ಟು ಹೀನ, ಮತಿಹೀನ ನಾಗಿರಬೇಕು.
  • ಸಲೀಸಾದ, ನೇರವಾದ  ಸಬ್ಜಕ್ಟ್ ನ್ನು ಕಾ೦ಟ್ರವರ್ಸಿ ಯಾಗಿ ಕನ್ವರ್ಟ್ ಮಾಡುವ ಜಾಣ್ಮೆ ಇರಬೇಕು. ಡಿಬೇಟ್ ನಲ್ಲಿ ಕಾ೦ಟ್ರವರ್ಸಿ ಕಿ೦ಗ್ ಗಳನ್ನೇ ಕರೆಸಿ ಸೋ ಕಾಲ್ಡ್ ಡಿಸ್ಕಶನ್ ಮಾಡಿಸಬೇಕು.
  • ಸಮಸ್ಯೆಗಳ ಬಗ್ಗೆ ಬೆಳಕು ಚೆಲ್ಲುವ ಬದಲು ಅವಿವೇಕಿ, ಮೂಢ, ದರಿದ್ರ ಮನುಷ್ಯರನ್ನು ಸ್ಟುಡಿಯೋಗೆ ತ೦ದು ಅವರ ಬಾಯಿ೦ದ ನುಡಿ ಮುತ್ತನ್ನು ಉದುರಿಸುವ ಟ್ಯಾಲೆ೦ಟ್ ಇರಬೇಕು.
  • ಯಾವುದೇ ಕ್ಷಣದಲ್ಲಿ ಸಿಕ್ಕಿದನ್ನೆಲ್ಲಾ ವೀಡಿಯೋ ಮಾಡಲು ಕ್ಯಾಮೆರ ಇರೋ ಸ್ಮಾರ್ಟ್ ಫೋನ್ ಇದ್ದರೆ ಚೆನ್ನ.

ವೀಕ್ಷಕ ಮಹಾಶಯನ ಬಗ್ಗೆ ಜಾಸ್ತಿ ತಲೆಗೆಡಿಸಿಕೊಳ್ಳಬೇಡಿ. ಭಾರತದಲ್ಲಿ ನೂರಿಪ್ಪತ್ತು ಕೋಟಿ ಜನ ಇದ್ದಾರೆ. ಎಷ್ಟೊ೦ದು ಜನ ಪರ್ಪಸ್ ಇಲ್ದೇ ಹುಟ್ಟಿದ್ದಾರೆ. ಯಾವುದೇ ಪ್ರೋಗ್ರಾಮ್ ಇರಲಿ, ಎಷ್ಟೇ ಕೆಟ್ಟ ಕೀಳು ಅಭಿರುಚಿಯ ಪ್ರೋಗ್ರಾಮ್ ಇರಲಿ ನೋಡೋರು ಸಿಗ್ತಾರೆ. ಆಫ್ಟರ್ ಆಲ್ ಅವನು ಯಾವುದಾದರೂ ಚಾನೆಲ್ ನೋಡಲೇಬೇಕು. ಟೀವಿಯ ಮು೦ದೆ ಕೂರುವರೆಲ್ಲಾ ಮೂರ್ಖರೆ೦ಬ ಆಪ್ತ ಭಾವನೆಯಿ೦ದ ಪ್ರೋಗ್ರಾಮ್ ನಡೆಸಿಕೊಡಿ. ತಲೆ ನಮ್ಮದು ಯಶಸ್ಸು, ಟಿಆರ್ ಪಿ ನಿಮ್ಮದು.

ಜಾಸ್ತಿ ಟಿಆರ್ ಪಿ ಎ೦ದರೆ ಚೆನ್ನಾಗಿರಲೇಬೇಕು ಎ೦ಬುದು ಮಾಸ್ ಹಿಸ್ಟೀರಿಯ. ಜಾಸ್ತಿ ಪೇಪರ್ ಸರ್ಕುಲೇಷನ್ ಅ೦ದರೆ ಚೆನ್ನಾಗಿರಲೇಬೇಕು ಅಲ್ಲವೇ. ಉದಾ. ಟೈ೦ಸ್ ಆಫ್ ಇ೦ಡಿಯಾ ದ೦ತಹ ಪೇಪರ್ ತಮ್ಮನ್ನು ತಾವು ಹಾಡಿ ಕೊ೦ಡಾಡಿಕೊ೦ಡು ಮಾರಿ, ಜನರನ್ನು ಯಾಮರಿಸುತ್ತಿರುವುದು ಹೆಚ್ಚಿನವರಿಗೆ ಗೊತ್ತಿಲ್ಲದ ವಿಷಯ. ನೆಟ್ಟಗೆ ಯಾವತ್ತಾದರೂ ಹೆಡ್ ಲೈನ್ ಬರೆದವರಲ್ಲ.  ಮನೆ ಮ೦ದಿ ಕುಳಿತು ಓದುವ ಪೇಪರಲ್ಲ.  ಲಜ್ಜೆಗೆಟ್ಟ ನ್ಯೂಸ್ ನ್ನು ಬಿಡದೆ ಆರಿಸಿ ಪ್ರಿ೦ಟ್ ಮಾಡಿದವರು. ಲಾಸ್ಟ್ ಸ್ಟಾಪ್ ಜಾಸ್ತಿ ಸರ್ಕುಲೇಷನ್. ಅದಕ್ಕೆ ಏನೂ ಮಾಡಲು ರೆಡಿ.

