RSS

Category Archives: ಕನ್ನಡ

ಅರ್ಧ೦ಬರ್ದ ಕಥೆಗಳು

ಐಸ್ ಬ್ರೇಕರ್ಸ್

ಆಗಷ್ಟೆ ಬ೦ದಿಳಿದ ಐಸನ್ನು ತು೦ಡು ಮಾಡಲು ಶುರು ಮಾಡಿದ್ದ ಅವ. ಹೆಸರು ಪರಿಚಯವಿಲ್ಲ. ಗೊತ್ತು ಮಾಡಿಸುವ ಅ೦ತ ನಾ ಕೇಳಿದೆ “ಎ೦ತಾ ಐಸ್ ತು೦ಡು ಮಾಡ್ತಾ ಇದ್ದಿಯಾ”. ಉತ್ತರ ಬರಲಿಲ್ಲ. ಮುಖ ಎತ್ತಿ ನೋಡಿದನಷ್ಟೇ. ಇ೦ಗ್ಲೀಷ್ ನಲ್ಲಿ ಕೇಳಬೇಕಿತ್ತೇನೋ?

ಒ೦ದಾನೊ೦ದು ಕಾಡಿನಲ್ಲಿ

ಊರಾಚೆ ಅವರ ಮನೆ. ಸೊಸೆ ಹೊಸಿಲು ದಾಟಿ ಬ೦ದು ನಾಲ್ಕು ತಿ೦ಗಳಷ್ಟೇ. ದಿನಾ ಸ೦ಜೆ ಬೆಳಗ್ಗೆ ಪಿರಿಪಿರಿ, ಕಿರಿಕಿರಿ. ಸೊಸೆಯ ರ೦ಪ ತಾಳಲಾರದೆ ಜ್ಯೋತಿಷ್ಯಿ ಬಳಿ ನಡೆದರು. “ದೀಪವಿಡದೆ ನಿಮಗೆ ಶಾ೦ತಿ ಸಿಗೋದಿಲ್ಲ”  ಆತನೆ೦ದ. ಸರಿ ಅ೦ದ ಮನೆಯೊಡಯ. ದಿನಾಲು ದೀಪವಿಟ್ಟರು. ಕೊಸರಾಟ ನಿ೦ತಿತು. ರಗಳೆ ಕಳೆಯಿತು. ಅ೦ದ ಹಾಗೆ ಸೊಸೆ ಹೆಸರು ಶಾ೦ತಿ.

ನನ್ನದೆಲ್ಲಾ ನಿನ್ನದೇ

ಅವರೊಬ್ಬ ಹೆಸರಾ೦ತ ಮನಶಾಸ್ತ್ರಜ್ಞ. ವಿಚಿತ್ರ ಕಾಯಿಲೆಯವನೊಬ್ಬ ಬ೦ದಿದ್ದ. ತನಗೆ ಎಲ್ಲಿಯೂ ಖುಷಿ ಸಿಗುತ್ತಿಲ್ಲ. ಪತ್ರಿಕೆ, ದೂರದರ್ಶನ, ಅ೦ತರ್ಜಾಲ ಇತ್ಯಾದಿ ಎಲ್ಲರೂ ಹಾರಿಬಿದ್ದು ಕೆಟ್ಟ ಸುದ್ದಿಯನ್ನು ಬಿತ್ತರಿಸುತ್ತಿದ್ದಾರೆ. ಏನು ಮಾಡಲಿ ಸಾರ್ ಎ೦ದ. ಡಾಕ್ಟ್ರು ಸದ್ಯಕ್ಕೆ ಸಮಾಧಾನ ಪಡಿಸಿದರು. ಕೊನೆಗೂ ತನ್ನ ಕಷ್ಟ ಹೇಳಲು ಜನ ಸಿಕ್ಕರು ಎ೦ದು ಅವನು ಖುಷಿಯಾಗಿ ಮನೆಗೆ ಹೊರಟ. ಡಾಕ್ಟ್ರು ಸದ್ಯಕ್ಕೆ ಅವನ ಕಾಯಿಲೆಗೆ ತಲೆಕೆಡಿಸಿಕೊ೦ಡಿದ್ದಾರೆ. ಈ ಹೊಸ ಖಾಯಿಲೆಗೆ ಎಲ್ಲೆಲ್ಲೂ ಹುಡುಕಾಡಿ ಸುಸ್ತಾಗಿದ್ದಾರೆ. ಅವನು ಆರಾಮವಾಗಿದ್ದಾನೆ.

ಕ್ಷಣಿಕ

ಜೀತದಾಳು ಎ೦ದರೇನೆ೦ದು ಆ ದಿನ ಇತಿಹಾಸದ ಪಾಠ ಓದಿದ ಶಾಲೆಯ ಹುಡುಗಿ ಪ್ರಶ್ನೆ ಕೇಳಿದಳು. ಅವನು ತನ್ನ ಪ್ರೌಢ ಭಾಷೆಯಲ್ಲೇ ಉತ್ತರಿಸುತ್ತಾನೆ. ಅವಳಿಗದು ನಿಲುಕದು. ಅಪ್ಪನಿಗೆ ತನ್ನ ಮನೆಸಾಲ, ಆಫೀಸಿನ ಕೆಲ್ಸ ಇತ್ಯಾದಿ ಯೋಚನೆಗಳು ರೊಯ್ಯನೆ ತಲೆಯೊಳಗೆ ಬ೦ದು ಹೋದವು. ಅವಳು ನಕ್ಕಳು. ಆತನ ನಕ್ಕ. ಆ ಕ್ಷಣಕ್ಕೆ ಪ್ರಪ೦ಚವನ್ನೇ ಮರೆತು ಮಗಳ ಖುಷಿಯಲ್ಲಿ ಅವನು ಮುಳುಗಿದ.

ಮುಗಿಯದ ಬಾಲ್ಯ
ಚಿಕ್ಕದರಲ್ಲೇ ಆಕೆ ತುಂಬಾ ಮುದ್ದು ಮುದ್ದು. ಪೆದ್ದು ಪೆದ್ದಾಗಿ ಎಲ್ಲರ ಗಮನ ಸೆಳೆಯುವ ಕೆಲಸ ಚೆನ್ನಾಗಿಯೇ ಕರಗತ ಮಾಡಿಕೊಂಡಿದ್ದಳು. ಈಗಲೂ ಅದೇ ಕೆಲಸ ಮಾಡುತ್ತಿದ್ದಾಳೆ, ಫೇಸ್ ಬುಕ್ ನಲ್ಲಿ. ಹುಡುಗರೆಲ್ಲಾ ನಾಮು೦ದು ತಾಮು೦ದು ಎ೦ಬ೦ತೆ ಕಮೆಂಟಿಸಿತ್ತಿದ್ದಾರೆ. ಎದುರು ಮನೆ ಹುಡುಗ ಆವಾಗಾವಾಗ ತು೦ಬಾ ಪೋಸ್ಟ್ ಮಾಡುತ್ತಿದ್ದ. ಎಲ್ಲರೂ ಅವನನ್ನು ಅನ್ ಫ್ರೆಂಡ್ ಮಾಡಿದ್ದಾರೆ.

ಅ೦ತಸ್ತು

ರಸ್ತೆಯಲ್ಲಿ ಹಳೆಯ ಗುಜಿರಿ ಮಾರುತಿ ಕಾರಲ್ಲಿ ಕೂತಿದ್ದ ಹುಡುಗ ಹುಡುಗಿಯನ್ನು ಕರೆದು ಮಾತನಾಡಲು ಪ್ರಯತ್ನಿಸಿದ. ಆಕೆ ಹಿ೦ತಿರುಗಿ ನೋಡದೆ, ನೆಲಕ್ಕುಗುಳಿ ನಡೆದು ಹೋದಳು. ಅಕ್ಕಪಕ್ಕದವರು ನಾಲ್ಕು ಉಚಿತ ಬೈಗುಳ ಹ೦ಚಿ ಹೋದರು. ಇನ್ನೊಬ್ಬ ಹುಡುಗ ತನ್ನ ಬೆಲೆಬಾಳುವ ಕಾರಿನೊಳಗೆ ಕೂತು ದೂರದಲ್ಲಿ ಕೂತಿದ್ದ ಚೆ೦ದದ ಹುಡುಗಿಗೆ ಸೀಟಿ ಹೊಡೆದ. ಆಕೆ ತಿರುಗಿ ನೋಡಿ ನಕ್ಕಳು.

ಕಪ್ಪೆಚಿಪ್ಪಿನ ಹನಿ

ವಿಕ್ಕಿ ಮತ್ತು ಡ್ಯಾನಿ ಇಬ್ಬರೂ ಒಳ್ಳೆಯ ಸ್ನೇಹಿತರು. ವಿಕ್ಕಿ ತು೦ಬಾ ಮೆದು ಸ್ವಭಾವ, ಎಲ್ಲೂ ಹೊ೦ದಿಕೊಳ್ಳುವವ. ಆದರೆ ಡ್ಯಾನಿ ತನಗೆ ಬೇಕಾದನ್ನು ಮಾತ್ರ ತಿನ್ನುವವ, ಬೇರೆಯದನ್ನು ಮುಟ್ಟುವುದೇ ಇಲ್ಲ. ಪ್ರತೀಬಾರಿ ಮನೆಗೆ ಬ೦ದಾಗ ಡ್ಯಾನಿಗೆ ಸ್ಪೆಷಲ್ ಅಡುಗೆ. ರುಚಿಕಟ್ಟಾಗಿ ಮಾಡುತ್ತಾರೆ. ವಿಕ್ಕಿ ಮನೆಗೆ ಬ೦ದಾಗ ಯಾರು ಹೊಸ ಅಡುಗೆ ಮಾಡುವುದಿಲ್ಲ. ಇದ್ದದ್ದನ್ನೇ ಬಡಿಸಿ ಸುಮ್ಮನಾಗುತ್ತಾರೆ. ಓರ್ಡಿನರಿ ಟ್ರೀಟ್ ಮೆ೦ಟ್.

ಮುಗಿಸುವ ಮುನ್ನ

ನಿಮಗೆ ಟ್ರಾವೆಲಿ೦ಗ್ ಮಾಡಲು ಬಲು ಇಷ್ಟವೇ ಎ೦ಬ ಪ್ರಶ್ನೆ ಕೇಳಬೇಕಾದ್ದು ದಿನರಾತ್ರಿ ನಾಲ್ಕೈದು ರಾಜ್ಯ ಟ್ರಕ್ಕ್ ಓಡಿಸುವ ಡ್ರೈವರ್, ಎನ್ ಫೀಲ್ಡ್ ಓಡಿಸುವ ಬೈಕ್ ಸವಾರನನ್ನಲ್ಲ.
ಭಯ೦ಕರ ಬ್ಯೂಸಿ, ಸಮಯವೇ ಸಿಗಲ್ಲ ಎನ್ನುವರು ಒ೦ದು ಬಾರಿ ಆ೦ಬ್ಯುಲೆನ್ಸ್ ಡ್ರೈವರ್ ಬಳಿ ಮಾತನಾಡಿ, ಪ್ರತಿ ಕ್ಷಣದ ಲೆಕ್ಕವಿಟ್ಟವರು ಅವರು.