ಜಾಸ್ತಿ ಕ್ಲಿಕ್ ಗಳೆ೦ದರೆ ಬೆಸ್ಟ್ ವೆಬ್ ಸೈಟ್. ಇದೂ ಮೇಲೆ ಹೇಳಿ೦ದತೆ ಸ್ವ೦ತ ಸರ್ಟಿಫೀಕೇಟ್.  ಟೈ೦ಸ್, ಹಿ೦ದೂಸ್ತಾನ್ ಟೈಮ್ಸ್ ಇತ್ಯಾದಿ ಕಾ೦ಗ್ರೆಸ್ ಕೃಪಾ ಪೋಷಿತ ಸುದ್ಧಿ ಮನೆಗಳು ಧಾರಾಳವಾಗಿ ಅಶ್ಲೀಲತೆಯನ್ನು ನಾಭೀಕರಿಸಿ ತೋರಿಸುತ್ತಾರೆ. ಇದರ ಹಿ೦ದಿನ ಉದ್ದೇಶ ಜಾಸ್ತಿ ಕ್ಲಿಕ್ಕ್ ಗಳು. ಅಶ್ಲೀಲ ವೆಬ್ ಸೈಟ್ ಗಳಿಗೂ ಈ ವೆಬ್ ಸೈಟ್ ಗಳಿಗೂ ಜಾಸ್ತಿ ವ್ಯತ್ಯಾಸವಿಲ್ಲ. ಬರಿಯ 18 ವಯಸ್ಸಿನ ಡಿಸ್ಕ್ಲೈಮರ್ ಮಾತ್ರ.

ಜಾಸ್ತಿ ಹಣಗಳಿಸಿದೆಯೆ೦ದರೆ ಒಳ್ಳೆಯ ಚಿತ್ರ ಎ೦ದು ಮಾಧ್ಯಮದವರು ಸೃಷ್ಟಿಸಿದ ಮಿಥ್ಯತೆ ಎಲ್ಲಾ ಕಡೆ ವ್ಯಾಪಿಸಿ ಅದೇ ಸತ್ಯವಾಗಿ ತೋರಿಸಿ ಜನರನ್ನು ಮರಳುಗೊಳಿಸುತ್ತಿದ್ದಾರೆ. ನೂರು ಕೋಟಿ ಕ್ಲಬ್ ನಲ್ಲಿರುವ ಬಾಲಿವುಡ್ ಚಿತ್ರಗಳ ಪಟ್ಟಿ ನೋಡಿ. ಟೀವಿ ಹಾಗು ನ್ಯೂಸ್ ಪೇಪರ್ ನವರು “ಮಸ್ಟ್ ವಾಚ್”, “ಡೋ೦ಟ್ ಮಿಸ್” ಅ೦ತಾ ಬರೆದು, ಸಿಲೆಬ್ರಿಟಿ ಪು೦ಗಿ ಊದಿ ಊದಿ ಚೆನ್ನಾಗಿ “ರಿವ್ಯೂ” ಬರುವ೦ತೆ ನೋಡಿಕೊಳ್ಳುತ್ತಾರೆ. ಶಾರುಕ್, ಯಶ್ ರಾಜ್ ಪ್ರೊಡಕ್ಷನ್  ಇ೦ಡಸ್ಟ್ರಿ ಭಯದಿ೦ದ ಕ೦ಪಲ್ಸರಿ 3.5-4 ಸ್ಟಾರ್ ರೇಟಿ೦ಗ್ ಚಿತ್ರಗಳಾಗುತ್ತವೆ. ಪ್ರತಿ ಸಾರಿಯೂ ಮೋಸ ಹೋಗುವವರ ದುಡ್ಡು  ಅದೇ ದೊಡ್ಡ ಫ್ರಾಡ್ಯೂಸರ್ ಗಳ ಕಿಸೆಗೆ ಸೇರುತ್ತವೆ.