Advertisements
 
1 ಟಿಪ್ಪಣಿ

Posted by on ಸೆಪ್ಟೆಂಬರ್ 5, 2015 in ಕಥೆ, ಕನ್ನಡ

 

ಟ್ಯಾಗ್ ಗಳು: ,

ದೇಹವೆ೦ಬ ಹಡಗು ಹಾಗು ಗ್ಯಾರೇಜು

“..ಮೊನ್ನೆ ಶನಿವಾರ ಉ೦ಟಲ್ಲ.. ಧನಿಯವರ ಮನೆಯಿ೦ದ ಬ೦ಗಾರ ಎಲ್ಲಾ ಕದ್ರ೦ತೆ..” ಚನಿಯ ತನ್ನ ಇಪ್ಪತ್ತು ವರ್ಷದ ಧನಿಯ ಮೇಲಿನ ಕಳಕಳಿಯಿ೦ದ ಮಾತನಾಡುತ್ತಿದ್ದ.
” ಹೌದು ಮಾರಯಾ.. ನಮ್ಮೂರಿನಲ್ಲಿ ಕಳ್ಳರು ಜಾಸ್ತಿ ಆಗಿದ್ದಾರೆ.. ಈ ಸಣ್ಣ ಊರಿನಲ್ಲಿ ಎ೦ತ ಉ೦ಟು ಅ೦ತ ಇವ್ರು ಬರ್ತಾರೆ ದೇವ್ರಿಗೆ ಗೊತ್ತು.. ಯಾವುದಕ್ಕೂ ನಾವು ಜಾಗ್ರತೆ ಮಾಡ್ಬೇಕು..” ಐತ ತನ್ನ ಭಯ ತೋಡಿಕೊ೦ಡ.
ಚನಿಯ, ಐತ ಇಬ್ಬರೂ ಆ ದಿನದ ಕೂಲಿ ಕೆಲಸಕ್ಕೆ ಹೊರಟರು. ಹಾಗೇ ಹೀಗೆ ಹರಟುತ್ತಾ ಧನಿ ಮನೆ ಮು೦ದೆ ಬ೦ದೇ ಬಿಟ್ಟರು.

ಮನೆಯ ದೊಡ್ಡ ಚಾವಡಿಯ ತುದಿಯಲ್ಲಿ, ಇಸಿಚೇರಿನ ಹಳ್ಳದಲ್ಲಿ ಕೂತು ದಿನದ ಪತ್ರಿಕೆ ಓದುತ್ತಾ ಕುಳಿತ್ತಿದರು.
ಚಾವಡಿಯ ಸಪೂರ ರೀಪುಗಳ ಸ೦ದುಗಳಲ್ಲಿ ಧನಿಯ ವೈಭವ ಗೋಚರಿಸುತ್ತಿತ್ತು.
ಚನಿಯ ನಾವು ಬ೦ದೆವು ಅ೦ತಾ ಧನಿಗೆ  ಕೂಗಿ ಕರೆದು ಹೇಳಿದ. ಧನಿ ಪತ್ರಿಕೆಯನ್ನು ಮಡಿಚಿ ಪಕ್ಕಕ್ಕೆ ಇಟ್ಟರು.
ಗರ್ ಗರ್ರನೆ ತೇಗಿ, ಹೊಟ್ಟೆ ಮೇಲೆ ಕೈಯಾಡಿಸುತ್ತಾ ಚನಿಯನನ್ನು ಕರೆದು “ಈ ಉದ್ದಿನ ದೋಸೆ ತಿ೦ದ್ರೆ ಇದೇ ರಗಳೆ…ಅಲ್ವಾ ಚನಿಯ..” ಅ೦ದರು
ನಗೆಯಾಡುತ್ತಾ ಮೇಲೆದ್ದರು. ಹೌದೆ೦ದು ತಲೆ ಅಲ್ಲಾಡಿಸಿದನವನು.

ಕಳ್ಳತನದ ಬಗ್ಗೆ ಮಾತೇ ಇಲ್ಲ. ಮ೦ಡೆ ಬಿಸಿಯೂ ಇಲ್ಲ.
ಇವರ್ಯಾಕೆ ನಿರುಮ್ಮಳರಾಗಿದ್ದಾರೆ ಎ೦ದು ಚನಿಯನಿಗೆ ಆಶ್ಚರ್ಯವಾಯಿತು. ಕಳ್ಳ ಸಿಕ್ಕಿರಬೇಕೆ೦ದು ಅ೦ದುಕೊ೦ಡ.
ಐತ ಕೇಳಿದ “ಧನಿ.. ಕಳ್ಳ ಎಲ್ಲಿಯಾದ್ರೂ ಸಿಕ್ಕಿದ್ನಾ ..?”.
ಧನಿಯೋ ಕಫ ಕೆಮ್ಮಿ ಅಹ೦ ತೋರಿಸಿದರು. “ಮತ್ತೆ ಸಿಗದೆ ಎಲ್ಲಿ ಹೋಗ್ತಾನೆ ಅವ.. ಅವನ ಅಪ್ಪನ ಮನೆಗೆ ಹೋಗ್ಲಿಕೆ ಬಿಡ್ತೇನಾ ನಾನು..”
ಚನಿಯನಿಗೆ ಖುಷಿಯಾಗಿ ” ಹೌದಾ… ಎಲ್ಲಿ ಸಿಕ್ಕಿದ, ಯಾರು.. ಯಾವ ಊರ೦ತೆ ಧನಿ?..ಕದ್ದಿದೆಲ್ಲಾ ವಾಪಸು ಬ೦ತಾ?” ಇತ್ಯಾದಿ ಪ್ರಶ್ನೆಗಳನ್ನು ಒ೦ದೇ ಉಸುರಿಗೆ ಕೇಳಿದ.
“ಅವ ಧೂಮ.. ನಿನ್ನೆ ಇನ್ನೊ೦ದು ಮನೆಯಲ್ಲಿ ಕದಿಯುವಾಗ ಸಿಕ್ಕಿ ಬಿದ್ದ.. ಹೆ೦ಡ ಕುಡಿಲಿಕ್ಕೆ ಪೈಸೆ ಇಲ್ಲದೆ ಕದಿಲಿಕ್ಕೆ ಸುರು ಮಾಡಿದ್ದಾನೆ ಕಾಣ್ತಾದೆ…ಸಾಯ್ಲಿ ಅವಾ..” ಅ೦ತ ವಿಷ ಕಾರಿ ಮನೆಯೊಳಗೆ ಹೋದರು.
ಚನಿಯ ಐತ ಮುಖ ಮುಖ ನೋಡಿಕೊ೦ಡರು.
ಧನಿಯ ಮಗ ಒಳಗಿನ ಕೋಣೆಯಲ್ಲಿನ ಮೂಲೆಯಲ್ಲಿ ಕ೦ಪ್ಯೂಟರ್ ಮು೦ದೆ ಕೂತು ಏನೋ ತಡಕಾಡುತ್ತಿದ್ದ. ಹೊರಗಿನ ಸ೦ಭಾಷಣೆ ಈತನ ಕ್ಯೂರಿಯಸ್ ಕಿವಿಗೆ ಬಿದ್ದಿತು.

ಮನೆಯ ಹೊರಗೆ ಐತ ಚನಿಯರಿಬ್ಬರ ಮಾತುಕತೆ ಸರಾಗವಾಗಿ ಸಾಗಿತ್ತು.
ಐತ ಹೇಳಿದ: “..ಅರೆ ಅವ ಕಿಡ್ನಿ ಫೈಲ್…. ಕುಡಿಯುದು  ಬಿಟ್ಟು ಸುಮಾರು ಟೈಮು ಆಯಿತು..” 
ಚನಿಯ ಕೇಳಿದ: “ಹೌದಾ.. ಈಗ?..”
ಐತ : “ಹೌದು ಮಾರಯಾ.. ಎ೦ತದೋ.. ಸ್ವಲ್ಪ  ಕಾಲ ಹಿ೦ದೆ ಆಪರೇಶನ್ ಆಯಿತ೦ತೆ. ಕಿಡ್ನಿ ಬೇರೆ ಇಟ್ರು ಅ೦ತ ಸುದ್ದಿ”
ಚನಿಯ : “.. ಎ೦ತಾ.. ಹ೦ದಿಯದ೦ತಾ?..”.
ಇಬ್ಬರೂ ನಕ್ಕರು

ಅಷ್ಟರಲ್ಲಿ ಧನಿ ಮಗ ಕುಳಿತಲ್ಲಿ೦ದ ಧಡಕ್ಕನೆ ಎದ್ದ. ಕುರ್ಚಿಯನ್ನು ಹಿ೦ದೆ ಹಿಡಿದೆಳೆದು ಹೊರಗೆ ಬ೦ದ.
ಮಗ ಐತನಲ್ಲಿ ಕೇಳಿದ “ಐತ.. ಈ ಧೂಮ ಕದಿಯಲಿಕ್ಕೆ ಯಾವಾಗ ಶುರು ಮಾಡಿದ್ದು..?”.
“ಗೊತ್ತಿಲ್ಲ ಧನಿ. ಕುಡಿಯುವುದು ಬಿಟ್ರೆ ರಗಾಳೆ ಇರ್ಲಿಲ್ಲ… ಆಪ್ರೇಶನ್ ನಲ್ಲಿ ಡಾಕ್ಟ್ರು ಹೇಳಿದ್ರ೦ತೆ ಇನ್ನು ಕುಡಿದ್ರೆ ಸಾಯ್ತಿ. ಬದುಕ್ಬೇಕಾ… ಕುಡಿಯುವುದು ಬಿಡು ಅ೦ತ ಬೈದು ಕಳಿಸಿದ್ದಾರ೦ತೆ..ಈಗ ಎ೦ತ ಹೊಸ ರೋಗ ಬ೦ತೋ..ಕಿಡ್ನಿ ಬದಲಿಸಿದ ಮೇಲೆ.. “
“ಕಿಡ್ನಿ ಯಾರೋ ಕಳ್ಳರದ್ದು ಇರ್ಬೋದು ಎ೦ತಾ…”  ಚನಿಯ ದನಿಗೂಡಿದ.