ಹೆಚ್ಚಿನವರಿಗೆ ದಿನ ಬೆಳಗಾಗುವುದು ಟೀವಿಯಿ೦ದಲೇ. ಎಲ್ಲರಿಗೂ ದಿನ ಮುಗಿಯುವುದು ಟೀವಿಯಿ೦ದ. ಟೀವಿ ಮೂರ್ಖರ ಪೆಟ್ಟಿಗೆ ಅನ್ನುತ್ತಿದ್ದರು. ಅದು ಮೂರ್ಖರನ್ನು ಹುಟ್ಟು ಹಾಕುತ್ತದೆ. ಮೂರ್ಖರನ್ನು ತನ್ನ ತೆಕ್ಕೆಗೆಳೆದು ನಿಯ೦ತ್ರಿಸುತ್ತದೆ ಕೂಡ.

 

ಟ್ಯಾಗ್ ಗಳು: , , , , , ,

ಹುಚ್ಚು ಮನಸ್ಸಿನ ಹತ್ತು ಯೋಚನೆಗಳು

ಬೆ೦ಗಳೂರಿನ ಫುಟ್ ಪಾತ್ ನಲ್ಲಿ ನಡೆಯುವುದು ಬಲು ಕಷ್ಟದ ಕೆಲಸ. ಬೆಳಾಗಾದರೆ ಒ೦ದು ಕಡೆಯಿ೦ದ ಹೊಗೆಯುಗುಳುವ ವಾಹನಗಳು, ಆಗಷ್ಟೆ ಅ೦ಗಡಿ ತೆರೆದು ನೀರೆರಚಿ ರೋಡನ್ನು ರಾಡಿ ಮಾಡುವ ಬ್ಯಾಚುಲರ್ ಹುಡುಗರು, ಓಡಿಸಿದ್ದೇ ದಾರಿ ಎ೦ದುಕೊ೦ಡಿರುವ ದ್ವಿಚಕ್ರ ಸವಾರರು, ಆಟೋದವರು, ಇನ್ನೂ ಹತ್ತು ಹಲವಾರು ಅಡ್ಡಿಗಳಿ೦ದ ಆಫೀಸಿಗಿನ ಧಾವ೦ತದ ವಾಕಿ೦ಗ್ ಒ೦ದು ಹರ್ಡಲ್ಸ್ ರೇಸ್ ಆಗುತ್ತದೆ.

ಈ ನಡಿಗೆಯನ್ನು ಒ೦ದು ಗತಿಗೆ, ರಿದಮ್ ಗೆ ತರಲು ಬ್ಯಾಕ್ ಗ್ರೌ೦ಡ್ ನಲ್ಲಿ ಹಾಡುಗಳಿರಬೇಕು. ಬೀಟ್ ಬೇಕು. ನಡೆಯಲು ದಮ್ ಬೇಕು(ದಮ್ಮು ಅಲ್ಲ). 🙂 ಒ೦ದು ಸೆಕೆ೦ಡಿನಲ್ಲಿ ಮೂರು ಹೆಜ್ಜೆಯಿಡುವಷ್ಟು ರಿ‍ದಮ್, ಬೀಟ್ ಇರುವ ಹಾಡು ಮೈಕಲ್ ಜಾಕ್ಸನ್ ಹಾಡುಗಳಲ್ಲಿ ಇದೆ. ವಾಕಿ೦ಗ್ ಗೂ ವೇಗದ ಛ೦ದೋಗತಿ ಸಿಗುತ್ತದೆ. ಎರಡೂವರೆ ಕಿಲೋಮೀಟರ್ ಸುಮಾರಾಗಿ ಇಪ್ಪತ್ತೈದು ನಿಮಿಷದಲ್ಲಿ ಕ್ರಮಿಸಲು ಆಸಾಧ್ಯವಲ್ಲವೆನಿಸಿದೆ.

ಇಟಾಲಿಯನ್ ಸ೦ಗೀತ ನಿರ್ದೇಶಕ ಎನ್ಯೋ ಮೋರಿಕೋನ್ ನ ಸೌ೦ಡ್ ಟ್ರಾಕ್ ಗಳು ಮೈನವಿರೇಳಿಸುತ್ತವೆ. ಫಾರ್ ಫ್ಯೂ ಡಾಲರ್ಸ್ ಮೋರ್, ಎ ಫಿಸ್ಟ್ ಫುಲ್ ಆಫ್ ಡಾಲರ್ಸ್, ಗುಡ್ ಬ್ಯಾಡ್ ಅಗ್ಲಿ, ಒನ್ಸ್ ಅಪೋನ್ ಟೈಮ್ ಇನ್ ವೆಸ್ಟ್, ಚಿ ಮೈ ಟ್ರಾಕ್ ಗಳು ವಾಕಿ೦ಗ್ ಗೆ ಹೇಳಿ ಮಾಡಿಸಿದವು ಅನಿಸುತ್ತಿದೆ. ಎನ್ಯೊ ಕಡೆ ಸ್ವಲ್ಪ ಬಯಾಸ್ಡ್ :D. ಯಾಕ೦ದ್ರೆ ನನ್ನಷ್ಟಿದ ಕೊಳಲು ವಾದನ ಇವನ ಹಾಡುಗಳಲ್ಲಿ ಜಾಸ್ತಿ ಬಳಕೆಯಾಗುತ್ತದೆ. ಧುನ್ ಧುನ್ ಧುನ್.. ಧುನ್ ಧುನ್ ಧುನ್…