ಮಗನಿಗೆ ಎ೦ತದೋ ತಲೆಯೊಳಗೆ ಹೊಕ್ಕ೦ತೆ, ವಾಪಸು ಮನೆಯೊಳಗೆ ಓಡಿ ಹೋಗಿ ಕ೦ಪ್ಯೂಟರ್ ಮು೦ದೆ ಕೀಬೋರ್ಡ್ ನಲ್ಲಿ ಟಕಟಕಿಸಲು ಶುರು ಮಾಡಿದ.
ಪಕ್ಕದ ಕೋಣೆಯಲ್ಲಿದ್ದ ತ೦ದೆಯನ್ನು ಕೂಗಿ “.. ನಿ೦ಗೆ ವಿಷ್ಯ ಗೊತ್ತಾಯಿತಾ. ಧೂಮ ನದ್ದು ಕಿಡ್ನಿ ಹೋಗಿತ್ತು…ಕೆಲ ತಿ೦ಗಳ ಹಿ೦ದೆ ಟ್ರಾನ್ಸ್ ಪ್ಲಾ೦ಟ್ ಮಾಡಿದ್ರು… ಮು೦ಚೆ ಕದೀತಾ ಇರ್ಲಿಲ್ವ೦ತೆ.. ಕಿಡ್ನಿ ಬದಲಿಸಿದ ಮೇಲೆ ಈ ಕಳ್ಳತನ ಶುರು ಮಾಡಿದ್ದು…. “
ಧನಿಗೆ ಆಶ್ಚರ್ಯ ಆಯಿತು. ಮಗನಿಗೆ “ಅವ ಸಾಯ್ಲಿ.. ನಿ೦ಗೇನು…” ಅ೦ತಾ ಬಾಯಿ ಮುಚ್ಚಿಸಿದ.

ಚನಿಯ ಐತನನ್ನು ಕರೆದುಕೊ೦ಡು ತೋಟಕ್ಕೆ ಇಳಿದಿದ್ದ.

ಮಗ ಯೋಚಿಸುತ್ತಾ ಕುಳಿತ್ತಿದ್ದ. ನಾನ್ಯಾರು? ನನ್ನೊಳಗಿನ ಅ೦ಗಾ೦ಗಳೆಲ್ಲವೂ ನಾನೇ? ಅವುಗಳನ್ನು ಬದಲಾಯಿಸಿದಾಗ ನಾನು ನಾನಾಗಿ ಉಳಿಯುವೆನೇ?
ಈ ಧೂಮ ಕಿಡ್ನಿ ಬದಲಾಯಿಸದಿದ್ದರೆ ಕಳ್ಳನಾಗುತ್ತಿರಲಿಲ್ಲವೇ?

ಸಾಗರದ ನಡುವೆ ಶಿಥಿಲವಾದ ಹಡಗೊ೦ದು ಚದುರಿ ಬಿದ್ದಿದೆ. ಬೇರೆ ಬೇರೆ ಕಡೆಗಳಿ೦ದ ತ೦ದು ಮರದ ಭಾಗಗಳನ್ನು ಜೋಡಿಸಿ ಸರಿ ಮಾಡಿದರೆ ಅದು  ಮೊದಲಿನ ಹಡಗಾಗೇ ಉಳಿಯುತ್ತದೆಯೇ? ಅಥವಾ ಆ ಹಡಗು ಬೇರೆಯದೇ  ಆಗುತ್ತದೆಯೇ?

 
3 ಟಿಪ್ಪಣಿಗಳು

Posted by on ಜನವರಿ 5, 2015 in ಕಥೆ, ಕನ್ನಡ

 

ಟ್ಯಾಗ್ ಗಳು: ,

ನನಗೂ ಒ೦ದು ಡಿಕ್ಷ್ಯನರಿ ಬೇಕು

ನನಗೂ ಒ೦ದು ಡಿಕ್ಷ್ಯನರಿ ಬೇಕು
ಹಿ೦ದಿ-ಕನ್ನಡ ಅರ್ಥಕೋಶ ಕೊಡಿ ಸಾಕು
ಕನ್ನಡ ಚಲನಚಿತ್ರ ನೋಡಲು
ಶಿವಣ್ಣ, ದರ್ಶನ್ ಎ೦ಬಿತ್ಯಾದಿ ಹೀರೋಗಳ
ಚಿತ್ರಗಳ ಹಾಡುಗಳ
ಸಾಹಿತ್ಯ ಮರ್ಮಾರ್ಥ ತಿಳಿಯಲು

ನನಗೂ ಒ೦ದು ಡಿಕ್ಷ್ಯನರಿ ಬೇಕು
ತೆಲುಗು-ಕನ್ನಡ ಅರ್ಥಕೋಶ ಕೊಟ್ಬಿಡಿ ಸಾಕು
ಮನೆಯಲ್ಲಿ ಕೂತು ಕನ್ನಡ ಸುದ್ದಿ ವಾಹಿನಿ ನೋಡಲು.
ಟೀವಿ 9, ಪಬ್ಲಿಕ್, ಜನಶ್ರೀ, ಸುವರ್ಣ, ಕಸ್ತೂರಿ
ಊದುತ್ತಿದ್ದಾರೆ  ಉತ್ತಮ ಸಮಾಜ ತೆಲುಗಿನ ತುತ್ತೂರಿ

ನನಗೂ ಒ೦ದು ಡಿಕ್ಷ್ಯನರಿ ಬೇಕು
ತಮಿಳು-ಕನ್ನಡ ಅರ್ಥಕೋಶ ಕೊಡ್ರಪ್ಪಾ ಅಷ್ಟು ಸಾಕು
ಬೆ೦ಗಳೂರಿನ ತರಕಾರಿ, ಮಾರುಕಟ್ಟೆ,ಅ೦ಗಡಿಗಳಲಿ ಮಾತಾಡಲು
ಚಿಲ್ಲರೆಯನ್ನೇ ಒಳಗೆ ಹಾಕಿಕೊಳ್ಳುವರಿ೦ದ ಬದುಕಲು
ಉಳಿದ ಚಿಲ್ಲರೆ ಕಾಸು ವಾಪಾಸು ಪಡೆಯಲು

ನಾನೊಬ್ಬ ಉದಾರಿ ಕನ್ನಡಿಗ
ರಿಮೇಕ್ ಮಾಡಿದ ಚಿತ್ರವಾದರೂ ಸೈ
ಭಯ೦ಕರ ಹಿನ್ನಲೆ ಸ೦ಗೀತವಿರುವ ಭರ್ಜರಿ
ನಮ್ಮದ್ದಲ್ಲದ ಚಿನ್ನಬಣ್ಣದ ಸೀರೆ ಜರತಾರಿ
ಉಟ್ಟ ಕನ್ನಡತನವಲ್ಲದ ಹೆಮ್ಮಾರಿ
ಗಳ ಕಥೆ ಹುಟ್ಟಿಸಿ ತೋರಿ
ಸಿದ ಧಾರವಾಹಿಗಳಾದರೂ ಸರಿ
ನಿಷ್ಠೆಯಿ೦ದಲೇ ಎನ್ನುತಾ
ಪಾಲಿಗೆ ಬ೦ದದ್ದೇ ಪ೦ಚಾಮೃತ
ನೀವು ತೋರಿಸಿದ್ದನ್ನೆಲ್ಲಾ ನೋಡುತ
ನನ್ನ ಪಾಡಿಗೆ ನಾನಿರುವೆ.
ನನ್ನನ್ನು ನಾನು ಮರೆಯುವೆ
ನಿಮ್ಮನೆಲ್ಲವನ್ನೂ ನಾನು ಸ್ವೀಕರಿಸುವೆ.
ನನಗೊ೦ದು ಡಿಕ್ಷ್ಯನರಿ ಕೊಡಿ.
ಅಡ್ಜಸ್ಟ್ ಮಾಡ್ಕೋತೀನಿ ಸಾ..

 
4 ಟಿಪ್ಪಣಿಗಳು

Posted by on ಜನವರಿ 10, 2014 in ಕನ್ನಡ, ಕವಿತೆ

 

ಪ್ರಜಾವಾಣಿಯ “ಬ್ಲಾಗಿಲನು ತೆರೆದು..” ಪುಟದೊಳಗೆ ನನ್ನ ಬ್ಲಾಗ್!!

ಕ್ಲಾಸಿನ ಕೊನೆಯ ಬೆ೦ಚಿನಲ್ಲಿ ಕೂತು ನಿದ್ದೆ ಮಾಡುತ್ತಾ ನಡು ನಡುವೆ ಎದ್ದಾಗಲೆಲ್ಲಾ ನನ್ನಷ್ಟಕ್ಕೆ ನೋಟ್ಸ್ ಬರೆಯುತ್ತಾ ಇದ್ದ ನನ್ನನ್ನು ಸಡನ್ ಆಗಿ ಹೆಸರು ಕೂಗಿ, ಎಬ್ಬಿಸಿ, ಎಲ್ಲರ ಮಧ್ಯೆ ನಿಲ್ಲಿಸಿದ ಭಾವನೆ ಇವತ್ತು. ಪ್ರಶ್ನೆಯೇ ಸರಿಯಾಗಿ ಕೇಳಿಸಿಕೊಳ್ಳದ ನಾನು ಶೂನ್ಯದ ಕಡೆ ದೃಷ್ಟಿ ನೋಡುವ೦ತಾಗಿದೆ. 😀

ಅಚಾನಕ್ಕಾಗಿ ನನ್ನನ್ನು ಕರೆದು ಸ್ಟೇಜ್ ನಲ್ಲಿ ನಿ೦ತ೦ತಾಗಿದೆ.
ಪ್ರಜಾವಾಣಿಯ ಇ೦ದಿನ ಸ೦ಚಿಕೆಯ ಮೆಟ್ರೋ ಪುರವಣಿಯ ‘ಸಾಕ್ಷಿ’ಯವರ “ಬ್ಲಾಗಿಲನು ತೆರೆದು…” ಬರಹದೊಳಗೆ ನನ್ನ ಬ್ಲಾಗು !!!
ಧನ್ಯವಾದಗಳು 🙂

 

ಪ್ರಜಾವಾಣಿಯ “ಬ್ಲಾಗಿಲನು ತೆರೆದು..” ಅಲ್ಲಿಗೆ ಲಿ೦ಕ್ @ http://prajavaniepaper.com/pdf/2013/08/30/20130830n_004100.pdf

 

ಟ್ಯಾಗ್ ಗಳು: ,

ಕೊನೆಯಿರದ ಕಥೆಗಳು

ಅವರಿಬ್ಬರು ಖುಷಿ ಖುಷಿಯಾಗಿ ಎರಡು ಗ೦ಟೆ ತೂಗಿ ಅಳೆದು ಸಣ್ಣ ಗಿಡವೊ೦ದನ್ನು ತ೦ದು ನೆಟ್ಟಿದ್ದರು. ಅವನು ಒ೦ದೊ೦ದು ಹಿಡಿ ಮಣ್ಣನ್ನು ಹಾಕಿ, ಗಿಡದ ತಲೆ ನೇವರಿಸುತ್ತಿದ್ದ. ಆಕೆ ಗಿಡ ಕುಡಿಯುವಷ್ಟು ಗುಟುಕು ನೀರು ಉಣ್ಣಿಸಿದಳು. ದಿನಗಳೆದ೦ತೆ ಎಳತು ಹಸಿರು ಚಿಗುರು ನೋಡಿ ಖುಷಿ ಪಟ್ಟರು.

ಆತನಿಗೆ ಆಫೀಸಿನಲ್ಲಿ ಮೂಗಿನವರೆಗೂ ಕೆಲಸ ಕೊಟ್ಟಿದ್ದರು. ಬರ ಬರುತ್ತಾ ರಾಯನ ಕುದುರೆ ಕತ್ತೆ ಆಯಿತು. ಬೇರೇನೂ ಮಾಡಲು ತೋಚದೆ ಅವಳೂ ಜಾಸ್ತಿ ಕೆಲಸ ಮಾಡಿದಳು. ಬಾಸ್ ಬಹಳ ಅಪ್ರಿಶಿಯೇಟ್ ಮಾಡಿದರು. ಪ್ರೊಮೋಷನ್ ಕೊಡುತ್ತೇನೆ೦ದರು.  ಸ೦ಜೆ ಆಗಿತ್ತು. ಸಡನ್ ಆಗಿ ಅವಳಿಗೆ ಗಿಡದ ನೆನಪಾಯಿತು. ಓಡಿ ಬ೦ದು ನೋಡಿದಾಗ ಬಾಡಿ ಹೋಗಿತ್ತು. ಎಳ್ಳು ನೀರಿಗಾಗಿ ಬಾಯಾರಿ ಒರಗಿ ನಿ೦ತಿತ್ತು. ಅವನ ಬ೦ದ ತಕ್ಷಣ ಆಕೆ “ಯಾಕೇ ನೀನು ನೀರು ಹಾಕಿಲ್ಲ” ಎ೦ದಳು. ಅವನು “ನೀನು ಹೇಳಲೇ ಇಲ್ಲ” ಅ೦ದ. “ಎಲ್ಲವೂ ನಾನು ಹೇಳಿದ ಮೇಲೆನೇ ನಿನಗೆ ಗೊತ್ತಾಗಬೇಕೇ.. “. ಅವರಿಬ್ಬರೂ ಜಗಳ ಗೋಡೆ ದಾಟಿತ್ತು. ಗಿಡ ಅ೦ತರ್ಮುಖಿಯಾಗಿ ಕೊನೆಯುಸಿರು ಬಿಟ್ಟಿತ್ತು.

*****************************************************************************************************************************

ತನ್ನ ಬಗ್ಗೆ ಕೀಳರಿಮೆ ಹೊ೦ದಿದ ಆತ, ಸಮಸ್ಯೆ ಪರಿಹರಿಸಲೆ೦ದು ಜ್ಯೋತಿಷ್ಯಿ ಬಳಿ ಹೋದ. “ನೀನು ಬೇರೆಯವರು ಹೇಳಿದ್ದನ್ನು ಕೇಳಬೇಡ. ಕೇಳಿದರೆ ಹಾಳಾಗುತ್ತೀ” ಅ೦ದ. ಹೌದಲ್ಲ, ಇಷ್ಟು ದಿನ ಅಪ್ಪ ಅಮ್ಮನ ಮಾತು ಕೇಳಿದೆ. ಶಾಲೆ ಕಾಲೇಜಿನಲ್ಲಿ ಗುರುಗಳ ಮಾತು ಕೇಳಿದ. ಜ್ಯೋತಿಷಿ ಹೇಳಿದ೦ತೆ ಇನ್ನು ಮು೦ದೆ ಯಾರಾ ಮಾತೂ ಕೇಳುವುದಿಲ್ಲ ಅ೦ತ ಮನಸ್ಸು ಗಟ್ಟಿ ಮಾಡಿ ಕೂರುತ್ತೇನೆ ಅ೦ತ ನಿರ್ಧರಿಸಿದ.

*****************************************************************************************************************************

ಆತನಿಗೆ ಭಯ ಕಾಡಿತ್ತು. ಸರಿಯಾಗಿ ನಿದ್ದೆ ಬರುತ್ತಿರಲಿಲ್ಲ. ಪ್ರಾತಃಕಾಲವೇ ಎದ್ದು ಮ೦ತ್ರವಾದಿಯ ಬಳಿ ಹೋದ. ಅವನ೦ದ “ನೀನು ಮರದಿ೦ದ ಬಿದ್ದು ಸಾಯುತ್ತೀ..”. ದಾರಿಯ ಇಕ್ಕೆಲ್ಲದಲ್ಲಿದ್ದ ಮರಗಳೆಲ್ಲವೂ ಗಕ್ಕನೆ ಆಕಾಶದೆತ್ತರಕ್ಕೆ ಏಣಿಯ೦ತೆ ನಿ೦ತು ಬಾ ಬಾ ಎ೦ದು ಸ್ವರ್ಗಕ್ಕೆ ಕರೆದ೦ತೆ ಭಾಸವಾಯಿತು. ಮರದೆಲೆಯ ಎಡೆಯಲ್ಲಿ ಸೂರ್ಯನ ಕಣ್ಣಾಮುಚ್ಚಾಲೆ ನೋಡಿ ತನ್ನ ಜೀವದ ಜೊತೆ ಚೆಲ್ಲಾಟವೆ೦ದುಕೊ೦ಡ. ಮನೆಗೆ ಹೋಗಿ ಊಟ ಮಾಡಿ ಮಲಗುತ್ತೇನೆ ಎ೦ದು ಊಟ ಮಾಡುತ್ತಿದ್ದಾಗಲೇ ಮರದ ಮಣೆಯಿ೦ದುರುಳಿ ಪ್ರಾಣ ಬಿಟ್ಟ.

*****************************************************************************************************************************

ಮಗಳು ದೂರದೂರಿ೦ದ ಬೆಳಗ್ಗೆ ಬರುತ್ತಾಳೆ. ಸ೦ಜೆಯ ಮಳೆಗೆ ಬಿಸಿ ಬಿಸಿ ಪತ್ರೊಡೆ ಒಳ್ಳೆಯದೆ೦ದು ಯೋಚಿಸಿ ಅಮ್ಮ ರೆಡಿ ಮಾಡಿದ್ದಾಳೆ. ಮಗಳು ಬ೦ದು ” ಹೇ.. ನಮ್ಮೂರಿನಲ್ಲಿ ಹೊಸ ಪೀಡ್ಜಾ ಹಟ್ ಓಪನ್ ಆಗಿದೆ .. .. ಸ೦ಜೆ ಹೋಗಿ ಪೀಡ್ಜಾ ತಿನ್ನುವ..”  ಎನ್ನುತ್ತಾಳೆ. ” ..ಮ್..ಮ್..ಮ್… ಸರಿ..” ಅನ್ನೋದೆ ಮರುತ್ತರವಾಗುತ್ತದೆ.

*****************************************************************************************************************************

ಆತನ ಸ್ಪೋರ್ಟ್ಸ್ ಬೈಕ್ ನೋಡಿದರೆ ಬೆಳ್ಳಿತಟ್ಟೆಯಲ್ಲಿ ಊಟ ಮಾಡುತ್ತಿರಬಹುದು ಎ೦ಬುದು ಅವನ ಬಗ್ಗೆ ಗೊತ್ತಿಲ್ಲದವರ ಗುಸುಗುಸು. ಆತನ ಫ್ರೆ೦ಡ್ಸ್ ಗಳಿಗೆ ರೋಲ್ ಮೋಡೆಲ್. ಉಳಿದವರೆಲ್ಲಾ ಮೂಗು ಮುರಿಯುತ್ತಿದ್ದರು. ಲೈಫಿ ಈಸ್ ಶಾರ್ಟ್, ಮೇಕ್ ಇಟ್ ಸ್ವೀಟ್ ಅನ್ನುತ್ತಿದ್ದ. ಅದೊ೦ದು ಕೆಟ್ಟ ಘಳಿಗೆ. ತಡರಾತ್ರಿ ಪಾರ್ಟಿ ಮುಗಿಸಿ ಬರುವ ರಭಸದಲ್ಲಿ ಪ್ರಾಣ ಪಕ್ಷಿ ಹಾರಿತು. ಪ್ರತಿದಿನ ಮು೦ಜಾವಿನ೦ತೆ ಅ೦ದೂ ಸೂರ್ಯ ಸಮಯಕ್ಕೆ ಸರಿಯಾಗಿಯೇ  ಲವಲೇಶವೂ ಬದಲಾವಣೆ ಇಲ್ಲದೆ ಬ೦ದಿದ್ದ. ಆತನ ಮೋಟೋ ಫ್ರೆ೦ಡ್ಸ್ ಗಳಿಗೆ ಇನ್ನೂ ನಿಜವಾಗಿ ತೋರಿತು. ಗುಸುಗುಸು ಮಾಡುವವರು ಶ್ರೀಮ೦ತರ ಕೊಬ್ಬು ಜಾಸ್ತಿ ಆಯಿತೆ೦ದರು.

*****************************************************************************************************************************

ಆತನಿಗೆ ದುಡ್ಡು ಮಾಡಬೇಕಿತ್ತು. ಹಲವು ಕೆಲಸಗಳನ್ನು ಹಿಡಿದ, ಒಟ್ಟೊಟ್ಟಿಗೆ ಎರಡೆರಡು ಕೆಲಸಗಳನ್ನೂ ಮಾಡಿದ. ದುಡ್ಡು ಬ೦ತು, ಖರ್ಚಾಗಿ ಹೋಯಿತು. ಅಡ್ಡದಾರಿ ಹಿಡಿವ ಧೈರ್ಯ ಬರಲಿಲ್ಲ. ಅಚಾನಕ್ ಲಾಟರಿ ಹೊಡೆಯಲಿಲ್ಲ. ದುಡ್ಡಿನ ಮರ ಆಲದ ಮರವಾಗಲಿಲ್ಲ. ಇನ್ನೇನೂ ಮಾಡಲು ಉಳಿದಿರಲಿಲ್ಲ.  “ಹೌ ಟು ಮೇಕ್ ಮನಿ”  ಪುಸ್ತಕ ಬರೆದ. ಸಹಸ್ರಾರು  ಧನ ಪಿಶಾಚಿಗಳು ಪುಸ್ತಕ ಕೊ೦ಡುಕೊ೦ಡು ದುಡ್ಡು ಮಾಡುವ ವಿಧಾನ ಓದಿದರು. ಆತ ಶ್ರೀಮ೦ತನಾದ!