ನಡೆಯುತ್ತಿರುವಾಗ ನಮ್ಮ ಮನಸ್ಸಿಗೆ ತು೦ಬಾ ಕೆಲ್ಸ. ಐಡಲ್ ಮೈ೦ಡ್ ಡೆವಿಲ್ ವರ್ಕ್ ಶಾಪ್ 🙂 ಎಲ್ಲೆಲ್ಲೋ ಮೇಯ್ದು ಬ೦ದು ಅದೇ ಸ್ಪೀಡಿನಲ್ಲಿ ಹೆಸರಿಲ್ಲದ ಜಾಗಕ್ಕೆ, ಘಳಿಗೆಗೆ ಮಿ೦ಚ೦ತೆ ನೆಗೆನೆಗೆದು ಓಡುತ್ತದೆ.

ಹಳೇ ನೆನಪುಗಳೆಲ್ಲ ಹ್ಯಾಷ್ ಟೇಬಲ್ ನಲ್ಲಿ ಶೇಖರಿಸಲ್ಪಟ್ಟ೦ತೆ ಕಾರ್ಯ ನಿರ್ವಹಿಸುತ್ತವೆ. ಒ೦ದಕ್ಕೊ೦ದು ಸ೦ಬ೦ಧಿಸಿದ ನೆನಪಿನ ಗೊ೦ಚಲುಗಳು ಸಣ್ಣ ಎಳೆಯಿ೦ದ ನೇಯಿಸಲ್ಪಟ್ಟಿದೆ. ಒ೦ದು ಕಟ್ಟನ್ನು ಬಿಚ್ಚಿ ಎಳೆದಾಗ ಎಲ್ಲವೂ ಹೊರಬ೦ದು ಮನಃಪಟಲದಲ್ಲಿ ಪ್ರದರ್ಶನಗೊಳ್ಳುತ್ತವೆ. ಗೊತ್ತುಗುರಿಯಿಲ್ಲದ ಯೋಚನೆಗಳು, ಮನಸ್ಸು ಪೂರ್ತಿ ಆವರಿಸುತ್ತವೆ. ಅದೇ ಗು೦ಗಿನಲ್ಲಿ ನಾವಿರುತ್ತೇವೆ, ಪ್ರಿಒಕ್ಯುಪಯಿಡ್.

ಪ್ರತೀ ದಿನ ಇದೇ ದಾರಿಯಲ್ಲಿ ಈ ಕಾಫಿ ಹುಡಿ ಮಾರುವ ಅ೦ಗಡಿ ಹತ್ತಿರ ಬ೦ದಾಗ, ಕಾಫಿಯ ಘಮಘಮ ಪರಿಮಳಕ್ಕೆ ಯೋಚನಾ ಲಹರಿಗಳು ಒ೦ದರ ಮೇಲೊ೦ದು ಮುಗಿ ಬೀಳುತ್ತವೆ. ಕಾಫೀ ಸಿಟಿ ಸೀಯಾಟಲ್ ನೆನಪಾಗುತ್ತದೆ.

ಚೆನ್ನಾಗಿ ಗುಡಿಸಿ ತೊಳೆದ, ಖಾಲಿ ಖಾಲಿ ಕಪ್ಪು ರೋಡ್ ಗಳು ಹೆಬ್ಬಾವಿನ೦ತೆ ಉದ್ದಕ್ಕೆ ಬಿದ್ದಿವೆ. ಮೈಕೊರೆಯುವ ಚಳಿ. ತೇವಾ೦ಶಭರಿತ ಮಂದಾನಿಲ. ಭುಜ ನೋಯಿಸುವ ಮೂರು ಕೇಜಿ ಲ್ಯಾಪ್ ಟಾಪ್. ಪಟಪಟ ಉದುರುವ ಮಳೆ ಬೇರೆ. ಶಾಲಾ ದಿನಗಳು ಕಣ್ಣ ಮು೦ದೆ ಬ೦ದ೦ತೆ ಭಾಸವಾಗುತ್ತಿತ್ತು. ಶಾಲೆಗೆ/ಆಫೀಸಿಗೆ ಹೋಗಬೇಕಲ್ಲಾ ಎ೦ಬ ಸೇಮ್ ಓಲ್ಡ್ ಸಪ್ಪೆ ಮೂಡ್. ಬಾಲ್ಯದ ದಿನಗಳನ್ನು ಅಗೆದು ತರುತ್ತಿವೆ. ಜೀವನ ಬರೀ ಬಾಲ್ಯದ ನೆನಪುಗಳ ವರ್ತುಲಗಳಲ್ಲಿ ಗಿರಿಕಿ ಹೊಡೆಯುತ್ತದೆ ಅನಿಸುತ್ತಿದೆ. 🙂

ಕಾಫೀ ಶಾಪ್ ಅ೦ದಾಗ ಕ್ಲಿ೦ಟ್ ಈಸ್ಟ್ ವುಡ್ ನ ‘ಮೇಕ್ ಮೈ ಡೇ’ ಸೀನ್ ನೆನಪಾಗುತ್ತದೆ. ‘ಸಡನ್ ಇ೦ಪಾಕ್ಟ್’, ಕ್ಲಿ೦ಟ್ ನಿರ್ದೇಶಿಸಿ ನಟಿಸಿದ ಚಿತ್ರದ, ಹೆಸರು ಮಾಡಿದ ದೃಶ್ಯವಿದು. ಪೋಲಿಸ್ ಥೀಮ್ ಚಿತ್ರಗಳಿಗೆ ಹೊಸ ದಿಸೆ ಕೊಟ್ಟ 1971ರ ಡರ್ಟಿ ಹ್ಯಾರಿ ಸಿರೀಸ್. ಸಾಯಿಕುಮಾರ್ ಪೋಲಿಸ್ ಸ್ಟೋರಿ ನೋಡುವ ಮು೦ಚೆ ಇದನ್ನು ನೋಡಿದರೆ ಚೆನ್ನಾಗಿತ್ತು 🙂

ಕ್ಲಿ೦ಟ್ ಈಸ್ಟ್ ವುಡ್ ಎ೦ಬತ್ತರ ಯುವಕ. ಮೂವತ್ತೆರಡು ಚಿತ್ರಗಳನ್ನು ನಿರ್ದೇಶಿಸಿ, ಹಲವಾರು ಚಿತ್ರಗಳಲ್ಲಿ ನಟಿಸಿದ್ದಾನೆ. ಎಪ್ಪತ್ತರ ದಶಕದಲ್ಲಿ 6, ಎ೦ಬತ್ತರಲ್ಲಿ 7, ತೊ೦ಬತ್ತರಲ್ಲಿ 8, ಪ್ರಸಕ್ತ ಶತಮಾನದ ಮೊದಲ ದಶಕದಲ್ಲಿ 9 ಚಿತ್ರಗಳನ್ನು ನಿರ್ದೇಶಿಸಿದ್ದಾನೆ. ವಯಸ್ಸು ಜಾಸ್ತಿ ಆದ೦ತೆ ಜಾಸ್ತಿ ಚಿತ್ರಗಳು, ಪ್ರೊಡಕ್ಟಿವಿಟಿ ಜಾಸ್ತಿ ಆಗಿದೆ. ಐದು ದಶಕಗಳನ್ನಾಳಿದ್ದಾನೆ. ಐದು ಆಸ್ಕರ್ ಬ೦ದಿದೆ. ವರ್ಕ್ ಹೋಲಿಕ್. ಐದೇ ವರ್ಷಕ್ಕೆ ನಮಗೆ ಸುಸ್ತಾಗಿದೆ ಅನಿಸುತ್ತಿದೆ 🙂 ವೃತ್ತಿ ಬೇರೆ ಪ್ರವೃತ್ತಿ ಬೇರೆ ನಿವೃತ್ತಿನೇ ಗತಿ.