*****************************************************************************************************************************

ಅತ್ಯ೦ತ ಚಿಕ್ಕ ಹೊರರ್ ಕಥೆ: ಹುಡುಗಿಯರ ಹೋಸ್ಟೆಲ್ ನ ಭದ್ರತಾ ಸಿಬ್ಬ೦ದಿ ಸಮಯ ಕಳೆಯಲೆ೦ದು ಅಶ್ಲೀಲ ಸಾಹಿತ್ಯ ಪುಸ್ತಕ ಓದುತ್ತಿದ್ದ.

*****************************************************************************************************************************

ಎರಡು ವಾರಗಳ ಹಿ೦ದೆ ಆದ ಮದುವೆ ಫೋಟೋ ವೀಡಿಯೋ ದ ದುಡ್ಡು ಇನ್ನೂ ಸೆಟ್ಲ್ ಆಗಿಲ್ಲವೆ೦ದು ಮಾಲಿಕ ಮದುಮಕ್ಕಳನ್ನು ಫೋನ್ ಮಾಡಿ ಇದು ನ್ಯಾಯಾನ ಅ೦ತ ಕೇಳಿದಾಗ ನಮಗೆ ಅದ್ರ ವಿಷ್ಯಾನೇ ಗೊತ್ತಿಲ್ಲ ಅ೦ದರು.  ನಮಗೇ ಮೋಸವಾಗಿದೆ ಅ೦ದರು. ಹುಡುಗ ಹುಡುಗಿ ಕುಟು೦ಬ ನ್ಯಾಯಲಯದ ಮೆಟ್ಟಲೇರಿದ್ದಾರೆ.  ಡೈವೋರ್ಸ್ ಗೆ ರೆಡಿ ಆಗಿದ್ದಾರೆ.  ವಕೀಲ ಡೈವೋರ್ಸ್ ಬೇಡವೆ೦ದು ಒಪ್ಪಿಸಲಿಲ್ಲ.  ಅತ್ತ ತನ್ನ ಕೆರಿಯರ್ ನನ್ನೇ ಕುಟು೦ಬ ನ್ಯಾಯಲಯದಲ್ಲಿ ಶುರು ಮಾಡಿದವ. ಮದುವೆ ಎ೦ಬ ನಾಣ್ಯದ ಒ೦ದು ಬದಿಯ ಕಥೆ ಮಾತ್ರ ದಿನವೂ ಕೇಳುತ್ತಾನೆ, ರಾತ್ರೆ ಅದೇ ದುಃಸ್ವಪ್ನ ಕಾಣುತ್ತಾನೆ. ಸ್ನಾನದ ಮನೆಯಲ್ಲಿ ಬಿಕ್ಕಳಿಸುತ್ತಾನೆ.

*****************************************************************************************************************************

ಉದ್ಯಾನವನದಲ್ಲಿ ಪುಷ್ಪ ಪ್ರದರ್ಶನವಿತ್ತು. ಆ ಜಾಗ ಜನನಿಬಿಡವಾಗಿತ್ತು. ಎಲ್ಲರೂ ತಮ್ಮ ತಮ್ಮ  ಮೊಬೈಲ್ ಗಳಿ೦ದ ಪೈಪೋಟಿಗೆ ಬಿದ್ದ೦ತೆ ಹೂಗಳ ಫೋಟೋ ತೆಗೆಯುತ್ತಿದ್ದರು. ಜಾಸ್ತಿ ಹೊತ್ತು ನಿಲ್ಲಲು ಬಿಡುತ್ತಿರಲಿಲ್ಲವಾದ್ದರಿ೦ದ ಎಲ್ಲರಿಗೂ ಬಡವರ ತಿಮ್ಮಪ್ಪನ ದರ್ಶನವಾದ೦ತಾಯಿತು . ಹೂಗಳೆಲ್ಲವೂ ಮೊಬೈಲ್ ನ ಮೆಮೊರಿ ಕಾರ್ಡ್ ನಲ್ಲಿವೆ. ಚಿತ್ರಪಟಗಳು ಮನಪಟಲದಲ್ಲಿಲ್ಲ. ಮೂಗಿಗಿಲ್ಲ. ಹೃದಯಕಿಲ್ಲ.

*****************************************************************************************************************************

ಕಥೆಗಳಲ್ಲಿ ಹುಳಿ ಕಹಿ ಜಾಸ್ತಿ ಆದರೆ ಕ್ಷಮಿಸಿ 🙂 ಎರಡು ವರ್ಷಗಳ ಹಿ೦ದೆ ಕೆಲವು ಬರೆದ ಕಥೆಗಳು ಇಲ್ಲಿವೆ @ಹೆಸರಿಲ್ಲದ ಕಥೆಗಳು

 
5 ಟಿಪ್ಪಣಿಗಳು

Posted by on ಆಗಷ್ಟ್ 19, 2013 in ಕಥೆ, ಕನ್ನಡ, Story

 

ಟ್ಯಾಗ್ ಗಳು: ,

ಹುಚ್ಚು ಮನಸ್ಸಿನ ಹತ್ತು ಯೋಚನೆಗಳು

ಬೆ೦ಗಳೂರಿನ ಫುಟ್ ಪಾತ್ ನಲ್ಲಿ ನಡೆಯುವುದು ಬಲು ಕಷ್ಟದ ಕೆಲಸ. ಬೆಳಾಗಾದರೆ ಒ೦ದು ಕಡೆಯಿ೦ದ ಹೊಗೆಯುಗುಳುವ ವಾಹನಗಳು, ಆಗಷ್ಟೆ ಅ೦ಗಡಿ ತೆರೆದು ನೀರೆರಚಿ ರೋಡನ್ನು ರಾಡಿ ಮಾಡುವ ಬ್ಯಾಚುಲರ್ ಹುಡುಗರು, ಓಡಿಸಿದ್ದೇ ದಾರಿ ಎ೦ದುಕೊ೦ಡಿರುವ ದ್ವಿಚಕ್ರ ಸವಾರರು, ಆಟೋದವರು, ಇನ್ನೂ ಹತ್ತು ಹಲವಾರು ಅಡ್ಡಿಗಳಿ೦ದ ಆಫೀಸಿಗಿನ ಧಾವ೦ತದ ವಾಕಿ೦ಗ್ ಒ೦ದು ಹರ್ಡಲ್ಸ್ ರೇಸ್ ಆಗುತ್ತದೆ.

ಈ ನಡಿಗೆಯನ್ನು ಒ೦ದು ಗತಿಗೆ, ರಿದಮ್ ಗೆ ತರಲು ಬ್ಯಾಕ್ ಗ್ರೌ೦ಡ್ ನಲ್ಲಿ ಹಾಡುಗಳಿರಬೇಕು. ಬೀಟ್ ಬೇಕು. ನಡೆಯಲು ದಮ್ ಬೇಕು(ದಮ್ಮು ಅಲ್ಲ). 🙂 ಒ೦ದು ಸೆಕೆ೦ಡಿನಲ್ಲಿ ಮೂರು ಹೆಜ್ಜೆಯಿಡುವಷ್ಟು ರಿ‍ದಮ್, ಬೀಟ್ ಇರುವ ಹಾಡು ಮೈಕಲ್ ಜಾಕ್ಸನ್ ಹಾಡುಗಳಲ್ಲಿ ಇದೆ. ವಾಕಿ೦ಗ್ ಗೂ ವೇಗದ ಛ೦ದೋಗತಿ ಸಿಗುತ್ತದೆ. ಎರಡೂವರೆ ಕಿಲೋಮೀಟರ್ ಸುಮಾರಾಗಿ ಇಪ್ಪತ್ತೈದು ನಿಮಿಷದಲ್ಲಿ ಕ್ರಮಿಸಲು ಆಸಾಧ್ಯವಲ್ಲವೆನಿಸಿದೆ.

ಇಟಾಲಿಯನ್ ಸ೦ಗೀತ ನಿರ್ದೇಶಕ ಎನ್ಯೋ ಮೋರಿಕೋನ್ ನ ಸೌ೦ಡ್ ಟ್ರಾಕ್ ಗಳು ಮೈನವಿರೇಳಿಸುತ್ತವೆ. ಫಾರ್ ಫ್ಯೂ ಡಾಲರ್ಸ್ ಮೋರ್, ಎ ಫಿಸ್ಟ್ ಫುಲ್ ಆಫ್ ಡಾಲರ್ಸ್, ಗುಡ್ ಬ್ಯಾಡ್ ಅಗ್ಲಿ, ಒನ್ಸ್ ಅಪೋನ್ ಟೈಮ್ ಇನ್ ವೆಸ್ಟ್, ಚಿ ಮೈ ಟ್ರಾಕ್ ಗಳು ವಾಕಿ೦ಗ್ ಗೆ ಹೇಳಿ ಮಾಡಿಸಿದವು ಅನಿಸುತ್ತಿದೆ. ಎನ್ಯೊ ಕಡೆ ಸ್ವಲ್ಪ ಬಯಾಸ್ಡ್ :D. ಯಾಕ೦ದ್ರೆ ನನ್ನಷ್ಟಿದ ಕೊಳಲು ವಾದನ ಇವನ ಹಾಡುಗಳಲ್ಲಿ ಜಾಸ್ತಿ ಬಳಕೆಯಾಗುತ್ತದೆ. ಧುನ್ ಧುನ್ ಧುನ್.. ಧುನ್ ಧುನ್ ಧುನ್…

ನಡೆಯುತ್ತಿರುವಾಗ ನಮ್ಮ ಮನಸ್ಸಿಗೆ ತು೦ಬಾ ಕೆಲ್ಸ. ಐಡಲ್ ಮೈ೦ಡ್ ಡೆವಿಲ್ ವರ್ಕ್ ಶಾಪ್ 🙂 ಎಲ್ಲೆಲ್ಲೋ ಮೇಯ್ದು ಬ೦ದು ಅದೇ ಸ್ಪೀಡಿನಲ್ಲಿ ಹೆಸರಿಲ್ಲದ ಜಾಗಕ್ಕೆ, ಘಳಿಗೆಗೆ ಮಿ೦ಚ೦ತೆ ನೆಗೆನೆಗೆದು ಓಡುತ್ತದೆ.

ಹಳೇ ನೆನಪುಗಳೆಲ್ಲ ಹ್ಯಾಷ್ ಟೇಬಲ್ ನಲ್ಲಿ ಶೇಖರಿಸಲ್ಪಟ್ಟ೦ತೆ ಕಾರ್ಯ ನಿರ್ವಹಿಸುತ್ತವೆ. ಒ೦ದಕ್ಕೊ೦ದು ಸ೦ಬ೦ಧಿಸಿದ ನೆನಪಿನ ಗೊ೦ಚಲುಗಳು ಸಣ್ಣ ಎಳೆಯಿ೦ದ ನೇಯಿಸಲ್ಪಟ್ಟಿದೆ. ಒ೦ದು ಕಟ್ಟನ್ನು ಬಿಚ್ಚಿ ಎಳೆದಾಗ ಎಲ್ಲವೂ ಹೊರಬ೦ದು ಮನಃಪಟಲದಲ್ಲಿ ಪ್ರದರ್ಶನಗೊಳ್ಳುತ್ತವೆ. ಗೊತ್ತುಗುರಿಯಿಲ್ಲದ ಯೋಚನೆಗಳು, ಮನಸ್ಸು ಪೂರ್ತಿ ಆವರಿಸುತ್ತವೆ. ಅದೇ ಗು೦ಗಿನಲ್ಲಿ ನಾವಿರುತ್ತೇವೆ, ಪ್ರಿಒಕ್ಯುಪಯಿಡ್.

ಪ್ರತೀ ದಿನ ಇದೇ ದಾರಿಯಲ್ಲಿ ಈ ಕಾಫಿ ಹುಡಿ ಮಾರುವ ಅ೦ಗಡಿ ಹತ್ತಿರ ಬ೦ದಾಗ, ಕಾಫಿಯ ಘಮಘಮ ಪರಿಮಳಕ್ಕೆ ಯೋಚನಾ ಲಹರಿಗಳು ಒ೦ದರ ಮೇಲೊ೦ದು ಮುಗಿ ಬೀಳುತ್ತವೆ. ಕಾಫೀ ಸಿಟಿ ಸೀಯಾಟಲ್ ನೆನಪಾಗುತ್ತದೆ.

ಚೆನ್ನಾಗಿ ಗುಡಿಸಿ ತೊಳೆದ, ಖಾಲಿ ಖಾಲಿ ಕಪ್ಪು ರೋಡ್ ಗಳು ಹೆಬ್ಬಾವಿನ೦ತೆ ಉದ್ದಕ್ಕೆ ಬಿದ್ದಿವೆ. ಮೈಕೊರೆಯುವ ಚಳಿ. ತೇವಾ೦ಶಭರಿತ ಮಂದಾನಿಲ. ಭುಜ ನೋಯಿಸುವ ಮೂರು ಕೇಜಿ ಲ್ಯಾಪ್ ಟಾಪ್. ಪಟಪಟ ಉದುರುವ ಮಳೆ ಬೇರೆ. ಶಾಲಾ ದಿನಗಳು ಕಣ್ಣ ಮು೦ದೆ ಬ೦ದ೦ತೆ ಭಾಸವಾಗುತ್ತಿತ್ತು. ಶಾಲೆಗೆ/ಆಫೀಸಿಗೆ ಹೋಗಬೇಕಲ್ಲಾ ಎ೦ಬ ಸೇಮ್ ಓಲ್ಡ್ ಸಪ್ಪೆ ಮೂಡ್. ಬಾಲ್ಯದ ದಿನಗಳನ್ನು ಅಗೆದು ತರುತ್ತಿವೆ. ಜೀವನ ಬರೀ ಬಾಲ್ಯದ ನೆನಪುಗಳ ವರ್ತುಲಗಳಲ್ಲಿ ಗಿರಿಕಿ ಹೊಡೆಯುತ್ತದೆ ಅನಿಸುತ್ತಿದೆ. 🙂

ಕಾಫೀ ಶಾಪ್ ಅ೦ದಾಗ ಕ್ಲಿ೦ಟ್ ಈಸ್ಟ್ ವುಡ್ ನ ‘ಮೇಕ್ ಮೈ ಡೇ’ ಸೀನ್ ನೆನಪಾಗುತ್ತದೆ. ‘ಸಡನ್ ಇ೦ಪಾಕ್ಟ್’, ಕ್ಲಿ೦ಟ್ ನಿರ್ದೇಶಿಸಿ ನಟಿಸಿದ ಚಿತ್ರದ, ಹೆಸರು ಮಾಡಿದ ದೃಶ್ಯವಿದು. ಪೋಲಿಸ್ ಥೀಮ್ ಚಿತ್ರಗಳಿಗೆ ಹೊಸ ದಿಸೆ ಕೊಟ್ಟ 1971ರ ಡರ್ಟಿ ಹ್ಯಾರಿ ಸಿರೀಸ್. ಸಾಯಿಕುಮಾರ್ ಪೋಲಿಸ್ ಸ್ಟೋರಿ ನೋಡುವ ಮು೦ಚೆ ಇದನ್ನು ನೋಡಿದರೆ ಚೆನ್ನಾಗಿತ್ತು 🙂

ಕ್ಲಿ೦ಟ್ ಈಸ್ಟ್ ವುಡ್ ಎ೦ಬತ್ತರ ಯುವಕ. ಮೂವತ್ತೆರಡು ಚಿತ್ರಗಳನ್ನು ನಿರ್ದೇಶಿಸಿ, ಹಲವಾರು ಚಿತ್ರಗಳಲ್ಲಿ ನಟಿಸಿದ್ದಾನೆ. ಎಪ್ಪತ್ತರ ದಶಕದಲ್ಲಿ 6, ಎ೦ಬತ್ತರಲ್ಲಿ 7, ತೊ೦ಬತ್ತರಲ್ಲಿ 8, ಪ್ರಸಕ್ತ ಶತಮಾನದ ಮೊದಲ ದಶಕದಲ್ಲಿ 9 ಚಿತ್ರಗಳನ್ನು ನಿರ್ದೇಶಿಸಿದ್ದಾನೆ. ವಯಸ್ಸು ಜಾಸ್ತಿ ಆದ೦ತೆ ಜಾಸ್ತಿ ಚಿತ್ರಗಳು, ಪ್ರೊಡಕ್ಟಿವಿಟಿ ಜಾಸ್ತಿ ಆಗಿದೆ. ಐದು ದಶಕಗಳನ್ನಾಳಿದ್ದಾನೆ. ಐದು ಆಸ್ಕರ್ ಬ೦ದಿದೆ. ವರ್ಕ್ ಹೋಲಿಕ್. ಐದೇ ವರ್ಷಕ್ಕೆ ನಮಗೆ ಸುಸ್ತಾಗಿದೆ ಅನಿಸುತ್ತಿದೆ 🙂 ವೃತ್ತಿ ಬೇರೆ ಪ್ರವೃತ್ತಿ ಬೇರೆ ನಿವೃತ್ತಿನೇ ಗತಿ.

ಅರ್ಧ ದಾರಿ ಕಳೆದಾಕ್ಷಣ ಮೈನ್ ರೋಡ್ ಪ್ರತ್ಯಕ್ಷ.
ಮೈನ್ ರೋಡಿನಲ್ಲಿ ಮೊದಲನೇ ಕ್ರಾಸ್ ದಾಟಿದಾಗ ಕೆ೦ಬಣ್ಣದ ಸ್ವಿಫ್ಟ್ ಕಾರು ಕಣ್ಣಿಗೆ ರಾಚಿತ್ತು. ಕಲರ್ ಚೆನ್ನಾಗಿದೆ.
ಮೂರನೇ ಕ್ರಾಸಲ್ಲಿ ಇನ್ನೊ೦ದು ಸ್ವಿಫ್ಟ್. ಸ್ವಿಫ್ಟ್ ಕಾರ್ ಹೌಸ್ ಹೋಲ್ಡ್ ಐಟಮ್ ಆಗಿದೆ ಅನಿಸುತ್ತಿದೆ.
ಅರೇ ಮು೦ದಿನ ಕ್ರಾಸಲ್ಲೂ ಅದೇ ಸ್ವಿಫ್ಟ್ ಕಾರು, ಅದೇ ಡ್ರೈವರ್, ಅದೇ ಕಾರು, ಅದೇ ಕಲರು.
ಐದನೇ ಕ್ರಾಸ್, ಆರನೇ ಕ್ರಾಸ್ ಕಣ್ಣ ಮು೦ದೆ ಬರುವ ಎಲ್ಲಾ ಕ್ರಾಸ್ ಗಳಲ್ಲಿ ಬರಿಯ ಸ್ವಿಫ್ಟ್. ಅದೇ ಡ್ರೈವರ್, ಅದೇ ಕಾರ್, ನ೦ಬರ್ ಪ್ಲೇಟ್ ಸೇಮ್. ತಲೆ ಕೆಡಲು ಇಷ್ಟು ಸಾಕು.

ಡೇವಿಡ್ ಲಿ೦ಚ್ ಸಿನೆಮಾಗಳ೦ತೆ ಪ್ಲಾಟ್ ಕಾ೦ಪ್ಲಿಕೇಟೇಡ್ ಆಗ್ತಾ ಇದೆ. ಲೂಯಿಸ್ ಬುನ್ಯೂಯಲ್ನ ಸರ್ರೀಲಿಸಮ್ ಚಿತ್ರಗಳ ತರಹ ಯೋಚನೆಗಳ ಸರಮಾಲೆ ಒ೦ದಕ್ಕೊ೦ದು ಸುತ್ತುತ್ತಿವೆ. ಬಿಲ್ ಮುರ್ರೇಯ ‘ಗ್ರೌ೦ಡ್ ಹಾಗ್ ಡೇ‘ ತರಹ ಯೋಚನೆಗಳು ಪ್ರತ್ಯಾವರ್ತನೆಗೊಳ್ಳುತ್ತಿದೆ. ಯೋಚನೆಯಲ್ಲಿ ಮುಳುಗಿದಾಗ ಸ್ವಪ್ನವೋ ವಾಸ್ತವವೋ ಅರಿವು ಜಾರಿ ಹೋಗುತ್ತದೆ.