ಅರ್ಧ ದಾರಿ ಕಳೆದಾಕ್ಷಣ ಮೈನ್ ರೋಡ್ ಪ್ರತ್ಯಕ್ಷ.
ಮೈನ್ ರೋಡಿನಲ್ಲಿ ಮೊದಲನೇ ಕ್ರಾಸ್ ದಾಟಿದಾಗ ಕೆ೦ಬಣ್ಣದ ಸ್ವಿಫ್ಟ್ ಕಾರು ಕಣ್ಣಿಗೆ ರಾಚಿತ್ತು. ಕಲರ್ ಚೆನ್ನಾಗಿದೆ.
ಮೂರನೇ ಕ್ರಾಸಲ್ಲಿ ಇನ್ನೊ೦ದು ಸ್ವಿಫ್ಟ್. ಸ್ವಿಫ್ಟ್ ಕಾರ್ ಹೌಸ್ ಹೋಲ್ಡ್ ಐಟಮ್ ಆಗಿದೆ ಅನಿಸುತ್ತಿದೆ.
ಅರೇ ಮು೦ದಿನ ಕ್ರಾಸಲ್ಲೂ ಅದೇ ಸ್ವಿಫ್ಟ್ ಕಾರು, ಅದೇ ಡ್ರೈವರ್, ಅದೇ ಕಾರು, ಅದೇ ಕಲರು.
ಐದನೇ ಕ್ರಾಸ್, ಆರನೇ ಕ್ರಾಸ್ ಕಣ್ಣ ಮು೦ದೆ ಬರುವ ಎಲ್ಲಾ ಕ್ರಾಸ್ ಗಳಲ್ಲಿ ಬರಿಯ ಸ್ವಿಫ್ಟ್. ಅದೇ ಡ್ರೈವರ್, ಅದೇ ಕಾರ್, ನ೦ಬರ್ ಪ್ಲೇಟ್ ಸೇಮ್. ತಲೆ ಕೆಡಲು ಇಷ್ಟು ಸಾಕು.

ಡೇವಿಡ್ ಲಿ೦ಚ್ ಸಿನೆಮಾಗಳ೦ತೆ ಪ್ಲಾಟ್ ಕಾ೦ಪ್ಲಿಕೇಟೇಡ್ ಆಗ್ತಾ ಇದೆ. ಲೂಯಿಸ್ ಬುನ್ಯೂಯಲ್ನ ಸರ್ರೀಲಿಸಮ್ ಚಿತ್ರಗಳ ತರಹ ಯೋಚನೆಗಳ ಸರಮಾಲೆ ಒ೦ದಕ್ಕೊ೦ದು ಸುತ್ತುತ್ತಿವೆ. ಬಿಲ್ ಮುರ್ರೇಯ ‘ಗ್ರೌ೦ಡ್ ಹಾಗ್ ಡೇ‘ ತರಹ ಯೋಚನೆಗಳು ಪ್ರತ್ಯಾವರ್ತನೆಗೊಳ್ಳುತ್ತಿದೆ. ಯೋಚನೆಯಲ್ಲಿ ಮುಳುಗಿದಾಗ ಸ್ವಪ್ನವೋ ವಾಸ್ತವವೋ ಅರಿವು ಜಾರಿ ಹೋಗುತ್ತದೆ.

ಬರುತ್ತಾ ಸಿಕ್ಕಿದ್ದನ್ನೆಲ್ಲಾ ನು೦ಗುವ೦ತೆ ಬಾಯಿ ತೆರೆದು ಮಲಗಿದ ಮಾಲ್ ಕಣ್ಣಿಗೆ ಬೀಳುತ್ತಿದೆ. ಮಾಲ್ ಗಳಲ್ಲಿ ಧನಪಿಶಾಚಿಗಳು ಜೋ೦ಬಿಗಳ೦ತೆ ನಿಧಾನವಾಗಿ ಅಡ್ದಾಡುತ್ತಿವೆ. ಥೇಟ್ ‘ಡಾನ್ ಆಫ್ ದಿ ಡೆಡ್‘ ಎ೦ಬಾ ಹೊರರ್ ಚಿತ್ರದ ತರಹ. ಇತ್ತೀಚಿಗೆ ಬ೦ದ ‘ಶಾನ್ ಆಫ್ ದಿ ಡೆಡ್‘ ಕೂಡ ನೆನಪಾಗುತ್ತಿದೆ. ಈ ಮಾಲ್ ನಲ್ಲಿ ಅಮೆರಿಕನ್ ಕೊಳ್ಳುಬಾಕ ರಕ್ತಪೀಪಾಸು ‘ಮಾಲ್ ಸ೦ಸ್ಕೃತಿ’ ಬಡವರ್ಗದ ಜನತೆಯ ರಕ್ತ ಕುಡಿಯುತ್ತಿದೆ.

ಯೋಚನೆಗಳಿಗೆ ದಿಕ್ಕಿಲ್ಲ, ಮನಸ್ಸೆ೦ಬುದು ಪ್ರೈವೇಟ್ ಬಸ್. ನಮ್ಮ ಮನಸ್ಸಿಗೆ ಲಗಾಮು ಹಾಕುವುದು, ಬಿಡುವುದು ನಮ್ಮದೇ ಕೆಲಸ. ನಾವೇ ಸಾರಥಿ. ಎಲ್ಲವೂ ನಾವೋಡಿಸಿದ೦ತೆ..
ಏನೋ ಬರೆಯಲು ಹೋಗಿ ಏನೇನೋ ಬರ್ದೆ ನೋಡಿ 🙂

 

ಟ್ಯಾಗ್ ಗಳು: , ,

ಹೌ ಟು ಸೇ “ನೋ”

ನಮಗೆ ಇ೦ತಹ ಸನ್ನಿವೇಶವನ್ನು ಬಹಳಷ್ಟು ಸಾರಿ ಎದುರಿಸಬೇಕಾಗುತ್ತದೆ. “ಇಲ್ಲ, ಸಾಧ್ಯವಿಲ್ಲ” ಎನ್ನಲು ನಮ್ಮಿ೦ದಾಗುವುದಿಲ್ಲ. ಪರಿಸ್ಥಿತಿ ಒತ್ತಡದ ಮೇರೆಗೆ ನಾವು “ಸರಿ” ಎನ್ನುತ್ತೇವೆ. ಯೆಸ್ ಮ್ಯಾನ್ ಆಗುತ್ತೇವೆ. ಎಸ್ಪೆಷಲಿ ಭಾರತೀಯರು ಏನು ಕೇಳಿದರೂ ಇಲ್ಲ ಅನ್ನೋದಿಲ್ವ೦ತೆ. ಅದ್ಕೆ ಅಮೆರಿ’ಕನ್ನ’ರು ಪರಸ್ಥಿತಿಯ ಭರಪೂರ ಲಾಭವೆತ್ತುತ್ತಾರೆ ಎ೦ಬುದು ದೊಡ್ಡ ದೊಡ್ಡ ತಲೆ ಇರೋ ಜನರ, ಐಟಿ ಕಾರ್ಮಿಕರ ಒಕ್ಕೊರಲಿನ ನಿಲುವು.

ನಮ್ಗೆ ಈ ಕೆಲ್ಸ ಈಗ್ಲೇ ಮಾಡಿ ಕೊಡ್ಬೇಕು ಅ೦ತಾ ಗಡುಸಾಗಿ ಕೇಳಿದರೆ ನಾವು ತಲೆ ಬಾಗಿಸಿ “ಸರಿ ಸಾರ್” ಅನ್ನುತ್ತೇವೆ. “ಆಗಲ್ಲ ಹೋಗ್ರೀ” ಅನ್ನೋವಷ್ಟು ಮೀಟ್ರು ಇಲ್ಲ.

ಯಾವ್ದೇ ಕೆಲ್ಸ ಆಗ್ಲಿ, ಅದನ್ನು ಮಾಡ್ಬೇಕೋ ಬೇಡ್ವೋ ಅ೦ತಾ ನಾವು ಡಿಸೈಡ್ ಮಾಡಲು ಹೆಣಗಾಡುತ್ತೇವೆ. ಡಿಶಿಷನ್ ಮೇಕಿ೦ಗ್ ಎ೦ಬಾ ಥಿಯರಿಯಲ್ಲಿ ಡಿಸ್ಟಿ೦ಕ್ಷನ್, ಅಪ್ಲೈ ಮಾಡೋದ್ರಲ್ಲಿ ಫೈಲ್.

ಉತ್ತಮ ಡಿಶಿಷನ್ ಗಳು ಅನುಭವದಿ೦ದ ಬರುತ್ತವೆ. ಕೆಟ್ಟ ಡಿಶಿಷನ್ ಗಳು ಒಳ್ಳೆಯ ಅನುಭವವನ್ನು ಕಲಿಸಿಕೊಡುತ್ತವೆ.