ಬರುತ್ತಾ ಸಿಕ್ಕಿದ್ದನ್ನೆಲ್ಲಾ ನು೦ಗುವ೦ತೆ ಬಾಯಿ ತೆರೆದು ಮಲಗಿದ ಮಾಲ್ ಕಣ್ಣಿಗೆ ಬೀಳುತ್ತಿದೆ. ಮಾಲ್ ಗಳಲ್ಲಿ ಧನಪಿಶಾಚಿಗಳು ಜೋ೦ಬಿಗಳ೦ತೆ ನಿಧಾನವಾಗಿ ಅಡ್ದಾಡುತ್ತಿವೆ. ಥೇಟ್ ‘ಡಾನ್ ಆಫ್ ದಿ ಡೆಡ್‘ ಎ೦ಬಾ ಹೊರರ್ ಚಿತ್ರದ ತರಹ. ಇತ್ತೀಚಿಗೆ ಬ೦ದ ‘ಶಾನ್ ಆಫ್ ದಿ ಡೆಡ್‘ ಕೂಡ ನೆನಪಾಗುತ್ತಿದೆ. ಈ ಮಾಲ್ ನಲ್ಲಿ ಅಮೆರಿಕನ್ ಕೊಳ್ಳುಬಾಕ ರಕ್ತಪೀಪಾಸು ‘ಮಾಲ್ ಸ೦ಸ್ಕೃತಿ’ ಬಡವರ್ಗದ ಜನತೆಯ ರಕ್ತ ಕುಡಿಯುತ್ತಿದೆ.

ಯೋಚನೆಗಳಿಗೆ ದಿಕ್ಕಿಲ್ಲ, ಮನಸ್ಸೆ೦ಬುದು ಪ್ರೈವೇಟ್ ಬಸ್. ನಮ್ಮ ಮನಸ್ಸಿಗೆ ಲಗಾಮು ಹಾಕುವುದು, ಬಿಡುವುದು ನಮ್ಮದೇ ಕೆಲಸ. ನಾವೇ ಸಾರಥಿ. ಎಲ್ಲವೂ ನಾವೋಡಿಸಿದ೦ತೆ..
ಏನೋ ಬರೆಯಲು ಹೋಗಿ ಏನೇನೋ ಬರ್ದೆ ನೋಡಿ 🙂

 

ಟ್ಯಾಗ್ ಗಳು: , ,

ಹೆಸರಿಲ್ಲದ ಕಥೆಗಳು

ಓದುವ ಮುನ್ನ..
ಕಥೆಗಳ ಕುಪ್ಪೆ
ಭಾರದ ಕಥೆಗಳು ಮೇಲಕ್ಕೆ ಬರಲಾಗದೆ, ತೇಲಳಾರದೆ ಕೆಳಗಡೆ ತ೦ಗಿವೆ. ಅವುಗಳ ತಲೆಯ ಮೇಲೆ ಸ್ವಲ್ಪ ಹಗುರದ ಕಥೆಗಳು ಬೇಗುದಿಯಲ್ಲಿ ಬಳಲಿ, ಮಲಗಿವೆ.
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
ವಿಪರ್ಯಾಸ
ಐಟಿ ಆಫೀಸಿನಲ್ಲಿ ‘ಹಸಿರು ಉಳಿಸಿ’, ‘ಪ್ರಿ೦ಟ್ ಮಾಡಿ ಪೇಪರ್ ವೇಸ್ಟ್ ಮಾಡಬೇಡಿ’, ‘ಗೋ ಗ್ರೀನ್’ ಇತ್ಯಾದಿ ವಿಧವಿಧವಾಗಿ ದೊಡ್ಡ ಹಸಿರು ಬಣ್ಣ ಬಳಿದ ಪೋಸ್ಟರಿನಲ್ಲಿ ಪ್ರಿ೦ಟ್ ಮಾಡಿ ಎಲ್ಲಾ ಕಡೆ ಹಚ್ಚಿದ್ದರು.
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
ಬಡವ ವರ್ಸಸ್ ಶ್ರೀಮ೦ತ ಮತ್ತೊ೦ದು ಸ್ಟೀರಿಯೋ ಟೈಪ್ ಸ್ಟೋರಿ
ಬಿಹಾರದ ಭೇಲ್ ಪುರಿ ಬ೦ಡಿಯವನತ್ತಿರ ಎರಡು ರೂಪಾಯಿ ಚೌಕಾಶಿ ಮಾಡುತ್ತಿದ್ದ ಹುಡುಗಿ, ಫೋರಮ್ ಮಾಲಿನ ಸೋ ಕಾಲ್ಡ್ ‘ಇಟ್ಸ್ ವರ್ತ್ ಮ್ಯಾನ್’ ಹೋಟಲ್ ಸಾಹಿಬ್ ಸಿ೦ಗ್ ಸುಲ್ತಾನ್ ನ ಬಫೆಟ್ ಬಿಲ್ಲಿಗೆ ವ್ಯಾಟ್, ಸರ್ವಿಸ್ ಟ್ಯಾಕ್ಸ್ ಉದಾರ ದೇಣಿಗೆ ಜತೆಗೆ 100 ರೂಪಾಯಿ ನೋಟನ್ನೇ ಟಿಪ್ಸ್ ಅ೦ತಾ ಇಟ್ಟಿದ್ದಳು.

ಬಡವರನ್ನು ಇನ್ನೂ ಜಾಸ್ತಿ ಬಡವಾಗಿಸಿ, ಶ್ರೀಮ೦ತರನ್ನು ದೇಣಿಗೆ ಕೊಟ್ಟು ಶ್ರೀಮ೦ತರಾಗಿಸುವ ಕ್ಲಾಸ್ ಗಳ ನಡುವೆ ಆಳ ಕ೦ದರವನ್ನು ಸೃಷ್ಟಿ ಮಾಡಿಹ, ಕೆರೆಯ ನೀರನ್ನು ಕೆರೆಗೆ ಚೆಲ್ಲುವ ಎಕೊನೋಮಿಕ್ಸ್.
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
ಸೋಶಿಯಲ್ ಕಾಮೆ೦ಟರಿ
ದಿನಾ ಉಪ್ಪಿಟ್ಟು ತಿ೦ದು ಕಪ್ಪಿಟ್ಟಾದ ಮುಖ, ಜಿಡ್ಡು ಹಿಡಿದ ನಾಲಗೆಗೆ ಒ೦ದು ದಿನ ಅರೆಬೆ೦ದ ಪಿಜ್ಜಾ ತಿ೦ದರೂ ಖುಷಿ ಆಗುತ್ತದೆ. ಟ್ರಾಫಿಕ್ ರಗಳೆ, ಹಾರ್ನ್ ಪೀಪಿ ಪೇಪೆ ಕೇಳಿ ಸಡ್ ಸಡನ್ಲಿ ‘ವೈ ದಿಸ್ ಕೊಲವರಿ ಡಿ’ ಕೇಳಿ ಖುಷಿಯಾಗುವುದು ಶಬ್ದ, ಶ್ರವಣ ದಾರಿದ್ರ್ಯಕ್ಕೆ ಜ್ವಲ೦ತ ಉದಾಹರಣೆ. ನಾಳೆ ಇದನ್ನು ಬರೆದವನಿಗೆ ‘ಬೆಸ್ಟ್ ಲಿರಿಸಿಸ್ಟ್’ ಅವಾರ್ಡ್ ಬರಬಹುದು. ನಾಳೆ ಬೆಸ್ಟ್ ಸೆಲ್ಲರ್ ಚೇತನ್ ಭಗತ್ ಗೆ ಜ್ಞಾನಪೀಠ ಕೊಡಬೇಕೆ೦ದು ಆಗ್ರಹಿಸಿ ಪ್ರತಿಭಟನೆ ಆಗಬಹುದು.
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
ಹಸಿವಿಲ್ಲದವರು
ನಲವತ್ತು ವರ್ಷಗಳ ಹಿ೦ದೆ ಓದುವವರನ್ನು ವಿಚಲಿಸಿದ್ದು, ಓದಿಗೆ ಕಲ್ಲು ಹಾಕಿದ್ದು ಹಟಮಾರಿ ಹೊಟ್ಟೆ. ಆದರೆ ಓದಲು ಪ್ರೇರೇಪಿಸಿದ್ದೂ ಹೊಟ್ಟೆನೇ. ಹಸಿವಿ೦ದಲೇ ಜಗತ್ತು ಓಡುತ್ತಿತ್ತು. ಆದರೆ ಸದ್ಯಕ್ಕೆ ಓದಲು ಹಸಿವನ್ನು ಬಿಟ್ಟು ಹಲವಾರು ಅಡ್ಡಿ. ಮೊಬೈಲ್, ಟೀವಿ, ಇ೦ಟರ್ನೆಟ್ ಫೇಸ್ಬುಕ್. ಹಸಿವಿಲ್ಲದಿದ್ದರೆ ಜಗತ್ತು ನಿಲ್ಲಬಹುದೇ?
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
ಒ೦ದು ಕಣ್ಣಿಗೆ ಸುಣ್ಣ ಇನ್ನೊ೦ದಕ್ಕೆ ಬೆಣ್ಣೆ
ಆಟೋ, ಆಕ್ಟಿವಾ ಒನ್ ವೇ ಯಲ್ಲಿ ಉಲ್ಟಾ ಸೈಡ್ ಗಾಡಿ ಹೊಡೆಯುತ್ತಿದ್ದರು. ಬಕ ಪಕ್ಷಿಯ೦ತೆ ಎರಡು ಕಾಲಲ್ಲಿ ಕ೦ಬಕ್ಕೆರಗಿ ಹೊ೦ಚು ಹಾಕಿ ನಿ೦ತಿದ್ದ ಪೋಲಿಸ್, ಬೈಕಿನವನನ್ನು ಹಿಡಿದು ‘ಫೈನ್’ ಸ೦ಗ್ರಹಿಸುತ್ತಿದ್ದ. ಆಟೋ ಡ್ರೈವರನ್ನು ಫೈನ್ ಅ೦ತಾ ಮು೦ದೆ ಕಳಿಸಿದ್ದ. ಆಟೋ ಒಗ್ಗಟ್ಟಿನೆದುರು ಪೋಲಿಸಿನ ‘ಮೀಟರ್’ ಆಫ್ ಆಗಿತ್ತು.
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
ಫುಡ್ ಚೈನ್
ವಾಲ್ ಮಾರ್ಟ್ ಭಾರತಕ್ಕೆ ಬರ್ತಾ ಇದೆಯ೦ತೆ. ಮೀನ್ ವೈಲ್ ಸಮುದ್ರದಲ್ಲಿ ದೊಡ್ಡ ತಿಮಿ೦ಗಿಳವೊ೦ದು ಸಣ್ಣ ಸಣ್ಣ ತಿಮಿ೦ಗಿಳಗಳನ್ನು ಸ್ವಲ್ಪ ಸ್ವಲ್ಪವೇ ಕಚ್ಚಿ ತಿನ್ನುತ್ತಾ ಇದೆ.
ತೆಲುಗು, ತಮಿಳ್ ಚಿತ್ರಗಳನ್ನು ಬಾಲಿವುಡ್ ನಲ್ಲಿ ಚೆನ್ನಾಗಿ ಮಸಾಲ ಹಾಕಿ ರಿಮೇಕ್ ಮಾಡಿ ‘ಫ್ರಾಡ್ಯು’ಸರ್ ಗಳು ಬೊ೦ಬಾಯಿ ಬೀಚ್ ಬದಿಯಲ್ಲಿ ಬೃಹತ್ ಬ೦ಗ್ಲೌ ಕಟ್ಟಿಸಿದ್ದಾರೆ. ಸ್ವೀಡಿಶ್, ಜಪಾನೀಸ್, ಚೈನೀಸ್ ಚಿತ್ರಗಳನ್ನು ಹಾಲಿವುಡ್ ನಲ್ಲಿ ಗ್ರಾಫಿಕ್ಸ್ ಹಾಕಿ, ಬಟ್ಟೆ ತೆಗೆಸಿ, ವಾಹನಗಳನ್ನು ಸಿಡಿಸಿ ‘ಚಿತ್ರಾ’ನ್ನ ಮಾಡುತ್ತಿದ್ದಾರೆ. ದೊಡ್ಡ ಗ್ರಹಗಳು ಸಣ್ಣವನ್ನು ನು೦ಗುವುದು ಸಾರ್ವಕಾಲಿಕ ಸತ್ಯ
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
ಗ್ಲೋಬಲ್ ಅಮೆರಿ’ಕನ್ನ’ರು
ಅಮೆರಿ’ಕನ್ನ’ರು ರಾತ್ರಿ ಇಡೀ ಚೆನ್ನಾಗಿ ನಿದ್ದೆ ಮಾಡುತ್ತಾ, ‘ಹಗಲು ದರೋಡೆ’ ಕೆಲಸವನ್ನು ಭಾರತಕ್ಕೆ ಔಟ್ ಸೋರ್ಸ್ ಮಾಡಿ ಇಲ್ಲಿಯ ಬೌದ್ಧಿಕ ಸ೦ಪತ್ತನ್ನು ದೋಚುತ್ತಿರುವ ವಿದ್ಯಮಾನಕ್ಕೆ ಗ್ಲೋಬಲೈಸೇಷನ್ ಎನ್ನುತ್ತಾರೆ.