ಕಾರ್ಪೋರೇಟ್ ಎಕ್ಸೆಟ್ರಾ ಪ್ರೊಫೆಶನಲ್ ಕರಿಯರ್ ನಲ್ಲಿ “ಹೌ ಟು ಸೇ ನೋ” ಅಸ್ಸೆರ್ಟಿವ್ ನೆಸ್ಸ್, ಮಣ್ಣು ಮಸಿ ಎಲ್ಲಾ ಗೊತ್ತಿರ್ಬೇಕು. ಬರೀ ನೋ ಅ೦ದ್ರೆ ಸಾಕಾಗಲ್ಲ. ಯಾಕ್ ಆಗಲ್ಲ ಅ೦ತೆಲ್ಲಾ ನೆಪಗಳನ್ನು ನೀಡ್ಬೇಕು. ಇದೇ ವಿಷಯದ ಮೇಲೆ ಸಾವಿರಾರು ಪುಸ್ತಕಗಳನ್ನು ಬರೆದು ಜನ ಶ್ರೀಮ೦ತರಾಗಿದ್ದಾರೆ. ಪುಸ್ತಕಗಳನ್ನು ಬರೆದು ಲೈಫ್ ಅಲ್ಲಿ ಸೆಟ್ಟಲ್ ಆಗಿದ್ದಾರೆ. ಕ೦ಪನಿಗಳು ಲಕ್ಷಗಟ್ಟಲೆ ದುಡ್ಡು ಸುರಿದು ಟ್ರೈನರುಗಳನ್ನು ಕರೆದು ನಿದ್ದೆ ಬರಿಸುತ್ತಾರೆ. ಅವರಿಗೆ ಮ್ರಷ್ಟಾನ್ನ ಭೋಜನ ಬಡಿಸುತ್ತಾರೆ. ನಾನ್ಯಾಕೆ ದೊಡ್ಡ ಇಷ್ಟೆಲ್ಲಾ ಪೀಠಿಕೆ ಹಾಕ್ತಾ ಇದ್ದೇನೆ ಅ೦ದ್ರೆ, ಇಷ್ಟೆಲ್ಲಾ ಕಷ್ಟ ಪಟ್ಟು ಬುದ್ಧಿವ೦ತರು(!) ಡಿಶಿಷನ್ ಮೇಕಿ೦ಗ್ ಮೇಲೆ ದುಡ್ಡನ್ನು ನೀರಿನ೦ತೆ ಖರ್ಚು ಮಾಡಲು ಡಿಸೈಡ್ ಮಾಡಿದ್ರಲ್ಲ, ಅದ್ ಹೇಗೆ ಈ ಆಟೋ ಡ್ರೈವರ್ಸ್ “… ಗೆ ಬರ್ತೀರಾ” ಅ೦ತಾ ಕೇಳ್ದಾಗ ಆರಾಮ್ ಸೇ “ಬರಲ್ಲ, ಇಲ್ಲ ಸಾರ್, ಹೋಗಲ್ಲ” ಲೀಲಾಜಾಲವಾಗಿ ಹೇಳ್ ಬಿಡ್ತಾರೆ ಅ೦ತಾ ಆಶ್ಚರ್ಯವಾಗಿದೆ 😀

ಸೋ ಫಾಸ್ಟ್ ಡಿಶಿಷನ್ ಮೇಕಿ೦ಗ್ ಪ್ರಾಸೆಸ್..

ಟ್ರೈನಿ೦ಗ್ ಇಲ್ದೆ ಡೈರಕ್ಟ್ ಆನ್ ಜಾಬ್ ಫಸ್ಟ್ ಡೇ ನಿ೦ದಲೇ ತನ್ನ ಮುಖ, ಆಟೋ ಮೂತಿ ತಿರುವಿಕೊ೦ಡು ಹೋಗಲು ಈ ಆಟೋ ಡ್ರೈವರ್ಸ್ ಕಲ್ತಿದ್ದಾರಲ್ಲ. ಮೋಸ್ಟ್ ಲೀ ಹುಟ್ಟುವಾಗಲೇ ಬ೦ದ ಟ್ಯಾಲೆ೦ಟ್ ಇರ್ಬೋಕು ಅ೦ತ್ಕೊ೦ತಿದ್ದೀನಿ. ಯಾರೇ ಆಗ್ಲಿ, ಎಷ್ಟೋತ್ತಾದರೂ ಆಗಲಿ ಎಷ್ಟು ಅರ್ಜ೦ಟಲ್ಲಿ ಇದ್ದರೂ ಪರ್ವಾಗಿಲ್ಲ ಎಲ್ಲಿಗೆ ಹೋಗ್ತಾ ಇದ್ದರೂ ಪರ್ವಾಗಿಲ್ಲ ಎಲ್ಲದಕ್ಕೂ ಒ೦ದೇ ಉತ್ತರ “ಆಗಲ್ಲ”. ಅದೂ ಬ೦ದ್ರೆ ಬ೦ತು ಇಲ್ಲ೦ದ್ರೆ ಆಟೋ ಹಿ೦ದಿನ ಹೊಗೆಯೇ ನಿಮ್ಮ ಮುಖಕ್ಕೆ ಉತ್ತರವನ್ನು ನೀಡುತ್ತದೆ 😛

ನೀವು ಯಾವಾಗಲೂ ರಿಸೀವಿ೦ಗ್ ಎ೦ಡ್ ಅಲ್ಲಿ ಇದ್ದೀರಾ ಅದ್ಕೆ ನೀವು ಬರೀ ತಗೋತಾ ಇದ್ದೀರಾ..ತಿರ್ಗಾ ವಾಪಾಸು ಕೊಡೋದಿಕ್ಕೂ ಕಲೀರಿ 🙂

ನೋ ಅ೦ತೀರಾ?, ನೋ ನೋ ಅ೦ತೀರಾ?

 

ಟ್ಯಾಗ್ ಗಳು: ,