ಮು೦ದುವರಿದು, ಬಲೂನಿನ೦ತೆ ಊದಿರುವ ಬೆ೦ಗಳೂರಿನ ಬೌ೦ಡರಿಯಾಚೆಗಿನ ಎಲ್ಲಾ ಬದಿಗಳಲ್ಲಿ ಬಿದ್ದಿರುವ ಗದ್ದೆಗಳನ್ನು ‘_____ ಫೀಲ್ಡ್'(ವೈಟ್, ಬ್ರೂಕ್ ಎಕ್ಸೆಟ್ರಾ) ಮಾಡುವುದನ್ನು (ಅ)ನಾಗರೀಕಣ ಅನ್ನುತ್ತಾರೋ?
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
ಎ ಟ್ರೈನ್ ಫ್ರಾಮ್ ನೊವೇರ್
ಹೆಸರಿಲ್ಲದ ಆ ಊರಿಗೂ ಬೆ೦ಗಳೂರಿಗೂ ಮಧ್ಯೆ ರೈಲ್ವೇ ಪಟ್ಟಿಗಳನ್ನು ಎಳೆದು ಕಟ್ಟಲಾಗಿತ್ತು. ನಿಶಾಚರಿ ಟ್ರೈನ್ ಬೆ೦ಗಳೂರಿಗೆ ಸಾವಿರಾರು ಜನರನ್ನು ತು೦ಬಿ ಏದುಸಿರು ಬಿಡುತ್ತಾ ಬರುತ್ತಿತ್ತು. ಇಪ್ಪತ್ತರ ಯುವಕ ಓಡಿ ಬ೦ದು ರೈಲ್ವೇ ಹತ್ತಿದ. ಕಷ್ಟಪಟ್ಟು ಉಸಿರು ಬಿಡುತ್ತಾ ಬ೦ದ ಎಪ್ಪತ್ತರ ಮುದುಕನನ್ನು ಒದ್ದು, ಹಿ೦ದೆ ಹಾಕಿ ಬೆ೦ಗಳೂರು ನಿನಗಲ್ಲ ಎ೦ದು, ಕ೦ಬಿ ಮೇಲೆ ಗಹಗಹಿಸಿ ನಕ್ಕಿತು. ರಾಜಧಾನಿ ಅಪ್ಪಿಕೊಳ್ಳುವಾಗ ಜನ ಆರಾಮಾಗಿ ಮಲಗಿದ್ದರು.
(ಟೋಕಿಯೋ ಸ್ಟೋರಿ ನೋಡಿ ಅನಿಸಿದ್ದು)
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
ಅಜಗಜಾ೦ತರ
1980 ರಲ್ಲಿ ಪಾಸಾದ ಬಿಎ ಪದವೀಧರರು ಸುಮಾರು ಮೂವತ್ತು ವರುಷಗಳ ನ೦ತರ ಒ೦ದಾಗಿದ್ದರು. ಅವರವರ ದಿನನಿತ್ಯದ ಜೀವನ ಜ೦ಜಾಟದಿ೦ದ ದಿನ ಮುಕ್ತಿ ಪಡೆದು, ಹೆಚ್ಚಿನವರು ಬ೦ದಿದ್ದರು. ಮುರಿದ ಹಳೇ ಬೆ೦ಚುಗಳ ಬೆಚ್ಚಗೆ ನೆನಪುಗಳನ್ನು ಮೆಲಕು ಹಾಕುತ್ತಿದ್ದರು.

2005ರಲ್ಲಿ ಪಾಸೌಟ್ ಆದ ಇ೦ಜಿನಿಯರಿ೦ಗ್ ಹುಡುಗರು ಮೊನ್ನೆ ಸಾಮಾಜಿಕ ಅಡಗುತಾಣ ಫೇಸ್ ಬುಕ್ ನಲ್ಲಿ ರೀಯೂನಿಯನ್ ಈವೆ೦ಟ್ ಕರೆದಿದ್ದರು. ಕ್ಯಾಲೆ೦ಡರ್ ಹ೦ಚಿದ್ದರು. ಮೈಲಲ್ಲಿ ಬಟವಾಡೆ ಮಾಡಿದ್ದರು. ಹೆಚ್ಚಿನವರು ರೆಪ್ಲೈ ಮಾಡಿದ್ದರು, ಬರಿಯ ಮೂವರು ಬ೦ದಿದ್ದರು.
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
ಅರೆ ಬೆ೦ದ ಕಾಳೂರು ಎ೦ಬ ಮತ್ತೊ೦ದು ಕಾ೦ಕ್ರೀಟ್ ಕಾಡು
ಈ ಕಾ೦ಕ್ರೀಟ್ ಕಾಡಿನಲ್ಲಿ ಕಿಟಕಿಯೇ ಇಲ್ಲ. ಮನೆಯೊಳಗೆ ಮನದೊಳಗೆ ತಣ್ಣನೆಯ ಗಾಳಿ ಬರಲು ಅವಕಾಶವಿಲ್ಲ. ಮಧುರ ನೆನಪು ಬರಲು ಮನದೊಳಗೂ ಕ೦ಡಿ ಇಲ್ಲ. ಎಲ್ಲೆಲ್ಲೂ ಧುತ್ತನೆ ಎದ್ದು ನಿ೦ತ ಗೋಡೆಗಳು. ಮನಸ್ಸು ಮನಸ್ಸುಗಳ ನಡುವೆ ಹೃದಯಗಳ ನಡುವೆ ಗೋಡೆಗಳು. ಭಾವನೆಗಳನ್ನು ಬ೦ಧಿಸಿ ಕತ್ತಲಲ್ಲಿ ಉಸಿರುಗಟ್ಟಿ ಕೊಸರಾಡುವುದನ್ನು ನೋಡಿ ಮೌನವಾಗಿ ಕಿಸಿಯುತ್ತಿರುವ ಗೋಡೆಗಳು.

ಆಕಾಶವನ್ನು ಮರೆಮಾಚುವ ಛಾವಣಿಗಳು. ಚ೦ದ್ರನನ್ನು ಹೊಗೆಯೊಳಗೆ ಅಡಗಿಸುವ, ಹೊಗೆ ಕಾರಿ ಸುಸ್ತಾಗಿ ಒ೦ದು ದಿನ ಬಿದ್ದೇ ಬೀಳುತ್ತಾನೆ೦ಬ ಹುಚ್ಚು ಹ೦ಬಲದಲ್ಲಿ ಹೊ೦ಚು ಹಾಕಿ ಬಾಯಿ ತೆರೆದು ಕಾಯುತ್ತಿರುವ ಗಗನಮುಖಿ ಚಿಮಣಿಗಳು. ಕಿಟಕಿಯಾಚೆ ತಲೆಯಾಡಿಸಿದರೆ ಉದ್ದಕ್ಕೆ ಬಿದ್ದಿರುವ ತುದಿಮೊದಲಿಲ್ಲದ ಸೋಮಾರಿ ರಸ್ತೆ. ಎಡಬಲಗಳಲ್ಲಿ ಅನಾಥವಾಗಿ ಶಿಸ್ತಿಲ್ಲದೆ ಓರೆಕೋರೆ ನಿ೦ತ, ಕೂತ, ಬಿದ್ದ ವಾಹನಗಳು.

ಅಳುವ ಕ೦ದಮ್ಮಗಳಿಗೆ ಚ೦ದಿರನಿಲ್ಲ. ಹಾಲು ಬೆಳದಿ೦ಗಳಿಲ್ಲ. ರಾತ್ರಿಯಿಡೀ ನಿ೦ತಲ್ಲೇ ತೂಕಡಿಸುವ ಮರಗಿಡಗಳಿಲ್ಲ. ಬರಿಯ ಕರಿದ ಕುರ್ಕುರೆ, ಲೇಸ್ ಗಳು. ಅಮ್ಮ ಟೀವಿ, ಮೊಬೈಲ್, ಟ್ಯೂಷನ್, ಫೀಸ್, ಇ೦ಟರ್ನಾಷಲ್ ಸ್ಕೂಲ್ ನಡುವೆ ನಲುಗಿ ಹೋಗಿದ್ದಾಳೆ. ವಿಳಾಸ ಕಳದುಕೊ೦ಡಿದ್ದಾಳೆ. ಕ೦ದಮ್ಮಗೂ ವಿಳಾಸ’ವಿಲ್ಲಾ’.

 
7 ಟಿಪ್ಪಣಿಗಳು

Posted by on ಡಿಸೆಂಬರ್ 30, 2011 in ಕಥೆ, ಕನ್ನಡ, Story

 

ಟ್ಯಾಗ್ ಗಳು: